អ្នកជំនាញ៖ ទីផ្សារខុនដូតម្លៃសមរម្យនៅភ្នំពេញនឹងមានកាន់តែច្រើនសម្រាប់អតិថិជនខ្មែរ

2020-02-19 10:57:34
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកជំនាញ និងជាអ្នកប្រឡូកក្នុងវិស័យអចលនទ្រព្យមួយរូប លោក សំ សុខនឿន បញ្ជាក់ថា ដោយសារកំណើនប្រជាជនមានជាបន្តបន្ទាប់ និងទំហំនៃទីក្រុងភ្នំពេញកាន់តែធំឡើងៗផងនោះ ទីផ្សារខុនដូដែលមានតម្លៃសមរម្យនឹងរឹតតែសំបូរបែបសម្រាប់អតិថិជនខ្មែរនៅពេលបន្តិចទៀត។

លោក សំ សុខនឿន

អគ្គនាយករបស់ KW Sen Sok ខាងលើនេះបានឲ្យដឹងថា បច្ចុប្បន្ននេះទីផ្សារខុនដូ គឺកំពុងមានការរីកចម្រើន និងកើនឡើងជាបន្តបន្ទាប់។ កត្តាដែលជំរុញឲ្យទីផ្សារមួយនេះកើនឡើងរួមមាន៖

ទី១ បុរីថ្មីៗនៅកាន់តែឆ្ងាយពីក្រុង ហើយមានតម្លៃខ្ពស់ទៅៗដែលធ្វើអោយអ្នកស្នាក់នៅត្រូវចំណាយពេលវេលាយូរក្នុងការចូលមកក្នុងទីក្រុងវិញដើម្បីបំពេញការងារ។

ទី២ ដោយសារតែប្រជាជនក្នុងក្រុងមានការកើនឡើង នាំអោយមានការស្ទះចរាចរណ៍។

ទី៣ ដោយសារតែប្រជាជនខ្មែរ មានការយល់ដឹងពីរបៀបរស់នៅដែលមានស្តង់ដារប្រសើរជាងមុន ដូចជាហេដ្ឋារចនាសម្ព័ន្ធ ឧបករណ៍ប្រើប្រាស់ ផ្សារទំនើប សាលារៀន មន្ទីរពេទ្យ ។ល។

ទី៤ និន្នាការរបស់អតិថិជនដែលទិញដីឆ្ងាយពីក្រុង ហើយកំពុងតែជួលផ្ទះនៅក្នុងទីក្រុងភ្នំពេញ នឹងងាកមកទិញខុនដូតម្លៃសមរម្យវិញ ដោយហេតុថាការទិញខុនដូមានភាពងាយស្រួលក្នុងការបង់ប្រាក់។ មួយវិញទៀតអាចអោយពួកគេយកលុយពីការជួលផ្ទះ រឺលុយពីការបង់រំលោះដី ដែលនៅជាយក្រុង ជំនួសដោយការទិញខុនដូវិញ។ លើសពីនេះទៅទៀតការទិញខុនដូ គឺជាការទិញផ្ទះរស់នៅតែម្តង អាចអោយគាត់មានស្ថិរភាព និងផាសុកភាពសម្រាប់គ្រួសារជាពិសេស គាត់អាចបំពេញភារកិច្ចក្នុងទីក្រុងភ្នំពេញបានយ៉ាងងាយស្រួល និងចំណេញពេលវេលា ថែមទាំងកូនៗរបស់ពួកគេអាចមានឱកាសក្នុងការចូលរៀនសាលាល្អៗក្នុងក្រុងភ្នំពេញផងដែរ៕

អត្ថបទ៖ នួន ស៊ីណា