ចំខួប១០ឆ្នាំ សារមន្ទីរដ៏ល្បី១ នៅខេត្តសៀមរាប នឹងធ្វើរឿងរំភើប១

2018-11-03 02:50:00
ចំនួនមតិ 0 | ចំនួនចែករំលែក 0

ចន្លោះមិនឃើញ

នាយកដ្ឋាននៃអាជ្ញាធរជាតិអប្សរាបានឱ្យដឹងថា ដើម្បីអបអរសាទរ ខួប១០ឆ្នាំ នៃដំណើរការបើកទទួលភ្ញៀវ របស់សារមន្ទីរព្រះនរោត្ដមសីហនុ-អង្គរ នឹងមានបើកឱ្យសាធារណជនជាតិ និងអន្តរជាតិ ចូលទស្សនាដោយឥតគិតថ្លៃ ។ រយៈពេល ០៣ថ្ងៃ គឺចាប់ពី ថ្ងៃទី០៤ ដល់ថ្ងៃទី០៦ ខែធ្នូ ឆ្នាំ២០១៨ ខាងមុខនេះ។

លោក ឡុង កុសល ប្រធាននាយកដ្ឋានផ្សព្វផ្សាយ នៃអាជ្ញាធរជាតិអប្សរាបានឱ្យដឹងថា នេះជាឱកាសល្អសម្រាប់ប្រជាពលរដ្ឋខ្មែរ ជាពិសេសយុវជនបានឈ្វេងយល់ឱ្យបានកាន់តែ ច្រើនបន្ថែមទៀត ពីបេតិកភណ្ឌសម្បត្តិ សិល្បៈវប្បធម៌ជាតិរបស់យើងដើម្បីជំរុញឱ្យប្រជាពលរដ្ឋចេះស្រឡាញ់ និងចូលរួមថែរក្សាការពារសម្បត្តិវប្បធម៌ផងដែរ។

សូមបញ្ជាក់ថា សារមន្ទីរព្រះនរោត្ដមសីហនុ-អង្គរនេះ ស្ថិតនៅខាងជើងជាប់សាលា ខេត្តសៀមរាប។ នៅក្នុងសារមន្ទីរនេះមានដាក់តាំងវត្ថុបុរាណជាច្រើនប្រភេទ រួមមាន បដិមា កុលាលភាជន៍ ផ្នូរបុរាណសាកសព ឬ ឆ្អឹងខ្មោចនៃមនុស្សសម័យបុរាណ។

តាមឯកសារស្រាវជ្រាវបានបង្ហាញថា លលាដ៍ក្បាលមនុស្សបុរាណកាលនេះ ស្ថិតក្នុងសម័យយុគសំរឹទ្ធ និងបានរកឃើញនៅ ក្នុងបាតបារាយណ៍ទឹកថ្លា ក្នុងអំឡុងពេលអ្នកស្រាវជ្រាវបុរាណវិទ្យាបានធ្វើកំណាយស្រាវជ្រាវ នៅបារាយណ៍ទឹកថ្លា ឆ្នាំ២០០៤-២០០៥។ ចំពោះរូបបដិមាជាច្រើនទៀតត្រូវបានយកមកពីការកំណាយនៅប្រាសាទបន្ទាយក្ដី៕

ប្រភព៖ AKP ប្រែសម្រួល៖ ពៅ រក្សា