លើកនេះ...យឹម តាស្រង់ ចេញបទពីអ្នកជាប់លុយធនាគារម្ដងមើល៍!

2020-04-03 03:48:42
ចំនួនមតិ 0 | ចំនួនចែករំលែក 0

ចន្លោះមិនឃើញ

"អគុណធនាគារ" គឺជាបទថ្មីមួយទៀតដែលច្រៀងដោយតារាចម្រៀងវ័យក្មេង កញ្ញា តន់ ច័ន្ទសីម៉ា ប្រចាំនៅផលិតកម្ម Galaxy ណាវ៉ាត្រា នឹងចេញនៅលើបណ្ដាញសង្គមយូធូបនារសៀលថ្ងៃទី៣ ខែមេសា នេះ។

ប្រិយមិត្តប្រហែលជាប្លែកក្នុងចិត្ដហើយ នៅពេលដែលឮពាក្យថា "អគុណធនាគារ" ស្របពេលដែលកូនបំណុលរបស់ធនាគារ ឬគ្រឹះស្ថានមីក្រូហិរញ្ញវត្ថុស្ទើរទាំងអស់ កំពុងមានហានិភ័យខ្ពស់ក្នុងការសងត្រឡប់ទៅម្ចាស់បំណុលវិញក្នុងកាលៈទេសៈដែលជំងឺរលាកផ្លូវដង្ហើមកូវីដ-១៩ កំពុងឆ្លងរាតត្បាតជាសកល។

ប៉ុន្តែលោក យឹម តាស្រង់ ដែលជាអ្នកនិពន្ធ និងដឹកនាំថតបទចម្រៀងនេះ និយាយថា អាជីវករ និងពលរដ្ឋភាគច្រើនបានខ្ចីប្រាក់ពីធនាគារ ដើម្បីរកស៊ី ឬយកទៅដោះស្រាយជីវភាពរស់នៅប្រចាំថ្ងៃ ដោយរំពឹងថានឹងយកប្រាក់ខែ ឬថ្លៃឈ្នួលកម្លាំងពលកម្មរបស់ខ្លួនសងត្រឡប់ទៅធនាគារប្រចាំខែវិញជាធម្មតា។ លោកថា បទចម្រៀងដែលចេញស្របពេលជិតដល់ថ្ងៃបុណ្យចូលឆ្នាំ ប្រពៃណីជាតិខ្មែរនេះ ក៏មានបង្កប់អត្ថន័យ និងពាក្យកំប្លុកកំប្លែងដែរ។

អ្នកនិពន្ធប្រចាំផលិតកម្មGalaxy ណាវ៉ាត្រា លោក យឹម តាស្រង់៖"ខ្ញុំសង្កេតឃើញថាយើងម្នាក់ៗជៀសមិនរួចពីជំពាក់ធនាគារដើម្បីវាទៅរកស៊ីនេះរកស៊ីនោះ ហើយយើងភាគច្រើនត្រូវទៅនឹងសាច់រឿងក្នុងបទចម្រៀងហ្នឹង"។

តោះ...ប្រិយមិត្ដចូលស្ដាប់សំឡេង នៃបទចម្រៀងនេះទាំងអស់គ្នា មុននឹងបានទស្សនាទាំងស្រុងនូវបទទាំងស្រុងនៅរសៀលនេះ៖

បទថ្មីៗរបស់ផលិតកម្ម Galaxy ណាវ៉ាត្រា ដែលនិពន្ធ និងដឹកនាំថតដោយលោក យឹម តាស្រង់ ទទួលបានការគាំទ្រច្រើន ជាពិសេសនៅក្នុងស្រទាប់យុវវ័យ។ ដូចជាបទ"ស្រីៗគ្នាយើង" ដែលទើបចេញថ្មីៗនេះជាដើម៕

អត្ថបទ៖ ជិន សុភ័ក្ដ្រ