Pochettino ទាមទារយក Coutinho បើកាន់ការងារនៅ Newcastle

2020-05-05 05:38:02
ចំនួនមតិ 0 | ចំនួនចែករំលែក 0

ចន្លោះមិនឃើញ

ផ្អែកតាមសារព័ត៌មាន The Sun អតីតគ្រូបង្វឹក Tottenham លោក Pochettino បានស្នើសុំចុះកុងត្រាយក Phinlippe Coutinho និងកីឡាករកំពូលៗផ្សេងទៀត បើបានការងារនៅក្លឹបសារិកាព្រៃ Newcastle របស់ព្រះអង្គម្ចាស់ Mohammed bin Salman។

ចំណែកសារព័ត៌មាន Mundo Deportivo ក៏បានឱ្យដឹងដូចគ្នា Pochettino ចង់បានកីឡាករ Barcelona កំពុងលេងនៅ Bayern បើសិនលោកកាន់ការងារនៅកីឡដ្ឋាន St James’ Park។ មិនតែប៉ុណ្ណោះប្រភពបន្តថា អតីតកីឡាករ PSG ក៏ធ្លាប់ចង់ខ្ចីជើង កីឡាករប្រេស៊ីលដែរ អំឡុងលោកកាន់ជាគ្រូបង្វឹកនៅក្លឹបមាន់ខ្នាយមាស ប៉ុន្តែត្រូវបានបដិសេធន៍ដោយប្រធានក្លឹប Daniel Levy។

Pochettino និងអតីតកីឡាករ Liverpool បានធ្វើការជាមួយគ្នា ពេលខ្សែប្រយុទ្ធជម្រើសជាតិប្រេស៊ីល ចំណាយពេលនៅ Espanyol ក្នុងលក្ខខណ្ឌខ្ចីជើងជុំទី២រដូវកាលឆ្នាំ ២០១១-២០១២។

Coutinho បច្ចុប្បន្នត្រូវបាន Barcelona ឱ្យ Bayern Munic ខ្ចីជើងមួយរដូវកាល ជាមួយជម្រើសទិញផ្ដាច់ ខណៈកុងត្រារបស់គេនឹងបញ្ចប់នៅរដូវកាលនេះ។ Coutinho បានចេញពី Liverpool មកកាន់ទឹកដី Camp Nou កាលពីឆ្នាំ២០១៨ ក្នុងតម្លៃខ្លួន១៤២លានផោន។

ទោះបីជាយ៉ាងណាអតីតកីឡាករ Newcastle ម្នាក់គឺ Temuri Ketsbaia បានព្រមានម្ចាស់ក្លឹបថ្មីថា បើចង់បានកីឡាករល្អៗមកចូលរួមក្រុម ពួកគេនឹងត្រូវចំណាយលុយទ្វេគុណ ជាក់ស្ដែងដូចជា Coutinho ជាដើម ខណៈតម្លៃខ្លួនផ្ដាច់កុងត្រារបស់គេក៏មិនតិចដែរ។

ទោះបីជាយ៉ាងណា មិនទាន់មានព័ត៌មានច្បាស់ការណាមួយថា គ្រូបង្វឹកសញ្ជាតិអាហ្សង់ទីន នឹងទទួលការងារជាគ្រូនៅ Newcasalte ឬយ៉ាងណាទេ សម្រាប់ព័ត៌មានបន្ទាប់ Sabay នឹងធ្វើបច្ចុប្បន្នភាពជូន។

លោក Mauricio Pochettino ត្រូវបានគេភ្ជាប់ទៅដឹកនាំក្លឹបសារិកាព្រៃ កាលពីពេលថ្មីៗនេះ បន្ទាប់ពីលោកត្រូវបានក្លឹបមាន់ខ្នាយមាស Spurs បណ្ដេញចេញពីតំណែង កាលពីឆ្នាំ២០១៩។ បើទៅដឹកនាំ Newcasalts ពិតមែននោះ លោកនឹងបាន ២២លានអឺរ៉ូក្នុងមួយឆ្នាំ ជាគ្រូបង្វឹកទទួលបានថ្លៃពលកម្មថ្លៃមួយរូបក្នុងពិភពបាល់ទាត់៕

ប្រភព៖ Marca ប្រែសម្រួល៖ អ៊ុំ សុភក្តិ