ប្រើពេល ១ឆ្នាំ ទើបអាចបោកប្រាស់ Google Maps បាន!
- 2020-02-24 03:31:53
- ចំនួនមតិ 0 | ចំនួនចែករំលែក 0
ប្រើពេល ១ឆ្នាំ ទើបអាចបោកប្រាស់ Google Maps បាន!
ចន្លោះមិនឃើញ
រឿងរ៉ាវបុរសម្នាក់ប្រើស្មាតហ្វូនចំនួន ៩៩ គ្រឿង បោកបញ្ឆោតសេវាកម្ម Google Maps បានល្បីលើសារព័ត៌មាន និងបណ្ដាញអ៊ីនធឺណិតកាលពីដើមខែកន្លងទៅ។ នៅពេលនេះសាមីខ្លួនដែលមានឈ្មោះ Simon Weckert បានចេញមុខ រៀបរាប់លម្អិតអំពីដំណើរដើមទងនៃការបោកបញ្ឆោតរបស់ខ្លួន។
Simon បានប្រាប់ឲ្យដឹងថាគំនិតនេះគឺកើតមានឡើងកាលពី ៣ ឆ្នាំមុន នៅក្នុងថ្ងៃបុណ្យ May Day (ថ្ងៃទី ១ ឧសភា) ដែលធ្វើឡើងនាទីក្រុងប៊ែរឡាំង។ រូបគេបាននិយាយបែបនេះថា ៖ "ខ្ញុំបានឃើញមនុស្សជាច្រើនប្រជ្រៀតគ្នា ដើរលើដងផ្លូវ។ ខ្ញុំក៏បានមើលចរាចរណ៍លើ Google Maps និងឃើញអំពីការស្ទះចរាចរណ៍ខ្លាំងនៅតំបន់ដែលខ្ញុំស្ថិតនៅ ទោះបីជាមិនមានរថយន្តសូម្បីតែមួយគ្រឿងនៅក្បែរក្ដី។”
“ខ្ញុំគិតថាវាពិតជាគួរឲ្យចាប់អារម្មណ៍ តើវាអាចទៅរួចទេប្រសិនបើខ្ញុំបង្កើតឡើងវិញ ឬធ្វើនូវការស្ទះចរាចរណ៍មួយដោយខ្លួនឯង។ ខ្ញុំគិតថា ខ្ញុំមិនត្រូវការមនុស្សនោះទេ ខ្ញុំត្រូវការតែស្មាតហ្វូនប៉ុណ្ណោះ។” Simon បាននិយាយជាបន្ត។
Simon គឺត្រូវប្រើពេលជាង ១ ឆ្នាំ ក្នុងការរៀបចំផែនការដើម្បីប្រមូលបាននូវឧបករណ៍គ្រប់គ្រាន់សម្រាប់ថ្ងៃតែមួយ។ មិនមានក្រុមហ៊ុន ឬហាងលក់ទូរសព្ទណា គិតចង់សហការនោះទេ ហើយបើទិញទូរសព្ទមួយទឹកក៏មិនអាចទៅរួចសម្រាប់គម្រោងការដែលមានដើមទន់នេះដែរ។
នៅទីបំផុត រូបគេអាចជំរុញមិត្តភក្ដិគ្រប់គ្រាន់ ដែលអាចខ្ចីទូរសព្ទរបស់ពួកគេបានមួយថ្ងៃ រួមទាំងគណនី Google និងស៊ីមកាតរបស់ពួកគេ និងបានជួលទូរសព្ទខ្លះៗពីក្រុមហ៊ុនដែលផ្ដល់សេវាជួលទូរសព្ទផងដែរ។ បន្ទាប់ពីរៀបចំ និងត្រួតពិនិត្យរួចរាល់ ទូរសព្ទនីមួយៗត្រូវបានដំណើរការនូវមុខងារនាំផ្លូវ ហើយដាក់វានៅលើរទេះរុញ និងចាប់ផ្ដើមប្រតិបត្តិការ ដោយមិនមានការសាកល្បងជាមុននោះឡើយ។ ទីបំផុតការបង្កើតការស្ទះចរាចរណ៍ក្លែងក្លាយ ប្រព្រឹត្តទៅបានដោយជោគជ័យ ដែល Simon បានបង្ហាញវីដេអូនៃដំណើរការបង្កើតថែមទៀតផង។ ខាងក្រោមជាវីដេអូ ៖
ការបង្កើតការស្ទះចរាចរណ៍ក្លែងក្លាយនេះដែរ ត្រូវបានក្រុមការងារ Google ដឹងឮ ដែល Google បានឆ្លើយតបថា ៖ "មិនថាតាមរយៈរថយន្ត រទេះរុញ ឬសត្វអូដ្ឋនោះទេ យើងពេញចិត្តដែលបានឃើញការប្រើប្រាស់ Google Maps ពោរពេញដោយភាពច្នៃប្រឌិត ដោយវាអាចជួយយើងធ្វើឲ្យ Maps មានដំណើរការកាន់តែល្អប្រសើរជាងមុន៕”