កុំបារម្ភ! មិនបានទៅវត្ត អ្នកអាចជំនួសដោយ ៣ យ៉ាងនេះបាន

2020-04-13 04:55:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ជារឿងអកុសលមួយដែរ ដែលពិធីបុណ្យចូលឆ្នាំប្រពៃណីជាតិខ្មែរត្រូវបានលើកថ្ងៃឈប់សម្រាក តែនេះគឺជាវិធានការដ៏ប្រសើរមួយ ដើម្បីទប់ស្កាត់នូវការឆ្លងរីករាលដាលនៃជំងឺកូវីដ១៩។ គួរបញ្ជាក់ផងដែរថា ប្រទេសកម្ពុជាបច្ចុប្បន្នពុំមានការបិទវត្តអារាមនៅឡើយទេ ក៏ប៉ុន្ដែពលរដ្ឋគ្រប់រូប រួមទាំងព្រះសង្ឃគ្រប់អង្គនៅតាមទីវត្តអារាម គប្បីចូលរួមអនុវត្តនូវគម្លាតសង្គមឲ្យបានខ្ជាប់ខ្ជួនគ្រប់ពេលវេលា កុំបីមានការប្រហែសឲ្យសោះ។

រីឯប្រជាពលរដ្ឋដែលមិនហ៊ានអញ្ជើញទៅវត្តដើម្បីប្រគេនចង្ហាន់ទៅកាន់ព្រះសង្ឃ ឬ សុំជោគរាសីឆ្នាំថ្មី ពួកគេអាចជំនួសដោយ ៣ យ៉ាងនេះបាន៖

១. ជូនអំណោយដល់អ្នកមានគុណទាំង២

រូបតំណាង

**ឪពុកម្ដាយ** ជាអ្នកមានគុណដ៏ថ្លៃថ្លារបស់យើងគ្រប់គ្នា ដូចនេះការឲ្យជាអំណោយដល់លោកទាំង២ ហាក់បីដូចជាជូនព្រះរស់ដូច្នោះដែរ។ អំណោយដែលស័ក្ដិសមសម្រាប់ជូនអ្នកមានគុណអាចរួមមាន៖ ផ្លែឈើ អាហារបំប៉ន នំអន្សម ភេសជ្ជៈសុខភាព ផ្កា ឬ អាចជូនជាម្ហូបអាហារដែលអ្នកចម្អិនផ្ទាល់ដៃជាដើម ។

២. ធ្វើពិធីស្រង់ព្រះនៅគេហដ្ឋាន

រូបតំណាង

ពិធីស្រង់ព្រះ គឺជាពិធីដែលប្រជាជនខ្មែរច្រើនធ្វើឡើងនៅថ្ងៃទី៣ នៃពិធីបុណ្យចូលឆ្នាំខ្មែរ នៅតាមទី វត្តអារាម។ យ៉ាងណាមិញ គេអាចប្រារព្ធនៅតាមផ្ទះបាន ដោយជំនួសពីការស្រោចទឹកលើព្រះពុទ្ធបដិមា ទៅជាការងូតទឹកជូនអ្នកមានគុណទាំង២ ឬ អ្នកដែលចាស់ទុំជាងគេនៅក្នុងគ្រួសារ។ ការធ្វើបែបនេះ មានន័យថា អ្នកកំពុងស្រោចនូវភាពត្រជាក់ត្រជំដល់អ្នកមានគុណរបស់អ្នក ឬព្រះរស់ ហើយជាលទ្ធផលគាត់នឹងផ្ដល់ជាពរជ័យសិរីសួស្ដី ដល់អ្នកដែលស្រោចទឹកជូនគាត់ដែលជាកូនជាចៅ ឲ្យប្រកបដោយក្ដីសុខរមនា និង ចិត្តស្រស់ស្រាយគ្រប់ពេលវេលា ដូចជាធាតុទឹកដូច្នោះដែរ។

៣. ចែកអំណោយដល់អ្នកមានបន្ទុក ឬ ក្រខ្សត់

រូបតំណាង

ការធ្វើទាន ដល់អ្នកដែលខ្សត់ជាងអ្នកក៏ជាអំពើល្អមួយដែលគួរធ្វើទៅតាមលទ្ធភាពដែលខ្លួនមាន។ អ្នកអាចជូនជា របស់របរប្រើប្រាស់ សំលៀកបំពាក់ ស្បៀងអាហារ ភេសជ្ជៈ ឱសថ ឬ ជាលុយកាក់ ជាដើម។ ក្នុងព្រះពុទ្ធសាសនា គេហៅវាថាជា "ទានមយបុណ្យ" ដែលជាបុណ្យសម្រេចពីការធ្វើទាន គឺការលះបង់ទ្រព្យ ដើម្បីប្រយោជន៍អ្នកដទៃ។ ជាលទ្ធផល អ្នកដែលតែងតែដាក់ទានជួយជនក្រខ្សត់ ចាស់ជរា ជនពិការ ឬ ក្មេងកំព្រាជាដើម នោះនឹងបានទទួលនូវអានិសង្សច្រើនក្រាស់ក្រៃ ទៅតាមទឹកចិត្តរីករាយ និង ជ្រះថ្លានោះផងដែរ៕