រំលងពីរថ្ងៃក្រោយប្រកាស Note 10 អាចជាថ្ងៃចាប់កំណើតរបស់ HongMeng OS

2019-07-10 01:56:34
ចំនួនមតិ 0 | ចំនួនចែករំលែក 0

ចន្លោះមិនឃើញ

នាអំឡុងខែសីហា ឆ្នាំ ២០១៩ ខាងមុខនេះ សម្រាប់វិស័យបច្ចេកវិទ្យាស្មាតហ្វូនរំពឹងនឹងមានរឿងពីរត្រូវផ្ទុះឡើងផ្ទួនគ្នា ដោយទីមួយទាក់ទិននឹងការចេញផ្សាយ Galaxy Note 10 របស់ Samsung នាថ្ងៃទី ៧ សីហា ស្របពេលរបាយការណ៍ចុងក្រោយក៏ទើបតែបង្ហើបពីកាលបរិច្ឆេទប្រកាសប្រព័ន្ធប្រតិបត្តិ HongMeng OS របស់ Huawei ដែលអាចធ្វើឡើងនៅថ្ងៃទី ៩ សីហា។

OS ជំនាន់ក្រោយ ដែលរុញច្រានឲ្យ Huawei ត្រៀមដកចិត្តចេញពី Android របស់ Google ក៏កំពុងមានអ្នកប្រើប្រាស់ជាច្រើនទន្ទឹងរង់ចាំដោយល្ហិចល្ហៀងថាមានដំណើរការលឿនជាង Android និង iOS ថែមទៀតផង។

ប្រព័ន្ធប្រតិបត្តិនោះនឹងបង្ហាញមុខពិតនៅចំពោះមុខអ្នកចូលរួមដែលជា Developer ជុំវិញសកលោកច្រើនជាង ៥ ០០០ នាក់ រួមបញ្ចូលទាំងដៃគូសហការប្រមាណ ១ ៥០០ ស្ថាប័ន នៅព្រឹត្តិការណ៍ Huawei Global Developer Conference ដែលរាប់បញ្ចូលជាព្រឹត្តិការណ៍ធំបំផុតក្នុងវិស័យឧស្សាហកម្មស្មាតហ្វូនរបស់ប្រទេសចិន។

បញ្ជាក់ថាសម្រាប់ HongMeng OS មិនត្រឹមជាប្រព័ន្ធដំណើរការលើស្មាតហ្វូនមួយមុខនោះទេ ទៀតសោតក៏នឹងអាចគាំទ្រទាំងនៅលើថេបប្លែត កុំព្យូទ័រ ទូរទស្សន៍ឆ្លាតវៃ រថយន្ត និងឧបករណ៍បច្ចេកវិទ្យាជាច្រើនទៀតផងដែរ។