Tesla នឹងបញ្ចេញរថយន្តប្រភេទ Pick-Up នាពាក់កណ្ដាលឆ្នាំ ២០១៩ នេះហើយ

2019-01-31 04:23:57
ចំនួនមតិ 0 | ចំនួនចែករំលែក 0

ចន្លោះមិនឃើញ

តាមពាក្យចចាមអារ៉ាម និងប្រភពជិតស្និទ្ធនឹង Tesla បានឲ្យដឹងយូរមកហើយថា ក្រុមហ៊ុនយក្សរបស់អាមេរិកជំនាញខាងផលិតរថយន្តប្រើអគ្គិសនីសុទ្ធមួយនេះ កំពុងសំងំផលិតរថយន្តប្រភេទសល់ឃ្លុបក្រោយ Pick-Up ដែលនឹងក្លាយជារថយន្តដំបូងក្នុងប្រវត្តិសាស្ត្ររបស់ Pick-Up ដែលនឹងប្រើអាគុយសុទ្ធតែម្ដង មិនមានប្រើឥន្ធនៈ។

រូបតំណាង

CEO របស់ Tesla លោក Elon Musk បានបង្ហើបនៅក្នុងសន្និសីទបូកសរុបលទ្ធផលហិរញ្ញវត្ថុរបស់ក្រុមហ៊ុនថា ក្រុមហ៊ុនរំពឹងនឹងបញ្ចេញរថយន្តប្រភេទ Pick-Up នៅក្នុងរដូវក្ដៅឆ្នាំ ២០១៩ ពោលគឺក្នុងអំឡុងខែមិថុនា ដល់ខែកញ្ញា។ លោក Elon Musk បាននិយាយទៀតថា៖ " វានឹងក្លាយជារថយន្តដែលប្លែកពីគេ ហើយមានតែមួយប្រភេទហ្នឹងតែប៉ុណ្ណោះ " ។

យ៉ាងណាមិញ ខាងក្រុមហ៊ុននិយាយពីការ "បញ្ចេញ" មិនប្រាកដថាជាការចេញលក់នោះទេ។ បើតាមបទពិសោធន៍ជាក់ស្ដែងក្នុងផលិតកម្មរបស់ Tesla រថយន្តប្រភេទ Pick-Up នេះនឹងត្រូវការពេលច្រើនទម្រាំនឹងចេញលក់។ ជាការពិតណាស់ Tesla នៅតែដុតដៃដុតជើងក្នុងសង្វាក់ផលិតកម្ម Tesla Model 3 ដែលកំពុងខ្វះខាតជាទម្ងន់ ផលិតមិនទាន់ ដោយក្រុមហ៊ុនទើបតែជិតបញ្ចប់ការសាងសង់រោងចក្រ Gigafactory របស់ខ្លួនមួយទៀតនៅទីក្រុង សៀងហៃ ប្រទេសចិន។

ក្រៅពីរថយន្តប្រភេទ Pick-Up នេះ Tesla ក៏កំពុងតែចាប់ផ្ដើមសង្វាក់ផលិតកម្មរថយន្តដឹកទំនិញធុនកណ្ដាល (Semi-Truck) និងរថយន្ត SUV ដំបូងរបស់ខ្លួន ដែលគេស្គាល់ថា Tesla Model “Y” នោះដែរ ដែលរំពឹងទុកថានឹងចេញក្នុងឆ្នាំ ២០២០ ខាងមុខ។