បើរដូវកាលចប់ត្រឹមហ្នឹង La Liga ខាតអស់ប៉ុន្មានលុយ?

2020-03-16 11:25:58
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្នុងលីគកំពូលអេស្ប៉ាញ មានពាក្យចចាមអារ៉ាមមួយចំនួនបានលើកឡើងពីការបញ្ចប់រដូវកាលត្រឹមខែមីនានេះ ដោយសារតែការផ្ទុះនៃការរាលដាលជំងឺកូវីដ-១៩។ ទាក់ទិននឹងរឿងនេះដែរ មានការព្យាករណ៍ថា ស្ថាប័ន La Liga អាចនឹងខាតទឹកប្រាក់ជាង ៨០០លានដុល្លារ។

ស្ថាប័នបាល់ទាត់ដ៏ធំនេះគ្រប់គ្រងលីគលំដាប់ខ្ពស់ ២ថ្នាក់ គឺ លីគកំពូលអេស្ប៉ាញ និងលីគលំដាប់ទី២។ ក្នុងចំណោមជាង ៨០០លានដុល្លារនោះ La Liga អាចខាតបង់ពីចំណូលទូរទស្សន៍សរុបទាំង ២លីគ ប្រមាណ ៦១៣លានដុល្លារ ហើយក្រៅពីនេះទៀតខាតបង់ពីប្រាក់ថ្លៃសំបុត្រនានា។

ក្រៅពីស្ថាប័ន La Liga ខាតបង់ អ្នកដែលទទួលបានផលប្រយោជន៍ពីបាល់ទាត់ដូចជា ភ្នាក់ងារទេសចរណ៍ អ្នកលក់វត្ថុអនុស្សាវរីយ៍ ក៏ប្រឈមមុខធ្ងន់ធ្ងរផងដែរ។

គួរបញ្ជាក់ផងដែរថា សេចក្ដីសម្រេចចិត្តផ្លូវការរបស់ La Liga បានផ្អាកការប្រកួតចំនួន ២សប្ដាហ៍ ទាំងនៅលីគកំពូល និងលីគទី២ ខណៈកីឡាករមួយចំនួនបានឆ្លងជំងឺរាលដាលសកលនេះ ហើយមួយចំនួនធំ ស្ថិតក្នុងលក្ខខ័ណ្ឌដាច់ដោយឡែក៕

ប្រភព៖ Marca ប្រែសម្រួល៖ ហ៊ីម រស្មី