ពលរដ្ឋអាមេរិក ១៩៥នាក់ជម្លៀសពីចិន រកឃើញថាគ្មានឆ្លងវីរុស តែត្រូវនៅដោយឡែកមួយរយៈ

2020-01-31 06:57:27
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមការធ្វើតេស្ដជាបឋមបង្ហាញថា ពលរដ្ឋអាមេរិក ១៩៥នាក់ដែលត្រូវបានជម្លៀសពីទីក្រុង Wuhan មិនមានឆ្លងវីរុសកូរ៉ូណានោះទេ ប៉ុន្តែពួកគេត្រូវនៅដាច់ដោយឡែកនៅមូលដ្ឋានទ័ពក្នុងរដ្ឋកាលីហ្វរញ៉ាមួយរយៈសិន រង់ចាំការវាយតម្លៃបន្ដទៀត។

យោងតាមមន្ត្រីសុខាភិបាលអាមេរិក បានឲ្យដឹងកាលពីថ្ងៃពុធថា ការធ្វើតេស្ដអាចធ្វើឡើងរហូតដល់រយៈពេល ៣ថ្ងៃ ដើម្បីឲ្យប្រាកដថាពួកគេគ្មានចេញរោគសញ្ញា និងមិនមានផ្ទុកមេរោគកូរ៉ូណា។ ប្រភពដដែលបន្ថែមថា នេះគឺជាការប្រុងប្រយ័ត្នដ៏សមស្របមួយដើម្បីការពារប្រជាជន និងសហគមន៍របស់អាមេរិក។ មកទល់ពេលនេះ CDC អាមេរិក កំពុងធ្វើការស៊ើបអង្កេតពីជំងឺបន្ដទៀតដើម្បីសិក្សាឲ្យកាន់តែច្បាស់ពីវីរុសកូរ៉ូណា និងវិធីទប់ទល់។

បើគិតមកត្រឹមថ្ងៃសុក្រនេះ នៅសហរដ្ឋអាមេរិកបានរកឃើញប្រជាជនឆ្លងវីរុសកូរ៉ូណាចំនួន ៥ករណី ខណៈដែលចំនួនអ្នកស្លាប់កើនដល់ជាង ២០០នាក់ និងជិត ១ម៉ឺននាក់ឆ្លងវីរុសក្នុងប្រទេសចិន៕

ប្រភព៖ Scmp ប្រែសម្រួល៖ រ័ត្ន