ហេតុផលសំខាន់៣ ដែល Harry Kane គួរបន្តនៅ Tottenham
- 2020-04-01 03:40:45
- ចំនួនមតិ 0 | ចំនួនចែករំលែក 0
ហេតុផលសំខាន់៣ ដែល Harry Kane គួរបន្តនៅ Tottenham
ចន្លោះមិនឃើញ
Harry Kane កំពុងស្ថិតនៅដំណាក់កាលព្យាបាលរបួសមិនទាន់ជាសះរបស់ខ្លួនក្រោយសម្រាកក្រៅទីលានអស់រយៈពេលជាច្រើនខែ។
អនាគតរបស់ខ្សែប្រយុទ្ធសញ្ជាតិអង់គ្លេសជាមួយក្លឹបរហស្សនាមមាន់ខ្នាយមាស បានក្លាយជាប្រធានបទក្រៅលើទំព័រសារព័ត៌មានក្រោយរូបគេបង្ហាញអារម្មណ៍ចង់ចាកចេញ ក្រោមមូលហេតុក្លឹបមិនបានឈ្នះពានអ្វីសោះអស់រយៈពេលជាច្រើនឆ្នាំខណៈ Kane បច្ចុប្បន្នក៏មានវ័យ២៧ឆ្នាំហើយដែរ។ យ៉ាងណាមានហេតុផល ៣ដែលអាចឲ្យ Kane ពិចារណានៅ Spurs បន្ត៖
១. លេងក្រោមការដឹកនាំរបស់អ្នកចាត់ការឆ្នើម Jose Mourinho
ក្រោយបណ្ដេញ Pochettino ក្រុម Tottenham បានសម្រេចក្នុងការនាំ Mourinho ទៅដឹកនាំត្រឹមពាក់កណ្ដាលរដូវកាល។ ការមានអ្នកចាត់ការកំពូលមកដឹកនាំដូច្នេះគឺជាឱកាសមាសដើម្បីឲ្យ Kane អភិវឌ្ឍសមត្ថភាពទាំងនៅក្លឹបអាជីព និងជួយក្រុមជម្រើសជាតិតោកំណាចអង់គ្លេសព្រោះរូបគេជាប្រធានក្រុមស្រាប់។
២. ចំណងអនុស្សាវរីយ៍តាំងពីកុមារភាព
អ្នកគាំទ្រគោរពនិងស្រឡាញ់ Harry Kane ខ្លាំងជាងកីឡាករណាទាំងអស់នៅក្នុងក្រុម។ ប្រធានក្រុមអង់គ្លេសរូបនេះចូលរួមជាមួយ Tottenham តាំងពីវ័យ១១ឆ្នាំពោលគឺ១៦ឆ្នាំមកហើយដែលពួកគេមានអនុស្សាវរីយ៍ជាមួយគ្នា។ ទោះមិនទាន់អាចជួយក្លឹបឈ្នះពានអ្វីក៏ដោយតែ Kane បានសាងគេឈ្មោះពិសេសឈ្នះស្បែកជើងមាស Premier League និងនាំ Tottenham ឡើងដល់វគ្គផ្ដាច់ព្រ័ត្រ Champions League ជាប្រវត្តិសាស្ត្រកាលពីឆ្នាំទៅ។
៣. កិច្ចសន្យាដែលមានតម្លៃខ្លួនកប់ពពក
ក្លឹបណាដែលចង់បាន Harry Kane ត្រូវឆ្លងកាត់ឧបសគ្គធំបំផុតគឺតម្លៃខ្លួនកប់ពពករបស់គេ។ ក្នុងកុងត្រាបង្ហាញថាខ្សែប្រយុទ្ធជំនាញជើងស្ដាំរូបនេះអាចបំបែកកំណត់ត្រា២០០លានរបស់ Neymar ផ្ទេរទៅកាន់ Paris Saint Germain ទៅទៀត ដូច្នេះមិនដឹងថាក្លឹបអ្នកមានដូចជា Real Madrid, Barcelona, Bayern Munich ឬក៏ Manchester City ដែលកំពុងចាយលុយលើសកម្រិតនោះ ហ៊ានប្រថុយទិញ Kane ឬក៏អត់ទេ៕