សូ ដានីតា ឆ្លុះបង្ហាញពីការប្រើពាក្យ "idol” នៅស្រុកយើង និងនៅស្រុកគេ បានដឹងថាខុសគ្នាដាច់ប៉ិត
- 2020-06-12 03:48:01
- ចំនួនមតិ 0 | ចំនួនចែករំលែក 0
សូ ដានីតា ឆ្លុះបង្ហាញពីការប្រើពាក្យ "idol” នៅស្រុកយើង និងនៅស្រុកគេ បានដឹងថាខុសគ្នាដាច់ប៉ិត
ចន្លោះមិនឃើញ
នៅព្រឹកនេះតារាស្រី សូ ដានីតា បានចេញមុខមកវែងញែក អំពីការប្រើពាក្យ "idol” នៅក្នុងសង្គមសិល្បៈខ្មែរ និងនៅបរទេសដែលមានអត្ថន័យមិនដូចគ្នា ពោលគឺនៅយើងការប្រើពាក្យនេះហាក់ដូចជាងាយពេក។
និយាយពីបញ្ហានេះ សូ ដានីតា ដំបូងឡើយ បានសំដៅទៅលើបញ្ហាដែលបាន និងកំពុងកើតមាននាពេលបច្ចុប្បន្ន ដែលដើមឡើយ សិល្បករមួយៗទម្រាំមានកេរ្តិ៍ឈ្មោះ មានគេស្គាល់គឺត្រូវហាត់រៀនច្រើនទាំងការសម្ដែង ការច្រៀង និងរាំជាដើម ទម្រាំបានលទ្ធផលគឺចំណាយពេល១០-២០ឆ្នាំ ហើយខ្លះទៀតខំចង់ងាប់ខ្លួនទៀត មិនទាន់បានល្បីមានគេស្គាល់ផង ប៉ុន្តែសម័យបច្ចុប្បន្ននេះ គឺផ្ទុយស្រឡះ។
នាងថ្លែងថា "ខ្ញុំឈរជើងជិត២០ឆ្នាំក្នុងសិល្បៈ ទម្រាំបងប្អូនស្គាល់ ហើយអ្នកខ្លះស្គាល់មិនច្បាស់ផងតែឥឡូវវិញ គ្រាន់តែលេង តិតុក ធ្វើមាត់តាមគេច្រើន ធ្វើចរិតកំប្លែងតាមសំឡេងអ្នកកំប្លែង រឹថតក្លិបវិដេអូឆ្កួតៗ មើលមិនយល់ មិនដឹងថាចង់និយាយពីអី ក៏ល្បីៗចង់ផ្ទុះ phoneហើយម្នាក់ៗ ហើយចេញមុខថា ខ្ញុំជាអ្នកសិល្បៈល្បីក្នុងសិល្បៈដែរ!តែខ្ញុំកំពុងចង់សួរថា ល្បីក្នុងផ្នែកអីដែរក្នុងសិល្បៈហ្នឹង...?”។
ចំណុចនេះមួយផ្នែក សូ ដានីតា បានបន្ទោសអ្នកល្បីដោយផ្ទាល់ ឯមួយផ្នែកទៀត នាងបានបន្ទោសអ្នកគាំទ្រខ្លះ ដែលខ្វះការស៊ីជម្រៅក្នុងការជ្រើសរើសមនុស្សសម្រាប់គាំទ្រ។ នាងថា អ្នកសិល្បៈម្នាក់ៗ ខំណាស់ចង់ងាប់ខ្លួន ប៉ុន្តែ បងប្អូនប្រិយមិត្តមិនសូវគ្រាំទ្រទេ ហើយបើសម្តែងឆ្គងតិចតួចរិះគន់អ្នកសិល្បៈបែកផ្សែង។ ប៉ុន្តែផ្ទុយទៅវិញ បងប្អូនប្រិយមិត្តបែរជាទៅគាំទ្ររឿងអត់ប្រយោជន៍អោយគេល្បី ហើយប្រើពាក្យសុទ្ធតែ "idol”។
តារាស្រី បញ្ជាក់ថា ពាក្យ “idol” នៅស្រុកគេ មិនត្រូវហៅដោយងាយឡើយ។ សូ ដានីតា ថ្លែង "ពាក្យថា idolនៅប្រទេសក្រៅគេមិនងាយហៅអ្នកណាផ្ដេសផ្ដាសទេបងប្អូន ទាល់តែម្នាក់នោះជាមនុស្សធ្វើរឿងអស្ចារ្យ ច្រើនល្បីបទជាច្រើន សម្តែងល្អទូទាំងប្រទេស ទើបគេហៅថា (គាត់ជា Idolខ្ញុំ) តែបងប្អូនខ្លះ មិនដឹងថា Idol បកមកវិញថាម៉េចផងហ្នឹង ហើយខំនិយាយតាមគេតាមឯងដែរ...!”។
តាមតារាស្រី បានឲ្យដឹងទៀតថា បងប្អូនប្រិយមិត្តហាក់ងាយគាំទ្រចំពោះរឿងដែលមិនបានប្រយោជន៍ ពោលគឺឆ្កួតៗ ប៉ុន្តែប្រសិនបើរឿងល្អ រឿងមានប្រយោជន៍ ណែនាំពីសុខភាព ពីគ្រួសារ ពីសង្គម រឺ ច្បាប់ចរាចរណ៍ គឺមិនមានអ្នកអើពើនោះទេ ខុសពីរឿងជេរហែកហួរគ្នា ប្រិយមិត្តគាំទ្រចាប់អារម្មណ៍ភ្លូកទឹកភ្លូកដី។
“ ខ្ញុំសុំទោសបងប្អូន ខ្ញុំនិយាយខាងលើ មិនចង់ប៉ះពាល់បងប្អូនណាទេ តែគ្រាន់តែចង់អោយបងប្អូនគិតបន្តិចថា ការគាំទ្រ រឺការជេរ របស់បងប្អូនទៅលើអ្នកណាម្នាក់ គឺមិនខុសទេ តែខុសនោះគឺ គាំទ្រខុស រឺជេរខុស ពាក្យចាស់លោកពោលថា "១ម៉ាត់ងាប់១ម៉ាត់រស់" អីចឹងសម័យនេះដូចគ្នា មុននឹងគាំទ្រ រឺ ជេរ ត្រូវមើលសិន កុំអោយខុស"។ សូ ដានីតា បន្ថែម៕