ស្ថានទូតខ្មែរនៅអាមេរិកឲ្យពលរដ្ឋប្រយ័ត្នរលកបាតុកម្មហិង្សាក្រោយហាងខ្មែរមួយចំនួនត្រូវបំផ្លាញ

2020-06-02 06:29:53
ចំនួនមតិ 0 | ចំនួនចែករំលែក 0

ចន្លោះមិនឃើញ

ស្ថានទូតព្រះរាជាណាចក្រកម្ពុជាប្រចាំនៅសហរដ្ឋអាមេរិកបានចេញសេចក្ដីថ្លែងការណ៍តាមរយៈបណ្ដាញសង្គម Facebook ឲ្យពលរដ្ឋខ្មែរនៅទីនោះមានការប្រុងប្រយ័ត្នខ្ពស់ចំពោះរលកបាតុកម្មបែបហិង្សា។

សេចក្ដីជូនដំណឹងនោះមានខ្លឹមសារថា ស្ថានឯកអគ្គរាជទូតកម្ពុជា ប្រចាំសហរដ្ឋអាមេរិក បានអំពាវនាវដល់ប្រជាពលរដ្ឋខ្មែរដែលកំពុងរស់នៅ និងសិក្សារៀនសូត្រនៅសហរដ្ឋអាមេរិក ស្ថិតនៅឱ្យឆ្ងាយពីការជួបជុំ ឬប្រមូលផ្តុំនានា ទោះបីក្រោមរូបភាព ឬមូលហេតុអ្វីក៏ដោយ។

ស្ថានឯកអគ្គរាជទូត ក៏បានអំពាវនាវឱ្យកាត់បន្ថយការចេញទៅក្រៅដើម្បីគេចផុតពីហានិភ័យ ឬគ្រោះថ្នាក់ ដែលអាចបណ្ដាលមកពីការធ្វើបាតុកម្មតវ៉ានានា ដែលកំពុងរីករាលដាល និងមានភាពហិង្សានៅតាមបណ្ដារដ្ឋនានានៅសហរដ្ឋអាមេរិក។

គួរបញ្ជាក់ថា ទ្រព្យសម្បត្តិ ព្រមទាំងអាជីវកម្មមួយចំនួនរបស់ពលរដ្ឋខ្មែរនៅទីក្រុងឡុងប៊ិច បានរងការបំផ្លិចបំផ្លាញ ដោយសារបាតុកម្មបែបហិង្សា ជ្រកក្រោមពាក្យទាមទារយុត្តិធម៌របស់ក្រុមអ្នកតវ៉ា ក្រោយជនជាតិស្បែកខ្មៅម្នាក់ឈ្មោះ ចច ផ្លយ ត្រូវប៉ូលិសធ្វើឲ្យស្លាប់ ដោយយកជង្គង់សង្កត់.កនៅរដ្ឋហ្វីឡាដែលហ្វៀ ព្រោះចាយក្រដាស២០ដុល្លារក្លែងក្លាយ៕