មេរោគ Android ថ្មីអាចលួចយកលេខសម្ងាត់កម្មវិធីធនាគារលើទូរសព្ទ
- 2020-05-05 03:20:08
- ចំនួនមតិ 0 | ចំនួនចែករំលែក 0
មេរោគ Android ថ្មីអាចលួចយកលេខសម្ងាត់កម្មវិធីធនាគារលើទូរសព្ទ
ចន្លោះមិនឃើញ
ក្រុមសុវត្ថិភាពលើអ៊ីនធឺណិត Cybereason Noctornus កំពុងធ្វើការស៊ើបអង្កេតលើ EventBot ដែលជាមេរោគប្រភេទថ្មីមួយលើស្មាតហ្វូន Android បានលេចមុខអំឡុងខែមីនាឆ្នាំ ២០២០។
EventBot គឺជាមេរោគ Mobile Banking (ធនាគារលើទូរសព្ទដៃ) និងជាអ្នកលួចយកព័ត៌មាន ដែលអាចលួចយកទិន្នន័យរបស់អ្នកប្រើប្រាស់ពីកម្មវិធីហិរញ្ញវត្ថុ អាចចូលអានសារ SMS របស់អ្នកប្រើប្រាស់ និងលួចយកសារ SMS ដែលអាចឲ្យវាទម្លុះប្រព័ន្ធសុវត្ថិភាព Two-Factor Authentication បាន។
EventBot នេះដាក់គោលដៅវាយប្រហារកម្មវិធីហិរញ្ញវត្ថុជាង ២០០ប្រភេទខុសៗគ្នា រួមមានកម្មវិធីធនាគារ, កម្មវិធីផ្ទេរប្រាក់ និងកម្មវិធីរូបិយប័ណ្ណអេឡិចត្រូនិក (Crypto-Currency) ជាដើម។ កម្មវិធីដែលជាមុខសញ្ញាមានដូចជា PayPal Business, Revolut, Barclays, UniCredit, CapitalOne UK, HSBC UK, Santander UK, TransferWise, Coinbase និង paysafecard ជាដើម។
EventBot នេះគួរឲ្យចាប់អារម្មណ៍ដោយសារវាទើបតែមានថ្មីថ្មោង។ មេរោគថ្មីនេះដែរគឺមានសក្ដានុពលអាចក្លាយជាមេរោគទូរសព្ទដ៏ធំមួយ ដោយសារតែវាមានការអភិវឌ្ឍឲ្យល្អប្រសើរជាទៀងទាត់។
Cybereason Noctornus បានធ្វើការណែនាំ ៦ ចំណុចដើម្បីអាចជៀសផុតពីមេរោគថ្មីនេះបាន ៖
ត្រូវអាប់ដេតទូរសព្ទទៅកាន់ជំនាន់ចុងក្រោយនៃប្រព័ន្ធប្រតិបត្តិការ។
ត្រូវដំណើរការមុខងារ Google Play Protect ជាប់។
មិនត្រូវទាញយកកម្មវិធីពីប្រភពដែលមិនច្បាស់លាស់ មិនមានការទទួលស្គាល់ផ្លូវការ។ កម្មវិធី Android ដែលត្រឹមត្រូវតាមច្បាប់ភាគច្រើនគឺមានតែនៅលើ Google Play Store ប៉ុណ្ណោះ។
ត្រូវធ្វើការគិតគូរឲ្យច្បាស់លាស់ នៅពេលផ្ដល់សិទ្ធដល់កម្មវិធីណាមួយ។
នៅពេលកើតមានការសង្ស័យ អ្នកអាចឆែកមើលមេរោគនៃ File APK តាមរយៈវិបសាយដូចជា VirusTotal មុនការដំឡើងវាលើទូរសព្ទ។
ប្រើប្រាស់កម្មវិធីការពារការវាយប្រហារលើទូរសព្ទ ដើម្បីពង្រឹងសុវត្ថិភាពឲ្យកាន់តែខ្ពស់៕