អតីតបេក្ខនារីនិទ្ទេស A ពីររូប ផ្ដាំសិស្សប្អូនថា កុំឲ្យភ័យនៅពេលប្រលង

2019-07-18 01:49:20
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញាថន រតនា បេក្ខនារីនិទ្ទេស A ឆ្នាំ ២០១៨ កត់សម្គាល់ឃើញថា នៅអំឡុងពេលប្រលង បញ្ហាដែលបេក្ខជនប្រឈមខ្លាំងជាងគេ គឺភាពភ័យខ្លាច ដែលបន្លាចពួកគេឲ្យភ្លេចភ្លាំងនូវអ្វីដែលបានរៀនកន្លងមក។ នាងថា ភាពភ័យខ្លាចឲ្យគុណវិបត្តិពីរយ៉ាងដល់បេក្ខជន ទីមួយ ភ្លេចនូវមេរៀន ដែលបានរៀនកន្លងមក ទីពីរ ធ្វើឲ្យអារម្មណ៍មិនស្ងប់ វិលវល់គិតអ្វីក៏មិនចេញ និងមិនដាច់ស្រេច។

ភាពភ័យខ្លាចកើតពី ការមិនទុកចិត្តខ្លួនឯង ខ្វល់ខ្វាយច្រើនពេកពីវិញ្ញាសាប្រលង មិនដឹងថាគេចេញអ្វី រតនាបន្ថែម។

យុវតីរូបនេះបានថ្លែងលើកទឹកចិត្តបេក្ខជន ដែលនឹងត្រូវចូលប្រលងឆ្នាំនេះថា កុំភ័យខ្លាច និងត្រូវមានទំនុកចិត្តលើខ្លួនឯងឲ្យបានខ្ពស់ កុំខ្វល់ខ្វាយ កុំរាយមាយច្រើនពេក។ វិញ្ញាសាដែលចេញមក វាអត់មានអ្វីក្រៅពីក្នុងមេរៀនដែលបានរៀនរួចហើយនោះទេ។

ចំណែកឯ កញ្ញាពេជ្រ ស្រីនីន បេក្ខនារីនិទ្ទេស A ឆ្នាំ ២០១៨ ក៏ថ្លែងស្រដៀងគ្នានេះដែរថា ត្រូវគិតថាខ្លួនឯងធ្វើបាន កុំមានការបារម្ភច្រើនពេក។ ព្រោះមុនប្រលងយើងម្នាក់ៗ សុទ្ធតែខំប្រឹងរំឭកមេរៀនទាំងអស់គ្នា យ៉ាងហោចណាស់ពេលប្រលង បើមានចន្លោះកន្លែងណាមួយ ក៏យើងមានតម្រុយខ្លះដែរ គិតបណ្ដើរ សរសេរបណ្ដើរទៅ ជួនកាលក៏អាចធ្វើឲ្យយើងនឹកឃើញឡើងវិញដែរ។ បើអាល័យតែភ័យក៏ធ្វើអ្វីមិនកើតដែរ។

យោងតាមប្រកាស របស់ក្រសួងអប់រំយុវជន និងកីឡា ការប្រលងមធ្យមសិក្សាទុតិយភូមិ នឹងប្រព្រឹត្តទៅនៅថ្ងៃទី ១៩–២០ ខែកក្កដា ឆ្នាំ ២០១៩ ។

អត្ថបទ៖ ឈិន ធារ៉ាត់