Boy Pakorn ថា មកកម្ពុជា៣លើកហើយ តែមានរឿងមួយធ្វើឲ្យលោកមិនដែលអស់ចិត្តសោះ
- 2019-10-15 03:03:38
- ចំនួនមតិ 0 | ចំនួនចែករំលែក 0
Boy Pakorn ថា មកកម្ពុជា៣លើកហើយ តែមានរឿងមួយធ្វើឲ្យលោកមិនដែលអស់ចិត្តសោះ
ចន្លោះមិនឃើញ
រួមដំណើរជាមួយមិត្តរួមអាជីពម្នាក់ គឺស្រីស្អាត Mint Chilida តារាប្រុសកំពូលរបស់ថៃ Boy Pakorn បានមកដល់ប្រទេសកម្ពុជាជាថ្មីកាលពី២ថ្ងៃមុន ដែលដូចតែលើកមុន គឺលោករមែងកើតមានការមិនអស់ចិត្តមួយរហូត។
នេះជាដំណើរលើកទី៣របស់តារាប្រុសល្បីឈ្មោះរូបនេះ ដោយលោកមកដើម្បីចូលរួមព្រឹត្តិការណ៍ពិព័រណ៌គ្រឿងពេជ្រ Chateau Des Gems ដ៏ធំមួយនៅកម្ពុជា។ នៅក្នុងព្រឹត្តិការណ៍នេះ នៅថ្ងៃទី២ ដែលជាថ្ងៃបញ្ចប់កម្មវិធី លោកបានដើរបង្ហាញម៉ូដ និងបកស្រាយបទចម្រៀងមួយបទយ៉ាងពីរោះ។ ភ្លាមនោះ មិនត្រឹមតែយុវវ័យជាអ្នកគាំទ្រលោកប៉ុណ្ណោះទេ ដែលស្រវាចាប់ដៃលោកសុំថតរូប សូម្បីតែភ្ញៀវកិត្តិយសវ័យកណ្ដាលៗ ក៏ចាប់ឱបលោកដោយក្ដីស្រលាញ់ដែរ។
តបនឹងការគាំទ្រនេះ Boy Pakorn បញ្ជាក់ថាលោក សប្បាយចិត្តខ្លាំងណាស់ចំពោះការគាំទ្រ ហើយនោះជាមូលហេតុដែលលោករមែងទទួលការងារនៅក្នុងប្រទេសកម្ពុជាម្ដងហើយម្ដងទៀត។ ប៉ុន្តែលោកថា ជាមួយគ្នាលោកក៏រមែងសល់នូវចិត្តសោកស្ដាយ ក៏ដូចជាមិនអស់ចិត្តរាល់តែលើកដែរ រាល់បេសកកម្មមកប្រទេសកម្ពុជា។
ការដែលលោកសោកស្ដាយនោះ គឺថា មិនថាលើកណា គឺលោកមានពេលវេលាតិចបំផុតនៅក្នុងប្រទេសនេះ ដោយមកពេលព្រឹកទៅវិញពេលល្ងាច ក៏ព្រោះតែលោកមានកិច្ចការងារច្រើន ដែលមិនអាចឲ្យលោកស្នាក់នៅបានយូរ និងដើរកម្សាន្តទៅកន្លែងមួយល្បីៗមួយចំនួនរបស់កម្ពុជាបានសោះ។
វិលមកដំណើរលើកនេះ ក៏មិនខុសមុនដែរ ព្រោះបានសម្រាកតែមួយយប់ប៉ុណ្ណោះ ក៏ត្រូវត្រលប់ទៅថៃវិញនៅពេលព្រឹកបន្ទាប់។ ដូច្នេះហើយលោកសង្ឃឹមថា បេសកកម្មលើកក្រោយៗ លោកអាចសល់ពេលច្រើនជាងនេះ ដើម្បីបានដើរកម្សាន្តទស្សនាកម្ពុជាផង។
នៅក្នុងព្រឹត្តិការណ៍នោះ ក្រៅពីតារាថៃទាំងប្រុសទាំងស្រី ក៏មានតារាខ្មែរល្បីៗជាច្រើនទៀតក្នុងកម្មវិធីពិព័រណ៌ពេជ្រខាងលើនោះដែរ ក្នុងនោះមាន ដូចជាអ្នកនាង យុគ ចិន្តា និងតារាម៉ូដែលល្បីៗជាច្រើនរូប ដូចជាកញ្ញា ម៉ាក់សែន សូនីតា ជាដើម។ លោកស្រី ម៉ៅ ពោរពេញ អគ្គនាយិកាហាងពេជ្រ Chateau Des Gems បានថ្លែងបញ្ជាក់ថា លោកស្រីមោទកភាពណាស់ ដែលបានបង្កើតព្រឹត្តិការណពិព័រណ៌ពេជ្រដ៏ធំជាលើកទី៦ ក្នុងនោះថែមទាំងអាចនាំតារាថៃល្បី និងតារាខ្មែរល្បីៗអាចមកជួបជុំគ្នាផង។
លោក អះអាងថា នឹងមានព្រឹត្តិការណ៍ពិសេសៗបែបនេះបន្តទៀតនាពេលខាងមុខ ដែលអាចនឹងនាំតារាបរទេសល្បីផ្សេងទៀត មកជួបជុំជាមួយតារាល្បីៗក្នុងស្រុកដើម្បីបង្កើនទំនាក់ទំនងរវាងគ្នា និងបង្ហាញពីសក្ដានុពលទីផ្សារពេជ្ររបស់កម្ពុជាទៅកាន់ពិភពលោកផង៕