មកដឹងចំណុចខ្លាំង Huawei Mate 20/20 Pro ប្រកាសចេញយប់នេះ

2018-10-16 07:29:42
ចំនួនមតិ 0 | ចំនួនចែករំលែក 0

ចន្លោះមិនឃើញ

Huawei នឹងបង្ហាញចេញស្មាតហ្វូនកំពូលចុងក្រោយម៉ូដែល Mate 20 និង 20 Pro ប្រចាំឆ្នាំ ២០១៨ នៅវេលាម៉ោង ៨ យប់នេះ លើឆាកអន្តរជាតិនាទីក្រុងឡុងដុង។

ត្បិតថាមិនទាន់ប្រកាសចេញជាផ្លូវការ ប៉ុន្តែរយៈពេលកន្លងមកទៅដំណឹងចចាមអារ៉ាមជុំវិញស្មាតហ្វូនទាំងពីរ ត្រូវបានគេបញ្ចេញជាហូរហែ។ ខាងក្រោមនេះជាចំណុចពិសេសៗមួយចំនួនរំពឹងថាមានលើ Mate 20/20 Pro ៖

រចនាបថ

Mate 20

ស្មាតហ្វូនទាំងពីរនឹងមានរូបរាងមិនខុសពី Mate 10/10 Pro ដែលចេញពីឆ្នាំទៅប៉ុន្មាននោះទេ ប៉ុន្តែមានផ្ទៃអេក្រង់លាតពេញទីធំជាងមុន ជាមួយការបន្ថែមក្បាលឆក។ Mate 20 Pro នឹងមានបំពាក់អេក្រង់ OLED រាងកោង ខណៈដែល Mate 20 មានបំពាក់អេក្រង់ LCD ផ្ទៃរាបស្មើ។ ក្រោមផ្ទៃអេក្រង់ Mate 20 Pro នឹងមានបំពាក់ទ្រនាប់ស្កេនម្រាមដៃយ៉ាងពិសេសទៀតផង ចំណែក Mate 20 មានទ្រនាប់ស្កេននៅខ្នងខាងក្រោយ។

Mate 20 Pro

លក្ខណៈសម្បត្តិខាងក្នុង

Huawei បានបញ្ជាក់ថា Mate 20/20 Pro នឹងជាស្មាតហ្វូនដំបូងគេរបស់ខ្លួនមានប្រើប្រាស់បន្ទះឈីប Kirin 980 ទំហំ ៧ ណាណូម៉ែត្រ ដែលសន្សំសំចៃថាមពល និងផ្ដល់ប្រតិបត្តិការលឿនជាងមុន។ Mate 20 មានជម្រើស RAM ទំហំ ៤ GB, ៦ GB និង ៨ GB អមនឹងអង្គផ្ទុកទំហំ ៦៤ GB ឬ ៥១២ GB។ ចំណែក Mate 20 Pro មាន RAM ទំហំ ៦ GB ឬ ៨ GB អមនឹងអង្គផ្ទុកទំហំ ១២៨ GB ឬ ៥១២ GB។

ស្មាតហ្វូនទាំងពីរអាចទ្រាំទ្រនឹងការសាកថ្មឆាប់ពេញកម្លាំង ៤០ វ៉ាត់ ដោយ Mate 20 មានថ្មទំហំ ៤០០០ mAh និង Mate 20 Pro មានថ្មទំហំ ៤២០០ mAh។

កាមេរ៉ា

ខាងឆ្វេង Mate 20 Pro និងខាងស្ដាំ Mate 20

កាមេរ៉ា ៣ គ្រាប់នឹងលេចវត្តមានលើស្មាតហ្វូនទាំងពីរ។ ជាមួយការប្រើបន្ទះឈីប Kirin 980 អាចជួយឲ្យកាមេរ៉ាលើ Mate 20/20 Pro មានសមត្ថភាព Zoom ចូលបានរហូតដល់ ៥ ដង ដោយមិនខូចគុណភាព ហើយក៏ជួយបង្កើនសមត្ថភាពថតរូបក្នុងទីងងឹតទៀតផង។

ទូរសព្ទ Gaming

Huawei បានបង្ហើបខ្លះៗពី Mate 20X ដែលទំនងជាប្រភេទទូរសព្ទសម្រាប់លេងហ្គេម ដោយអាចរក្សាកម្ដៅបានល្អ និង លេងហ្គេមបានកាន់តែយូរ។ ដំណឹងអំពីទូរសព្ទ Gaming នេះមានមិនច្រើននោះទេ។

បញ្ជាក់ថាការផ្សាយផ្ទាល់កម្មវិធីប្រកាសចេញ Huawei Mate 20/20 Pro អាចទស្សនាបានលើគណនី YouTube ផ្លូវការរបស់ Huawei ដោយកម្មវិធីនឹងចាប់ផ្ដើមពីវេលាម៉ោង ៨ យប់ថ្ងៃទី ១៦ តុលានេះ។ លើ Page Sabay News Technology ក៏នឹងមានការផ្សាយបន្តផ្ទាល់ជូនប្រិយមិត្តទស្សនាផងដែរ ដូចនេះកុំភ្លេចរង់ចាំតាមដានទាំងអស់គ្នា៕

ចុចអាន៖

ប្រភព៖ GSMarena ប្រែសម្រួល៖ សុខហេង