កុំឲ្យបែកធ្លាយទាន់ LG ប្រកាសចេញស្មាតហ្វូនថ្មីមុនពេលកំណត់
- 2020-04-28 07:07:32
- ចំនួនមតិ 0 | ចំនួនចែករំលែក 0
កុំឲ្យបែកធ្លាយទាន់ LG ប្រកាសចេញស្មាតហ្វូនថ្មីមុនពេលកំណត់
ចន្លោះមិនឃើញ
កាលពីសប្ដាហ៍មុន LG បានប្រាប់ឲ្យដឹងថាខ្លួននឹងបង្ហាញចេញនូវត្រកូលស្មាតហ្វូនថ្មីឈ្មោះ Velvet នាថ្ងៃទី ៧ ខែឧសភា ខាងមុខ តាមរយៈកម្មវិធីអនឡាញ។ ប៉ុន្តែគួរឲ្យភ្ញាក់ផ្អើល ដោយ LG បានប្រកាសចេញស្មាតហ្វូនលំដាប់ថវិការបស់ខ្លួននាថ្ងៃនេះជាផ្លូវការ និងបញ្ជាក់ថានឹងលក់នៅកូរ៉េខាងត្បូងចាប់ពីថ្ងៃទី ១៥ ខែឧសភា។
LG Velvet មានបំពាក់មកជាមួយនូវអេក្រង់ Cinema FullVision ទំហំ ៦,៨អ៊ីញ។ ចំពោះការឌីហ្សាញវិញ LG បានប្រើប្រាស់នូវរចនាបថកាមេរ៉ាដំណក់ទឹកភ្លៀង និង Symmetrical Ellipse។ រចនាបថកាមេរ៉ាតំណក់ទឹកភ្លៀងគឺសំដៅដល់ការតម្រៀបកាមេរ៉ានៅផ្នែកខាងក្រោយ ដែលមើលទៅដូចតំណក់ទឹក។ ចំណែក Symmetrical Ellipse គឺសំដៅដល់រាងមូលទ្រវែងរបស់ស្មាតហ្វូនត្រកូលថ្មីនេះ។
កាមេរ៉ា ៣ គ្រាប់ខាងក្រោយគឺមានកាមេរ៉ាមេទំហំ ៤៨MP, កាមេរ៉ា Ultra-Wide ទំហំ ៨MP និងកាមេរ៉ាវាស់ជម្រៅទំហំ ៥MP។ LG Velvet គឺមានគាំទ្រមុខងារមួយឈ្មោះថា Voice Out Focus ដែលអាចឲ្យអ្នកប្រើប្រាស់បំបាត់នូវសំឡេងរំខាននៃ Background ពេលថតវីដេអូបាន។
វាដំណើរការដោយបន្ទះឈីប Snapdragon 765 ដែលមានន័យថាមានគាំទ្រនូវសេវា 5G ហើយបន្ទះឈីបនេះមានមកជាមួយនូវបច្ចេកវិទ្យា Quick Charge 3+ ដែល Qualcomm ទើបបង្ហាញចេញថ្មីៗ អាចសាកថ្មពី ០% ដល់ ៥០% ក្នុងពេលត្រឹម ១៥នាទី។
LG Velvet មានបំពាក់ថ្មទំហំ ៤៣០០ mAh ហើយសម្រាប់អង្គផ្ទុកនិង RAM ក្រុមហ៊ុនមិនបានប្រាប់ឲ្យដឹងឡើយ។ ប៉ុន្តែការចេញផ្សាយកន្លងមកបានឲ្យដឹងថា LG Velvet នឹងមាន RAM ទំហំ ៨GB និងអង្គផ្ទុកទំហំ ១២៨GB អាចពង្រីកទំហំបានតាមមេមូរីកាត។
ត្បិតថាបានប្រកាសពីថ្ងៃចេញលក់មែន ប៉ុន្តែ LG មិនបានប្រាប់អំពីតម្លៃនោះទេ។ LG អាចនឹងប្រាប់ព័ត៌មានលម្អិតបន្ថែមអំពី LG Velvet នាថ្ងៃទី ៧ ខែឧសភាខាងមុខ៕