ស្លឹកឈើជ្រុះមិនឆ្ងាយពីគល់! កូនប្រុសស្រីតារាចម្រៀង ម៉េង កែវពេជ្ជតា មានដុងសិល្បៈមិនចាញ់អ្នកម្តាយ

2018-06-02 04:51:05
ចំនួនមតិ 0 | ចំនួនចែករំលែក 0

ចន្លោះមិនឃើញ

មាននិស្យ័យ និងទេពកោសល្យដូចគ្នាមិនខុសពីម្ដាយ កូនប្រុសស្រីរបស់តារាចម្រៀងអ្នកនាង ម៉េង កែវពេជ្ជតា គឺជាគ្រាប់ពូជសិល្បៈដ៏ល្អ ដែលមានសមត្ថភាពទាំងច្រៀង និងកាន់ឧបករណ៍តន្រ្តីបុរាណ សម័យ។

មានមុខមាត់ស្រស់ស្អាត និងគួរឲ្យស្រលាញ់ហើយ កូនប្រុសស្រីអ្នកនាង ម៉េង កែវពេជ្ជតា អាចលេងឧបករណ៍តន្រ្តីខែ្មរបានយ៉ាងល្អ គឺប្អូនប្រុស ពេជ្ជ រតនៈ អាយុ ១១ឆ្នាំ អាចលេងឧបករណ៍ ទ្រសោ និងព្យាណូ ចំណែកប្អូនស្រី ពេជ្ជតា សង្វាពេជ្រ នាងតូចអាចលេង វីយូឡុង និង ទ្រសោ ហើយក៏អាចច្រៀងបានដែរ។

ក្នុងនាមជាម្តាយមួយរូបអ្នកនាង ម៉េង កែវពេជ្ជតា បានបញ្ជាក់ថាអ្នកនាងសប្បាយចិត្តខ្លាំងណាស់នៅពេលដែលឃើញកូនដើរតាមគន្លងរបស់ខ្លួនដូច្នេះ មានន័យថា អ្នកនាងមានអ្នកបន្តវេនហើយ។ ចំពោះការសិក្សាឧបករណ៍តន្ត្រីនេះកូន អ្នកនាងទាំងពីរហាត់បានរយៈពេល៣ឆ្នាំហើយ។

"ពួកគាត់ហាត់បាន៣ឆ្នាំហើយ ប៉ុន្តែហាត់បានតែថ្ងៃសៅរ៍ប៉ុណ្ណោះ ព្រោះថ្ងៃធម្មតាគាត់ត្រូវរៀនចំណេះដឹងទូទៅ។ ដំបូងគឺពួកគាត់ចង់ទៅចូលរៀនដោយខ្លួនឯង ខ្ញុំសួគាត់ថា កូនអាចធ្វើបានអត់? ពេលឃើញស្នាដៃពួកគាត់អីចឹង បងសប្បាយចិត្តណាស់អូន ដំបូងបងឡើងស្រក់ទឹកភ្នែក"។ អ្នកនាង ម៉េង កែវពេជ្ជតា រៀបរាប់ទាំងរំភើប។

ចំពោះការបើកឱកាសឲ្យកូនចូលក្នុងសិល្បៈក្នុងពេលខាងមុខ ឬក៏អត់នោះ អ្នកនាង ម៉េង កែវពេជ្ជតាថា កូនៗអ្នកនាងអាចឆ្លៀតពេលចូលរួមបានដោយមិនបាច់ចាំស្អែកនោះទេ។

កន្លងមកប្អូនប្រុស ពេជ្ជ រតនៈ និង នាងតូចរូបស្អាត ពេជ្ជតា សង្វាពេជ្រ មិនត្រឹមតែបានបង្ហាញសមត្ថភាពនៅក្នុងស្រុកប៉ុណ្ណោះទេ ថែមទាំងបានទៅសម្ដែងនៅក្រៅប្រទេស បានបារាំង និងជប៉ុនជាដើម៕