ក្រោយស្ងាត់ ២១ថ្ងៃ! វៀតណាមមានអ្នកឆ្លងវីរុសកូរ៉ូណាថ្មី ១៧នាក់ឡើងវិញ

2020-05-08 06:49:01
ចំនួនមតិ 0 | ចំនួនចែករំលែក 0

ចន្លោះមិនឃើញ

រដ្ឋាភិបាលវៀតណាម បានរកឃើញអ្នកឆ្លងថ្មីនៃវីរុសកូវីដ១៩ចំនួន ១៧នាក់កាលពីល្ងាចថ្ងៃព្រហស្បតិ៍កន្លងទៅដែលនាំឲ្យចំនួនសរុបក្នុងប្រទេសនេះឡើងដល់ ២៨៨នាក់។

យោងតាមអាជ្ញាធរឲ្យដឹងថា អ្នកឆ្លងថ្មីចំនួន ១៧នាក់ គឺជាក្រុមជនជាតិវៀតណាមសរុប ២៩៧នាក់ដែលធ្វើមាតុភូមិនិវត្តន៍មកពីសហព័ន្ធអារ៉ាប់រួម។ ពួកគេបានធ្វើដំណើរតាមជើងហោះហើរលេខ VN0099 និងបានចុះចតនៅខេត្តកាន់ថឺ។ ក្នុងចំណោមអ្នកឆ្លងថ្មីទាំងអស់មានប្រុស ៦នាក់ ស្រី ១១នាក់ និងក្មេងទើបកើតម្នាក់ និងមានអាយុចាប់ពី ២០ ដល់៥៨ឆ្នាំ។ ពួកគេត្រូវបានដាក់ឲ្យនៅដោយឡែកនៅបន្ទប់នៃសកលវិទ្យាល័យក្នុងខេត្ត Bac Lieu ដោយក្រុមអ្នកធ្វើការលើយន្ដហោះក៏ត្រូវបានដាក់ឲ្យនៅដោយឡែកផងដែរ។ ឥឡូវនេះអ្នកឆ្លងថ្មីទាំង ១៧នាក់ កំពុងសម្រាប់ព្យាបាលនៅមន្ទីរពេទ្យ Bac Lieu។

គួរបញ្ជាក់ថា ករណីឆ្លងថ្មីនេះ បានបញ្ចប់កំណត់ត្រាគ្មានករណីថ្មីសោះក្នុងប្រទេសអស់រយៈពេល ២១ថ្ងៃ ហើយអាជ្ញាធរចាប់ផ្ដើមរឹងបន្ដឹងការធ្វើដំណើរមកពីបរទេស៕

ប្រភព៖ vnexpress ប្រែសម្រួល៖ រ័ត្ន