EZECOM ដំឡើងល្បឿនអ៊ីនធឺណិតគុណនឹងពីរដល់អ្នកប្រើ ដើម្បីទប់ទល់នឹងវីរុសកូរ៉ូណា
- 2020-03-24 09:33:47
- ចំនួនមតិ 0 | ចំនួនចែករំលែក 0
EZECOM ដំឡើងល្បឿនអ៊ីនធឺណិតគុណនឹងពីរដល់អ្នកប្រើ ដើម្បីទប់ទល់នឹងវីរុសកូរ៉ូណា
ចន្លោះមិនឃើញ
ក្រុមហ៊ុនអ៊ីនធឺណិត EZECOM បានចេញប្រកាសថា ក្រុមហ៊ុននឹងដំឡើងល្បឿនអ៊ីនធឺណិត ២០០% សម្រាប់អ្នកដែលកំពុងប្រើប្រាស់កញ្ចប់ EzeSurf របស់ខ្លួនដើម្បីជួយពួកគេទទួលបានល្បឿនអ៊ីនធឺណិតកាន់តែលឿនដើម្បីធ្វើការពីគេហដ្ឋាន សំដៅទប់ស្កាត់ការរីករាលដាលនៃវីរុស Covid-19។ អតិថិជនប្រើប្រាស់កញ្ចប់អ៊ីនធឺណិត EzeSurf ទាំងអស់ទទួលបានការដំឡើងល្បឿននេះដោយឥតគិតថ្លៃ និងដោយស្វ័យប្រវត្តិ រហូតដល់ចុងខែមិថុនា។
នេះគឺជាការចូលរួមចំណែកមួយពីសំណាក់ក្រុមហ៊ុន EZECOM ខណៈកម្ពុជាកំពុងរងផលប៉ះពាល់ពីវិបត្តិសកលនៃវីរុសកូរ៉ូណា។ ក្នុងនាមជាក្រុមហ៊ុនផ្គត់ផ្គង់សេវាអ៊ីនធឺណិតដ៏ធំមួយ សកម្មភាពរបស់ EZECOM ពិតជាមានសារសំខាន់ ខណៈក្រុមហ៊ុនធុរកិច្ច និងអ្នកធ្វើការកាន់តែច្រើនជ្រើសរើសធ្វើការពីគេហដ្ឋានរបស់ពួកគេ ដើម្បីជៀសវាងការចម្លងនិងឆ្លងមេរោគ។
យោងតាមសេចក្ដីជូនដំណឹងរបស់ក្រុមហ៊ុន EZECOM ការដំឡើងល្បឿនអ៊ីនធឺណិតដោយឥតគិតថ្លៃនេះ មានគោលបំណងជួយឲ្យអ្នកប្រើប្រាស់អាចធ្វើការងារពីគេហដ្ឋានកាន់តែមានប្រសិទ្ធិភាព ក៏ដូចជារក្សាទំនាក់ទំនងជាមួយក្រុមគ្រួសារ និងមិត្តភក្តិ។ ការដំឡើងល្បឿននឹងត្រូវធ្វើឡើងដោយស្វ័យប្រវត្តិ មានន័យថា អតិថិជនមិនចាំបាច់ទៅការិយាល័យ EZECOM ឬធ្វើអ្វីជាពិសេសនោះទេ។ ការផ្តល់ជូននេះក៏មិនមែនសម្រាប់តែអតិថិជនចាស់នោះទេ ដូច្នេះ អ្នកចុះឈ្មោះថ្មីៗសម្រាប់កញ្ចប់ EzeSurf ក៏ទទួលបានល្បឿនទ្វេដងដូចគ្នាក្នុងអំឡុងពេលផ្តល់ជូននេះផងដែរ។
តាមសេចក្តីជូនដំណឹងដដែលនេះ ក្រុមហ៊ុន EZECOM ក៏លើកទឹកចិត្តឲ្យអតិថិជនរបស់ខ្លួនពិចារណាធ្វើការទូទាត់ប្រាក់ពីតាមអ៊ីនធឺណិត ឬពីចម្ងាយ តាមរយៈដៃគូជាច្រើន ដូចជា Wing ធនាគារ J Trust Royal ធនាគារ ABA ធនាគារ Maybank និងដៃគូដទៃទៀត។ សេចក្តីជូនដំណឹងនោះបានបញ្ជាក់ផងដែរថា ក្រុមហ៊ុន EZECOM នឹងបន្តចាត់សកម្មភាពផ្សេងៗទៀត ដើម្បីចូលរួមចំណែកទប់ទល់នឹងបញ្ហាវីរុស Covid-19 តាមលទ្ធភាពរបស់ពួកគេជាអ្នកផ្តល់សេវាអ៊ីនធឺណិតដ៏ធំមួយនៅកម្ពុជា។
សង្ឃឹមថា នឹងមានអ្នកប្រើប្រាស់ជាច្រើនទទួលបានអត្ថប្រយោជន៍ពីការដំឡើងល្បឿនអ៊ីនធឺណិតនេះ។ សូមបងប្អូនការពារខ្លួនឲ្យបានល្អ ដើម្បីប្រឆាំងនឹងមេរោគកូរ៉ូណា។ សម្រាប់ព័ត៌មានបន្ថែមអំពីក្រុមហ៊ុន សូមចូលទៅគេហទំព័រ ezecom.com.kh ឬហៅទូរសព្ទទៅលេខ ០២៣ ២៣ ៨១ ៨១ និង ០៨៥ ៨៨ ៨១ ៨១៕