ម្ចាស់មេដាយរាំកម្ពុជាកម្រិតអាស៊ីមកដល់ភ្នំពេញយប់នេះ
- 2018-09-17 03:30:08
- ចំនួនមតិ 0 | ចំនួនចែករំលែក 0
ម្ចាស់មេដាយរាំកម្ពុជាកម្រិតអាស៊ីមកដល់ភ្នំពេញយប់នេះ
ចន្លោះមិនឃើញ
ក្រុមកីឡាករ កីឡាការិនីរាំកម្ពុជានឹងត្រឡប់មកដល់ប្រទេសកំណើតវិញវេលាម៉ោង១១យប់នេះ បន្ទាប់ពីទទួលបានជោគជ័យក្នុងការចូលរួមប្រកួតកីឡារាំងកម្រិតទ្វីបអាស៊ីនៅទីក្រុងហុងកុង ប្រទេសចិនកាលពីចុងសប្តាហ៍កន្លងទៅនេះ។
តាមការឲ្យដឹងពីសហព័ន្ធកីឡារាំងកម្ពុជាថា ក្នុងព្រឹត្តិការណ៍ប្រកួតជើងឯកកីឡារាំង ADSF Asian Dance Sport Championship ឆ្នាំ២០១៨នៅទីក្រុងហុងកុងនេះ កម្ពុជាដណ្តើមបានមេដាយ៥គ្រឿងគឺមាស១ ប្រាក់ ១និងសំរឹទ្ធ៣។ នេះជាលើកដំបូងដែលសហព័ន្ធរាំកម្ពុជាបញ្ជូនអត្តពលិករាំរបស់ខ្លួនចូលរួមប្រកួតកម្រិតទ្វីបអាស៊ី។
កីឡាករ ច័ន្ទ វ៉ិចទ័រ និងកីឡាការិនី ព្រាប ដានីអែលឡា ឈ្នះមេដាយមាសពីការប្រកួតសម្តែងវិញ្ញាសាគូបុរស-នារី 5-Dance ក្នុងផ្នែក Asian Hong Kong Open 2018។ អ្នកទាំងពីរក៏ឈ្នះមេដាយសំរឹទ្ធពីការប្រកួតរាំងគូបុរស-នារី។
ដោយឡែកកីឡាករ សេង សុគីម ឈ្នះមេដាយប្រាក់១ពីការប្រកួតសម្តែងវិញ្ញាសាទោល Cha Cha Cha និងឈ្នះមេដាយសំរឹទ្ធ១ទៀតពីការប្រកួតរាំវិញ្ញាសា Rumba។ ជាមួយគ្នានេះកីឡាករ ម៉ូវ ដាវីន និងកីឡាការិនី ម៉ូវ ដានីតាប្រកួតរាំគូបុរស-នារី Cha Cha Cha ឈ្នះមេដាយសំរឹទ្ធ១។
ព្រឹត្តិការណ៍ប្រកួតរាំជើងឯកអាស៊ីនេះធ្វើឡើងនៅទីក្រុងហុងកុងពីថ្ងៃទី១៤-១៥ ខែកញ្ញា ឆ្នាំ២០១៨ដែលមានប្រទេសចូលរួមជិត៤០ប្រទេស។ ចំណែកកម្ពុជាបានបញ្ជូនកីឡាករ កីឡាការិនី៩នាក់ចូលរួមប្រកួត។ ក្រុមកីឡារាំកម្ពុជានឹងវិលត្រឡប់មកដល់ប្រទេសកំណើតវេលាម៉ោង១១យប់ ថ្ងៃចន្ទ ទី១៧ ខែកញ្ញានេះ៕