ខេម ចាន់ លើកឡើងក្រោយប៉ះគ្នាវគ្គផ្ដាច់ព្រ័ត្រថា ជី ឆៃលី ពិតជាល្អកណ្ដាប់ដៃ និងរស់រវើកមែន

2019-07-09 06:56:57
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងមកពីឆត្រយោង ៩១១ ខេម ចាន់ ថាកីឡាករ ជី ឆៃលី ពិតជាល្អកណ្ដាប់ដៃ និងរស់រវើកមែនសម្រាប់វគ្គផ្ដាច់ព្រ័ត្រពានរង្វាន់ TV5 ធ្វើឲ្យខ្លួនពិបាកយកឈ្នះស្ទើរចេញក្បាច់មិនទាន់។

ខេម ចាន់ ពេលឈ្នះ ជី ឆៃលី

កូនសិស្សលោកគ្រូ ហង់ សឿន ខាងលើនេះបានឲ្យដឹងថា វគ្គផ្ដាច់ព្រ័ត្រយកលេខ១-២ កាលពីថ្ងៃសៅរ៍កន្លងទៅនេះ គឺពិតជាពិបាកមែនទម្រាំអាចឈ្នះពានមួយនេះ។ ជី ឆៃលី ដៃជើងរស់រវើកមែន ប៉ុន្តែដោយសារតែខ្លួនបានហ្វឹកហាត់ត្រៀមបានល្អ គឺបានពង្រឹងកម្លាំងឲ្យខ្លាំងជាងមុន ឲ្យរឹងជាងមុន ដើម្បីទប់ទល់និងកណ្ដាប់ដៃ ជាពិសេសឡាំជង្គង់។

ខេម ចាន់ ពេលឈ្នះពាន TV5

អ្នកប្រដាល់ដើមកំណើតមកពីខេត្តព្រៃវែងរូបនេះបន្ថែមទៀតថា សុំសរសើរកីឡាករ ជី ឆៃលី គឺពិតជាខំប្រឹង និងស៊ូខ្លាំងណាស់ បើទោះជាត្រូវនិងស្នៀតរបស់ខ្លួនច្រើន រួមទាំងបែកឈាមខ្លាំងបែបនេះនៅតែទឹកចិត្តមោះមុតប្រកួត តស៊ូរហូតចប់។ ខេម ចាន់ បញ្ជាក់ទៀតថា ដោយសារតែរូបគេមានប្រៀបជង្គង់ផង និងបានការប្រាប់ពីអ្នកឲ្យទឹកថា «វ៉ៃហើយ ចូលចាប់ឡាំជង្គង់ដឹងតែឈ្នះហើយ» ពេលធ្វើតាមដូចនេះទើបបានឱកាសឈ្នះវគ្គផ្ដាច់ព្រ័ត្រតែម្ដងទៅ។

ខេម ចាន់ និងម្ចាស់ពានដទៃទៀត

រំលឹកដែរថា កីឡាករ ខេម ចាន់ ជាម្ចាស់ពានរង្វាន់ TV5 រដូវកាលទី៥ ទម្ងន់៥៤គីឡូក្រាម ដែលទើបនិងបញ្ចប់កាលពីថ្ងៃសៅរ៍ ទី៦ ខែកក្កដា ២០១៩ ក្រោយរូបគេយកឈ្នះពិន្ទុកីឡាករ ជី ឆៃលី។ ម្ចាស់ពានរង្វាន់លេខ១ បានលើ ខេម ចាន់ លេខ២ បានលើ ជី ឆៃលី លេខ៣ ឡុង ណងសៅ និងលេខ៤ បានលើ លី តក់៕

អត្ថបទ៖ នួន ស៊ីណា