យី ប៊ុនហេង បង្ហើបពីខ្សែការពាររឹងមាំបួនរូបដែលគេចង់លេងជាមួយ

2020-05-05 04:12:40
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាំទីរបស់ក្លឹបបាល់ទាត់ Angkor Tiger យី ប៊ុនហេង បានបង្ហើបពីខ្សែការពាររឹងមាំបួនរូបគេចង់លេងជាមួយ បន្ទាប់ពីខ្សែការពារជាមិត្តរួមក្រុមរបស់គេ។

រូបភាពផ្ដល់ដោយយី ប៊ុនហេង

ខ្សែការពារទាំងនោះរួមមាន សឿយ វិសាល, សារ៉េត គ្រីយ៉ា, នេន សុធារ័ត្ន របស់ព្រះខ័នរាជស្វាយរៀង និង អ៊ុក សុវណ្ណ របស់ក្លឹបបាល់ទាត់វិសាខា។

អ្នកចាំទីវ័យ២០ឆ្នាំ បានលើកឡើងថា ៖«បើសិនជានៅក្នុងក្លឹបគឺខ្ញុំ ចង់និយាយថាការពាររបស់ខ្ញុំ គឺខ្ញុំពេញចិត្តលេងនឹងគាត់ តែបើឱ្យរើសក្រៅខ្ញុំ ខ្ញុំចូលចិត្តវិសាល សារ៉េតគ្រីយ៉ា បងរ័ត្ន និងបងអ៊ុក សុវណ្ណ»។

អតីតអ្នកចាំទីម្ចាស់ជើងឯកលីគកំពូលកម្ពុជា ២សម័យកាល ព្រះខ័នរាជស្វាយរៀង បានមើលឃើញពួកគេទាំងបួននាក់ មានទម្រង់លេងល្អ ច្បាស់ រឹងមាំ និងឡើងចុះបានលឿន។

ប៊ុនហេង បន្តថា ៖«បើខ្ញុំរៀបខ្ញុំដាក់បងសាល ព្រោះអីបងសាលគាត់មាំ បងរ័ត្នកណ្ដាលគាត់មាំ និងប៉ិនបាញ់បាល់ សារ៉េតគ្រីយ៉ាង គាត់ឡើងចុះលឿន ហើយការពារខ្លាំងប្រយុទ្ធខ្លាំង បងអ៊ុកសុវណ្ណនៅវិសាខា គាត់ឡើងចុះលឿនដូចគ្នា ពួកគាត់សុទ្ធតែកម្លាំងៗ។ ស្លាបពីរហ្នឹងខ្ញុំដាក់ការពារប្រយុទ្ធ»។

យី ប៊ុនហេង ចាប់ផ្ដើមប្រឡូកអាជីពបាល់ទាត់ដំបូងនៅក្លឹបព្រះខ័នរាជស្វាយរៀង ក្នុងឆ្នាំ២០១៨ជុំទី២ និងលេងឱ្យ Angkor Tiger នៅឆ្នាំ២០១៩ រហូតដល់បច្ចុប្បន្ន៕