គ្រូចាំទី U15 វិសាខា ហែម ស៊ីម៉ៃ សប្បាយចិត្តពេល យី ប៊ុនហេង ឡើងដៃនៅអង្គរថាយហ្គឺរ
- 2020-05-20 08:36:16
- ចំនួនមតិ 0 | ចំនួនចែករំលែក 0
គ្រូចាំទី U15 វិសាខា ហែម ស៊ីម៉ៃ សប្បាយចិត្តពេល យី ប៊ុនហេង ឡើងដៃនៅអង្គរថាយហ្គឺរ
ចន្លោះមិនឃើញ
គ្រូចាំទី U15ក្លឹបបាល់ទាត់វិសាខា ហែម ស៊ីម៉ៃ បានបង្ហាញអារម្មណ៍សប្បាយចិត្ត ពេលឃើញសិស្សប្អូន យី ប៊ុនហេង បានជាប់ជម្រើស១១នាក់គ្រប់ការប្រកួតរបស់អង្គរថាយហ្គឺរ ក្នុងការប្រកួតដណ្ដើមពានរង្វាន់លីគកំពូលកម្ពុជា ក្រោយរូបគេប្រកាសចូលនិវត្តន៍ជាផ្លូវការ ពីក្លឹបមានមូលដ្ឋាននៅខេត្តសៀមរាបមួយនេះ។
ហែម ស៊ីម៉ៃ សង្ឃឹម រៀបរាប់លំអិតថា ៖«ចំពោះខ្ញុំ ខ្ញុំសប្បាយចិត្ត ពីព្រោះអី យី ប៊ុនហេង បើនិយាយទៅគាត់ជាអតីតកូនសិស្សរបស់ខ្ញុំដែរ នៅពេលដែលខ្ញុំនៅភ្នំពេញ ខ្ញុំបង្វឹកក្លឹបមិនមែនអាជីពមួយ ពេលគាត់ចេញពីបាទី ខ្ញុំយកគាត់មកលេងក្រុមហ្នឹង ហើយក៏ខ្ញុំបាននាំគាត់ទៅដល់ថាយហ្គឺរ...ខ្ញុំក៏សប្បាយចិត្តដែរ សម្រាប់យុវជនម្នាក់ ដែលគេមិនសូវស្គាល់ បែរជាគាត់មានឈ្មោះបោះសំឡេងនៅក្នុងឆ្នាំនេះ ហើយជំនួសដៃទី១របស់ខ្ញុំបាន ខ្ញុំសប្បាយចិត្ត ព្រោះគាត់ជួយក្រុមចាស់ខ្ញុំបានល្អ ខ្ញុំសង្ឃឹមថាគាត់នឹងបន្តធ្វើអ៊ីចឹងបានរហូត»។
ទោះបីជាយ៉ាងណា ហែម ស៊ីម៉ៃ ក៏សង្ឃឹមដែរថា ហ៊ុនហេង នឹងខិតខំប្រឹងប្រែងបន្តទៀត ដោយមិនគួរភ្លេចខ្លួនពេលកំពុងឡើងកូដ ដ្បិតក្នុងវិស័យបាល់ទាត់អ្វីៗក៏អាចកើតមានឡើង។
អតីតសមាជិកបៀលប្រាយយូណាយធីត បញ្ជាក់បន្ថែម ៖«សូមឱ្យយុវជនទាំងអស់ ត្រូវតែតស៊ូព្យាយាម បើចង់ក្លាយខ្លួនជាអ្នកចាំទីឬតួនាទីអ្វីមួយក៏ដោយ ត្រូវតស៊ូព្យាយាម ត្រូវមានគោលដៅ កុំស្រលាញ់តែមួយភ្លែត ហើយបោះបង់ចោល នោះជាបរាជ័យរបស់មនុស្សហើយ»។
ហែម ស៊ីម៉ៃ បានព្យួរស្រោមដៃពីក្លឹបអង្គរថាយហ្គឺរ មកធ្វើជាគ្រូចាំទី U15 របស់ក្លឹបបាល់ទាត់វិសាខានៅខែធ្នូ ឆ្នាំ២០១៩។ គេចាប់អាជីពបាល់ទាត់នៅអំឡុងឆ្នាំ២០០៦ ដោយធ្លាប់លេងឲ្យបៀលប្រាយយូណាយធីត, គិរីវង់សុខសែនជ័យ និងខេមបូឌានថាយហ្គឺរដែលបច្ចុប្បន្ន គឺអង្គរថាយហ្គឺរ៕