មនោរម្យណាស់ តន់ ច័ន្ទសីម៉ា ស្លៀកពាក់សាមញ្ញ ដើរពេញចម្ការបន្លែខៀវស្រងាត់

2020-02-20 04:08:10
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាចម្រៀងផលិតកម្ម Navatra Galaxy កញ្ញា តន់ ច័ន្ទសីម៉ា នៅថ្ងៃម្សិលមិញនេះ បានទៅដល់កសិដ្ឋានដាំបន្លែមួយកន្លែង ដែលគេសង្ស័យថា អាចជាកន្លែងផ្គត់ផ្គង់បន្លែទៅផ្សារកសិផលធម្មជាតិ ឧកញ៉ា ឡេង ណាវ៉ាត្រា ដែលត្រៀមដាក់ដំណើរការឆាប់ៗនេះ។

នេះគឺជាដំណើរលើកទីមួយរបស់តារាចម្រៀងមកពីខេត្តតាកែវទៅចំការបន្លែ ដែលត្រូវបានគេឃើញ ចាប់តាំងពីនាងក្លាយជាតារាចម្រៀងអាជីពមក។ តាមព័ត៌មាន ចំការបន្លែនេះ គឺស្ថិតនៅស្រុកព្រះស្ដេច ខេត្តព្រៃវែង។ សីម៉ា ត្រូវបានគេមើលឃើញថា ហាក់មានត្រេកត្រអាល និងមានភាពរីករាយជាមួយនឹងបន្លែធម្មជាតិមានពណ៌ខៀវខ្ចីមានក្នុងចំការ។

ចំណុចគួរកត់សម្គាល់ ដំណើររបស់ម្ចាស់បទ "គេនោះជាស្រីកាប់ដាវ" គឺស្របនឹងព័ត៌មានថា ផ្សារកសិផលធម្មជាតិផ្ដួចផ្ដើមដោយឧកញ៉ា ឡេង ណាវ៉ាត្រា ត្រៀមដំណើរការ ក្នុងនោះបើតាមការបង្ហើបរបស់ឧកញ៉ា វ័យក្មេង គឺគ្រោងនឹងដាក់ដំណើរការនៅថ្ងៃ១៥ ខែ មីនានេះហើយ។

កាលពីប៉ុន្មានខែមុននេះ លោក ឧកញ៉ា ឡេង ណាវ៉ាត្រា បានប្រកាសថា គ្រោងនឹងបើកទំនើបលក់តែកសិផលធម្មជាតិ របស់កសិករខ្មែរ បន្ថែមលើទំនួញដីធ្លី ផ្ទះល្វែងក៏ដូចជាផលិតកម្ម ដែលលោកកំពុងមានរាល់ថ្ងៃ គ្រោងបើកផ្សារដែលប្រមូលទិញ តែផលិតផលធម្មជាតិ របស់កសិករខ្មែរនេះ ត្រូវបានមហាជនគាំទ្រជាខ្លាំង ព្រោះវាចំណែកធំមួយជួយដល់កសិករខ្មែរ ឲ្យមានទីផ្សារ។

ឥឡូវ កាលបរិច្ឆេទបានចេញមកច្បាស់ហើយ គឺនៅថ្ងៃទី១៥ ខែ មិនា ឆ្នាំ ២០២០ ផ្សារកសិផលខាងលើ នឹងបើកដំណើរការសាកល្បងហើយ ដែលទីតាំងផ្សារគឺនៅកណ្ដាលនៅ Olympia តែម្ដង។ ផ្សារនេះនឹងផ្គត់ផ្គង់បន្លែ ត្រីសាច់ ធម្មជាតិមានគុណភាពខ្ពស់ និងឆ្លងកាត់ក្រុមត្រួតពិនិត្យបច្ចេកទេសត្រឹមត្រូវ ដែលកសិផលទាំងនោះ បានមកពីបងប្អូនកសិករនៅគ្រប់ខេត្តក្រុង។

មកដល់បច្ចុប្បន្ន ក្រុមការងាររបស់លោកឧកញ៉ា បានចងក្រងជា ភ្នាក់ងារដាំបន្លែផ្លែឈើធម្មជាតិតាមលក្ខណៈបច្ចេកទេសត្រឹមត្រូវ សម្រាប់ផ្គត់ផ្គង់មកផ្សារ "កសិផលធម្មជាតិ" រួចរាល់អស់ហើយ។

តោះ...ទៅលេងចម្ការបន្លែខៀវស្រងាត់គួរឲ្យមនោរម្យជាមួយ សីម៉ា ទាំងអស់គ្នា