យូរី អន់ចង់ ខំសម្រិតសម្រាំងចេញបទថ្មីឲ្យឡូយ បែរជាត្រូវគេរិះគន់ផ្អើលទៅវិញ

2019-12-24 08:49:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ប្រិយមិត្តដែលបានដឹង និងបានស្ដាប់បទថ្មីរបស់តារាចម្រៀងថ្មី "ជិះចាន" របស់តារាចម្រៀងសាន់ដេ កញ្ញា យូរី ហើយ បាន និងកំពុងធ្វើការរិះគន់តារាស្រីយ៉ាងចាស់ដៃទៅវិញ ក្រោយពីបទនេះបានចេញឲ្យប្រិយមិត្តនៅលើបណ្ដាញសង្គមបានស្ដាប់។

ការចាប់ច្បិច យកពាក្យល្បី ឬនិយមលេងលើបណ្ដាញសង្គម គឺជានិន្នាការថ្មីសម្រាប់ការតែងនិពន្ធបទចម្រៀងចេញថ្មីរបស់ផលិតកម្មនានាចាប់តាំងពីប្រមាណ ២ឆ្នាំមុននេះ។ ងាកមកបទចម្រៀងខាងលើនេះ គេឃើញមានពាក្យពេញនិយមខ្លះលើបណ្ដាញសង្គមឆ្នាំនេះ ក្លាយជាគោលរឿងរបស់បទចម្រៀង ក្នុងសូម្បីតែជិះចាន ក៏បានក្លាយជាចំណងជើងបទចម្រៀងដែរ។

ក្រៅពីនេះពាក្យ "Zin2, BC Zin" ជាដើម ត្រូវបានគេស្ដាប់លឺក្នុងបទចម្រៀងរបស់ យូរី ហើយទាំងនេះ ជាអ្វីដែលទស្សនិកជនបាន និងកំពុងធ្វើការរិះគន់បទចម្រៀងខាងលើ។ តាមរយៈបទចម្រៀងខាងលើ ប្រិយមិត្តបានលើកឡើងដោយបង្ហាញពីភាពកម្សោយរបស់អ្នកនិពន្ធ ក្នុងរកពាក្យពេចន៍ឬអត្ថន័យស៊ីជម្រៅសម្រាប់ដាក់ក្នុងបទចម្រៀង ទុកជាការអប់រំដល់ប្រិយមិត្តអ្នកស្ដាប់ជាជាងគ្រាន់តែរើសយកពាក្យពេចន៍ក្នុងបណ្ដាញសង្គមយកមកច្នៃ។

ជាងនេះទៀតសោត ប្រិយមិត្តនៅបានរិះគន់ទៅលើទំនុកភ្លេងបែបបែកស្លុយ រួមទាំងការកាយវិការសម្ដែង ច្រៀងរាំរបស់តួសម្ដែងមួយចំនួនផង ដែលមើលទៅដូចមិនសមរម្យ និងជាគំរូល្អ។ ប្រិយមិត្តមួយចំនួនក្នុងចំណោមនេះ គឺស្នើឲ្យផលិតកម្មគួរផលិតបទបែបចង្វាក់រាំវង់អីវិញប្រសើរជាង។

ជុំវិញបញ្ហានេះ ម្ចាស់បទ កញ្ញា យូរី បានឆ្លើយតបយ៉ាងខ្លីចំពោះករណីខាងលើ។ កញ្ញា លើកឡើងថា នាងបានឃើញហើយពីអ្វីដែលប្រិយមិត្តបានរិះគន់ ប៉ុន្តែនាងថា មិនថ្វីទេ ជាធម្មតាអ្វីក៏ដោយ តែមានអ្នកពេញចិត្តខ្លះ និងមិនពេញចិត្តខ្លះអីចឹងហើយ។ កញ្ញាបន្តទៀតថា កញ្ញាក៏មើលឃើញអ្នកគាំទ្រមិនតិចដែរដែលគាំទ្របទចម្រៀងរបស់ខាងលើ ទន្ទឹមគ្នានឹងការរិះគន់ទាំងឡាយនោះ។

បើទោះជាមានការរិះគន់ ប៉ុន្តែសម្រាប់វីដេអូចម្រៀង "ជិះចាន" របស់ យូរី នេះក៏ទទួលបានចែកចាយយ៉ាងកក្រើកនៅថ្ងៃនេះ ក្នុងនោះ ក្រោយពីចេញកាលពីថ្ងៃអាទិត្យ បទនេះ ត្រូវគេចុច Share ជិត៤ពាន់ដងហើយ។ ខាងក្រោមនេះ គឺជាបទរបស់ យូរី ដែលត្រូវគេរិះគន់ច្រើន!!!

អត្ថបទ៖ ទារិកា