សម័យឥឡូវថត១រឿងអស់រាប់ម៉ឺន ខ្លះដល់លានដុល្លារ តែទសវត្សរ៍ ៦០ វិញ ១រឿងអស់តែប៉ុន្មានម៉ឺនរៀលទេ
- 2020-04-29 08:55:45
- ចំនួនមតិ 0 | ចំនួនចែករំលែក 0
សម័យឥឡូវថត១រឿងអស់រាប់ម៉ឺន ខ្លះដល់លានដុល្លារ តែទសវត្សរ៍ ៦០ វិញ ១រឿងអស់តែប៉ុន្មានម៉ឺនរៀលទេ
ចន្លោះមិនឃើញ
ទុនសម្រាប់ផលិតករសម័យបច្ចុប្បន្ន ប្រើប្រាស់ក្នុងការផលិតខ្សែភាពយន្តមួយរឿង ជាមធ្យមត្រូវការប្រមាណ ២-៣ ម៉ឺនដុល្លារ ហើយខ្ពស់បំផុតមានជាង១លានដុល្លារ ក៏ប៉ុន្តែសម្រាប់ទសវត្សរ៍ទី ៦០ ផលិតករប្រើទុនមិនដល់ ១០០ដុល្លារផង។
តាមផលិតករជើងចាស់ល្បីឈ្មោះជំនាន់ទសវត្សរ៍ទី ៦០ លោក លី ប៊ុនយីម បានឲ្យដឹងថា កាលជំនាន់លោក ដើម្បីផលិតរឿងបានមួយរឿង ត្រូវចំណាយប្រមាណជា ២០-៣០ម៉ឺនរៀលប៉ុណ្ណោះ។ "២០ ទៅ ៣០ម៉ឺនរៀលហ្នឹងសម្រាប់រឿងតូចតាចទេ តែបើរឿងធំវិញយើងអាចចាយទុនដល់ ជាង១លានរៀលក៏មាន"។
ខ្សែភាពយន្តនាំឱ្យផលិតករជើងចាស់ខាងលើល្បីឈ្មោះមកទល់បច្ចុប្បន្នដែលប្រើទុនត្រឹម ២០ទៅ ៣០ម៉ឺនរៀលខ្មែរមានដូចជារឿង "អនអើយស្រីអន" រឿង "សព្វសិទិ្ធ" និង រឿង "ពុទ្ធិសែននាងកង្រី" ជាដើម។ លោក លី ប៊ុនយីម បន្តថាកត្តានាំឱ្យខ្សែភាពយន្តទសវត្សរ៍៦០ ប្រើប្រាស់ថវិកាតិចតួចដូច្នេះ ដោយសារតែជំនាន់នោះ តួសម្ដែងមិនសូវជាស៊ីថ្លៃ ហើយមានពេលខ្លះគឺផលិតករ និងតារាសម្ដែងសហការគ្នាក្នុងការផលិតដោយមិនគិតពីកម្រៃ។
ទោះជាយ៉ាងណាក៏ដោយផលិតករមានប្រភពពីខេត្ត កំពង់ចាមរូបនេះ អះអាងការចំណាយក្នុងការផលិតខ្សែភាពយន្តទសវត្សរ៍៦០ និងសម័យបច្ចុប្បន្នមិនអាចយកមកប្រៀបធៀបគ្នាបានទេ។ មិនអាចប្រៀបធៀបបានដោយសារតែខុសសម័យគ្នា ហើយការប្រើប្រាស់ឧបករណ៍ក៏ខុសគ្នាដែរ។ ជារួមសេដ្ឋកិច្ចខុសគ្នា ដូច្នេះហើយតម្លៃគឺត្រូវតែខុសគ្នាតែម្ដង។
ដោយឡែកផលិតករជើងចាស់មួយរូបទៀតជំនាន់ទសវត្សរ៍៦០ដែរ ដែលបច្ចុប្បន្នជារដ្ឋលេខាធិការ ក្រសួងព័ត៌មាន ឯកឧត្ដម ម៉ៅ អាយុទ្ធ បាននិយាយថា ដោយសារលុយរៀលជំនាន់នោះថ្លៃធ្វើឱ្យការផលិតរឿងចំណាយលុយតិច។ឯកឧត្ដម ម៉ៅ អាយុទ្ធ បានបញ្ជាក់ថា៖"ខ្ញុំមិនច្បាស់ទេអារឿងចំណាយ ព្រោះយូរដែរហើយ តែបើខ្ញុំស្មានមើលមិនច្រើនអីទេ ២០ម៉ឺនរៀលអីហ្នឹងក្នុងមួយរឿង"។
បើទោះតម្លៃនៃការផលិតហាក់ទាប ប៉ុន្តែតាមផលិតករជើងចាស់ ឲ្យដឹងថា គុណភាពជំនាន់នោះ គឺខ្ពស់ណាស់។ លោក លី ប៊ុនយីម ថ្លែងថា៖"ចំណាយតិចមែន ប៉ុន្តែរឿងពេលនោះផលិតមានគុណភាពណាស់ ហើយទស្សនិកជនខ្លះ៥ទៅ៦ដងក៏មានដែរ ដោយមិនមានភាពធុញទ្រាន់ទេ ហើយខ្សែភាពយន្តដាក់តាមរោងវិញ រយៈមួយខែហើយក៏នៅតែមានមនុស្សចូលទស្សនាទៀត"៕