Morata៖ ខ្ញុំមិនសូវទទួលបានការពេញចិត្តពីអ្នកគាំទ្រ និងក្លឹប Chelsea ទេ

2019-06-06 12:50:55
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធអេស្ប៉ាញកីឡាករ Alvaro Morata បានលើកឡើងប្រាប់សារព័ត៌មាន Goal ថា ខ្លួនមិនបានទទួលបានការស្រលាញ់ និងពេញចិត្តដោយអ្នកគាំទ្រ និងខាងក្លឹប Chelsea ទេ ហើយជម្រើសដ៏ល្អបំផុតមានតែមកលេងនៅក្នុងទឹកដីអេស្ប៉ាញជាមួយនឹងក្លឹប Atletico Madrid។

កីឡាកររូបនេះបាននិយាយថា៖ " ខ្ញុំបាត់បង់ភាពជឿជាក់នៅមួយរយៈមុន។ ខ្ញុំមិនសប្បាយចិត្តនឹងមតិរបស់អ្នកមនុស្សក្នុងប្រទេសអង់គ្លេស។ ខ្ញុំគិតថា ពួកគេចាប់កំហុសខ្ញុំគ្រប់យ៉ាង " ។

Morata បានបន្តថា៖ " ខ្ញុំចាប់ផ្ដើមល្អដែរនៅ Chelsea ប៉ុន្តែរបួសបានធ្វើខ្ញុំថមថយទម្រង់លេង។ ទោះអាក្រក់យ៉ាងណាក៏ ខ្ញុំអាចរកបាន ១៥គ្រាប់ ហើយឈ្នះ FA Cup ប៉ុន្តែខ្ញុំអត់បានលេងនៅ World Cup។ វាជារឿងពិបាកបំផុតដែលកើតក្នុងជីវិតរបស់ខ្ញុំ " ។

អតីតខ្សែប្រយុទ្ធ Real Madrid រូបនេះបានបន្ថែមថា៖ " ខ្ញុំស្រមៃថាចង់លេង World Cup តាំងពីខ្ញុំអាយុ ១០ឆ្នាំ ហើយខ្ញុំជ្រើសយក Chelsea ដោយសារខ្ញុំគិតថា វាជាក្លឹបល្អបំផុត ដើម្បីអាចលេងនៅ World Cup តែពេលនេះ ចុះកុងត្រាជាមួយ Atletico ជារឿងល្អបំផុតក្នុងជីវិតរបស់ខ្ញុំ " ។

សូមបញ្ជាក់ផងដែរថា Morata បានមកលេងនៅ Atletico Madrid តាំងពីខែមករា ឆ្នាំ២០១៩ ក្រោមលក្ខខ័ណ្ឌខ្ចីជើងពីក្លឹប Chelsea ហើយកន្លងមកកីឡាកររូបនេះ តែងតែចង់ឲ្យក្លឹបអេស្ប៉ាញមួយនេះ ទិញបណ្ដាច់ពីក្លឹបអង់គ្លេស៕

ប្រភព៖ Goal ប្រែសម្រួល៖ ហ៊ីម រស្មី