អ្នកលក់បង្កងខេត្តតាកែវបង្ហើបតិចនិចជ្រើសរើសបង្កងធម្មជាតិពិតៗ
- 2019-02-16 07:05:48
- ចំនួនមតិ 0 | ចំនួនចែករំលែក 0
អ្នកលក់បង្កងខេត្តតាកែវបង្ហើបតិចនិចជ្រើសរើសបង្កងធម្មជាតិពិតៗ
ចន្លោះមិនឃើញ
ដោយសារមានរស់ជាតិឆ្ងាយ បង្កងធម្មជាតិខេត្តតាកែវ រមែងត្រូវបានអ្នកលក់ មួយចំនួនបន្លំថា ជាបង្កងធម្មជាតិ។ បង្កងធម្មជាតិមានប្រភពពីខេត្តតាកែវ ត្រូវបានអ្នកទេសចរពីទីជិតឆ្ងាយល្បីថា មានរសជាតិប្លែក បើប្រៀបធៀបនឹងបង្កងទឹកសាបនៅតំបន់ផ្សេង។
លោក សៅ កុសល អាជីវករលក់បង្កងធម្មជាតិនៅទីរួមខេត្តតាកែវបានទទួលស្គាល់ថា កន្លងមកបង្កងធម្មជាតិនៅខេត្តតាកែវ ពិតជាមានជនឱកាសនិយមមួយចំនួនលក់បន្លំប្រាកដមែន។ តែដើម្បីជៀសវាងការលក់បន្លំភ្នែក អ្នកទិញអាចកត់ចំណាំចំណុចមួយចំនួនរវាងបង្កងធម្មជាតិ និងបង្កងចិញ្ចឹមបាន។
លោកបានឱ្យដឹងថា ទី១ បង្កងធម្មជាតិមានកម្លាំងខ្លាំង និងមិនងាយងាប់នោះទេ។ ទី២ បង្កងធម្មជាតិមានសម្បកពណ៌លឿង ខុសប្លែកបន្តិចពីបង្កងចិញ្ចឹម ដែលមានសម្បកពណ៌ក្រម៉ៅ។ ទី៣ មានខួរច្រើន សាច់ស្វិត និងមានរស់ជាតិជាងបង្កងចិញ្ចឹម។ “ដូច្នេះសំខាន់បំផុត គឺរសជាតិតែម្តង មានរស់ជាតិឆ្ងាយខុសប្លែកពីបង្កងចិញ្ចឹម មិនងាយងាប់ បើបង្កងចិញ្ចឹមឆាប់ងាប់ណាស់ ។ ចំពោះសំបកបង្កងរឹងឬទន់គឺយើងមិនអាចសំគាល់បានទេ”។
លោក ហេង សំណាង ម្ចាស់ទំព័រហ្វេសបុកផេកបង្កងធម្មជាតិខេត្តតាកែវ-សាខាភ្នំពេញបានចែករំលែកបទពិសោធន៍ថា ជាទូទៅបង្កងធម្មជាតិសំបកលឿងត្រង់ ខ្លួន ក្បាល មានជើងខ្លីៗ។ ប៉ុន្តែចំពោះបង្កងចិញ្ចឹមសំបកខៀវ ជើង និងខ្លួនវែង ។ ក្បាលធំតែអត់សូវមានខួរច្រើនដូចបង្កងធម្មជាតិទេ។ បន្ថែមលើនេះ បង្កងធម្មជាតិមានកម្លាំងខ្លាំង និងអាចរស់បានយូរជាងបង្កងចិញ្ចឹម។
“អញ្ចឹងបើខ្ញុំអ្នកលក់មើលទៅដឹងតែម្តង មិនពិបាកចំណាំទេ ប៉ុន្តែបងប្អូនយើងអ្នកទិញគាត់អាចមានការលំបាក។ ជាទូទៅពេល យកមកដាក់លក់ យើងតែងដាក់អុកស៊ីហ្សែន ក្នុងនោះបង្កងធម្មជាតិអាចរស់បានយូរជាងបង្កងចិញ្ចឹម”។
ទោះយ៉ាងលោកបានឱ្យដឹងទៀតថា បង្កងធម្មជាតិចែកចេញជាពីរប្រភេទ គឺបង្កងបឹង និងបង្កងទន្លេ។ មកដល់ពេលនេះបង្កងបឹងជិតផុតរដូវទៅហើយ ប៉ុន្តែបង្កងទន្លេនៅមាន ហើយរស់ជាតិឆ្ងាញ់ មិនចាញ់បង្កងធម្មជាតិខេត្តតាកែវ ឡើយ។ បង្កងទន្លេ មានភិនភាគស្រដៀងនឹងបង្កងបឹងដែរ ប៉ុន្តែមិនសូវសំបូរខួរដូចបង្កងបឹងទេ។
ចំពោះបង្កងធម្មជាតិមានតម្លៃចាប់ពី ២០ ដុល្លារទៅជាង ៤០ដុល្លារ។ ប៉ុន្តែបង្កងចិញ្ចឹមវិញមានតម្លៃរង្វង់ ១០ ដុល្លារឡើង។ នេះបើតាមបញ្ជាក់ពី លោក ហេង សំណាង៕