តិចថាលំៗអីទៅ! ៣ខេត្តនេះ សុទ្ធតែមានរបស់យក្សទទួលទេវតាឆ្នាំថ្មី មិនឲ្យចាញ់គ្នា
- 2018-03-19 08:14:02
- ចំនួនមតិ 0 | ចំនួនចែករំលែក 0
តិចថាលំៗអីទៅ! ៣ខេត្តនេះ សុទ្ធតែមានរបស់យក្សទទួលទេវតាឆ្នាំថ្មី មិនឲ្យចាញ់គ្នា
ចន្លោះមិនឃើញ
ក្នុងឱកាសអបអរសាទរពិធីបុណ្យចូលថ្មីប្រពៃណីជាតិខ្មែរ នៅតាមបណ្ដាខេត្តនានា បានរៀបចំព្រឹត្តិការណ៍សង្ក្រាន្តឆ្នាំថ្មី ដើម្បីផ្ដល់ភាពសប្បាយរីករាយដល់បងប្អូនប្រជាពលរដ្ឋខ្មែរ ក៏ដូចជាបង្ហាញអំពីវប្បធម៌ដ៏ល្អផូរផង់របស់កម្ពុជា។ ក្នុងនោះសង្កេតឃើញថា មានខេត្តចំនួន៣ហើយ បានត្រៀមវត្ថុយក្សដើម្បីញ៉ាំងឲ្យព្រឹត្តិការណ៍ កាន់តែពិសេសឡើង។
**១. មុខហនុមានយក្សត្រៀមបង្ហាញក្នុងព្រឹត្តិការណ៍អង្គរសង្ក្រាន្ត២០១៨**
ហនុមានយក្ស គឺជាអ្វីដែលថ្មីក្នុងព្រឹត្តិការណ៍អង្គរសង្ក្រាន្តឆ្នាំ២០១៨ ក្នុងចំណោមអ្វីដែលថ្មីៗ និងប្លែកៗជាច្រើនដទៃទៀត។
ឯកឧត្ដម សុខ សប្បាយណា ប្រធានលេខាធិការដ្ឋានក្រុមប្រតិបត្តិនៃព្រឹត្តិការណ៍អង្គរសង្រ្កាន្តឆ្នាំ២០១៨ បានឲ្យដឹងថា មូលហេតុសំខាន់ដែលជ្រើសរើសមុខហនុមានធ្វើជារបស់យក្ស គឺដើម្បីលើកស្ទួយល្ខោនខោល ជាសម្បត្តិវប្បធម៌ដ៏ថ្លៃថ្លារបស់ដូនតាខ្មែរ។ ជាពិសេសស្របនឹងប្រធានបទដែលកំណត់យកឆ្នាំនេះ គឺ៖ «សាទរមរតកដូនតា»។
យ៉ាងណាក្ដីលោកនៅមិនទាន់បញ្ជាក់នៅឡើយទេថា តើហនុមានយក្សនោះមានប្រវែងប៉ុន្មាន កំពស់ប៉ុន្មាននៅឡើយទេ គ្រាន់តែបង្ហើបថា ធំបំផុតអាចគ្រប់គ្នានឹកស្មានមិនដល់។
២. ម្នាស់យក្សត្រៀមបង្ហាញក្នុងព្រឹត្តិការណ៍សង្ក្រាន្តបាត់ដំបង
សហភាពសហព័ន្ធយុវជនកម្ពុជា សាខាខេត្តបាត់ដំបង និងអាជ្ញាធរខេត្ត នឹងរៀបចំព្រឹត្តិការណ៍សង្ក្រាន្តដ៏ធំបំផុតលើកដំបូង ឈ្មោះថា សង្ក្រាន្តបាត់ដំបង២០១៨ រយៈពេល ៤ថ្ងៃ ចាប់ពីថ្ងៃទី១៣ ដល់១៦ ខែមេសា ឆ្នាំ២០១៨ ដើម្បីទទួលទេវតាឆ្នាំថ្មី (ឆ្នាំច) និងអបអរពិធីបុណ្យ ចូលឆ្នាំប្រពៃណីខ្មែរ ។
អ្វីដែលពិសេសក្នុងព្រឹត្តិការណ៍សង្ក្រាន្តប្រចាំខេត្តបាត់ដំបងលើកដំបូងនោះគឺ នឹងដាក់តាំងផ្លែម្នាស់ ដ៏ធំកម្ពស់៥ម៉ែត្រ ដោយយកផ្លែម្នាស់ចំនួន ៥ ០០០ផ្លែ មកផ្គុំចូលគ្នា និងផ្លែពោតកម្ពស់ ៥ម៉ែត្រ ដែលយកផ្លែពោតចំនួន ១០ ០០០ផ្លែ មកផ្គុំចូលគ្នាផងដែរ។
៣. ត្នោតយក្សត្រៀមបង្ហាញក្នុងព្រឹត្តិការណ៍កំពង់ស្ពឺសង្ក្រាន្ត២០១៨
រដ្ឋបាលខេត្តកំពង់ស្ពឺ សហការជាមួយសហភាពសហព័ន្ធយុវជនកម្ពុជាខេត្ត នឹងរៀបចំព្រឹត្តិការណ៍ «កំពង់ស្ពឺសង្ក្រាន្ត» រយៈពេល ៣ថ្ងៃ ចាប់ពីថ្ងៃទី ១៤ ដល់ ១៦ ខែមេសាខាងមុខនេះ នៅបរិវេណសួនច្បារ សម្ដេចសង្ឃរាជ ជួន ណាត ក្រុងច្បារមន។
អ្វីដែលគួរឲ្យចាប់អារម្មណ៍នោះ កំពង់ស្ពឺសង្ក្រាន្តក៏មិនឲ្យចាញ់ខេត្តទាំងពីរខាងលើឡើយ ដោយត្រៀមរចនាផ្លែត្នោតយក្សធំបំផុតមិនធ្លាប់មាន រហូតជា២ម៉ែត្រកន្លះឯណោះ។ បើតាមលោក សរ សពុត្រា ប្រធានសហភាពសហព័ន្ធយុវជនកម្ពុជា ប្រចាំខេត្តកំពង់ស្ពឺ បានថ្លែងឲ្យដឹងថា ការរចនាផ្លែត្នោតយក្សនេះឡើង គឺដើម្បីបង្ហាញអំពីអត្តសញ្ញាណប្រទេសកម្ពុជា ជាពិសេសខេត្តកំពង់ស្ពឺតែម្ដង ដែលមានដើមត្នោតច្រើនជាងគេ៕