Huawei P40 ស៊េរីកប់ជាងគេ តម្លៃប្រមាណ ១៥៤៣ ដុល្លារ

2020-03-27 01:58:55
ចំនួនមតិ 0 | ចំនួនចែករំលែក 0

ចន្លោះមិនឃើញ

Huawei បានប្រកាសចេញស្មាតហ្វូនត្រកូល P40 ជាផ្លូវការកាលពីយប់មិញ ដែលក្នុងនោះមានបីប្រភេទខុសៗគ្នា មាន Huawei P40, Huawei P40 Pro និង Huawei P40 Pro+។ ពេលនេះមកដឹងលក្ខណៈពិសេសៗមួយចំនួនរបស់ Huawei P40 Pro+ ដែលជាគូប្រជែងដ៏ខ្លាំងក្លាមួយរបស់ iPhone 11 Pro Max និង Galaxy S20 Ultra។

ចំណុចដែលធ្វើឲ្យ P40 Pro+ លេចធ្លោជាង P40 ពីរប្រភេទទៀតគឺ មានបំពាក់ឡេន Periscope ទំហំ ៨MP ដែលអាចធ្វើការ Zoom បែប Optical ដល់ ១០ ដង, Zoom បែប Hybrid បាន ២០ ដង និង Zoom បែបឌីជីថលលាយ Optical បាន ១០០ដង។ វាក៏មានបំពាក់កាមេរ៉ាមេទំហំ ៥០MP ដែលមាន Sensor រូបភាពធំទំហំ 1/1.28" ដែលមាន Filter ជាប្រភេទ RYYB ដូចមុនដែរ គួបផ្សំដោយកាមេរ៉ា Ultra-Wide ទំហំ ៤០MP និង Sensor 3D ToF សម្រាប់វាស់ជម្រៅរូបភាព និងកាមេរ៉ា Telephoto មួយគ្រាប់ទៀតទំហំ ៨MP។

ប្រព័ន្ធកាមេរ៉ារបស់ P40 Pro+ មានសមត្ថភាពផលិតវីដេអូក្នុងកម្រិត 4K/60fps សម្រាប់វីដេអូធម្មតា និងអាចថតកម្រិត 4K សម្រាប់វីដេអូ Time-Lapse បានផងដែរ។ វាក៏មានមុខងារ Super Steady Telephoto Video ដើម្បីពង្រឹងសមត្ថភាពថតវីដេអូលើកាមេរ៉ា Telephoto ឲ្យមានលំនឹងល្អ។ បន្ថែមពីនេះកាមេរ៉ា Ultra-Wide អាចថតវីដេអូប្រភេទ HDR និងមាន ISO រហូតដល់ ៥១ ២០០ ពេលថតនៅទីងងឹត។

P40 Pro+ គឺជាស្មាតហ្វូនដំបូងគេបំផុតដែលមានល្បឿនសាកថ្មឥតប្រើខ្សែរហូតដល់ ៤០ វ៉ាត់។ កន្លងមកគេឃើញការបង្ហាញបច្ចេកវិទ្យានេះពីក្រុមហ៊ុនជាច្រើន ប៉ុន្តែ Huawei ដំបូងគេដែលប្រកាសប្រើវាជាផ្លូវការ។ សម្រាប់ការសាកថ្មប្រើខ្សែវិញក៏មានល្បឿន ៤០ វ៉ាត់ និងទ្រាំទ្រនូវការសាក Reverse Wireless ផងដែរ សម្រាប់ថ្មទំហំ ៤២០០ mAh របស់វា។

P40 Pro+ គឺមានបំពាក់ឈីប Kirin 990 5G និងមាន RAM ទំហំ ៨GB ដូចជា P40 ពីរប្រភេទទៀតដែរ ប៉ុន្តែមានបំពាក់អង្គផ្ទុកទំហំ ៥១២GB ដែលជាជម្រើសតែមួយគត់។

P40 Pro+ និង P40 Pro គឺមានប្រើប្រាស់រចនាបថ Quad-Curve ដែលមានន័យថាក្រៅពីមានអេក្រង់កោងនៅផ្នែកខាងឆ្វេងនិងខាងស្ដាំ ក៏មានកោងនៅផ្នែកខាងលើនិងខាងក្រោមផងដែរ។ P40 Pro+ គឺធ្វើឡើងពីសារធាតុសេរ៉ាមិចដ៏រឹងមាំ និងមានសមត្ថភាពការពារទឹក/ធូលីកម្រិត IP68។

អេក្រង់របស់ P40 Pro+ ដូចជា P40 Pro ដែរ គឺមានទំហំ ៦,៥៨ អ៊ីញ ជាប្រភេទ OLED មាន Refresh Rate 90Hz ដែលមានកម្រិតបង្ហាញ ១២០០x២៦៤០ ភីកសែល។ នៅលើអេក្រង់មានទ្រនាប់ស្កេនម្រាមដៃ និងមានចោះរន្ធសម្រាប់បំពាក់កាមេរ៉ា Selfie ទំហំ ៣២MP ដែលកាមេរ៉ានេះអាចថតវីដេអូបានដល់កម្រិត 4K/60fps និងមានអមដោយប្រព័ន្ធស្កេនមុខ IR ដ៏មានសុវត្ថិភាពផងដែរ។

ស្មាតហ្វូនត្រកូល P40 ទាំងអស់គឺមានដំណើរការដោយប្រព័ន្ធប្រតិបត្តិការ Android 10 និង EMUI 10.1 ហើយមិនមាននូវសេវាកម្ម Google Mobile Services ឡើយ ដែលពឹងផ្អែកលើ Huawei Mobile Services ជំនួសវិញ។