មានឡាននេះជិះ អាចដោះសោដោយប្រើតែ iPhone ឬ Apple Watch

2020-06-23 02:32:51
ចំនួនមតិ 0 | ចំនួនចែករំលែក 0

ចន្លោះមិនឃើញ

Apple បានប្រកាសចេញ iOS 14 ដោយមានបន្ថែមមុខងារថ្មីៗជាច្រើន ដែលក្នុងនោះរួមមានមុខងារ Car Key ជាមុខងារសម្រាប់ដោះ ឬចាក់សោរថយន្តដោយប្រើ iPhone ឬ Apple Watch ដែលអាចប្រើបានមុខគេតែជាមួយរថយន្ត BMW 5 Series ឆ្នាំ ២០២១ ប៉ុណ្ណោះ។

មុខងារនេះគឺប្រើប្រាស់នូវបច្ចេកវិទ្យា NFC ដែលអាចឲ្យអ្នកប្រើប្រាស់ដាក់ទូរសព្ទរបស់ពួកគេនៅក្បែរដៃទ្វារ ដើម្បីអាចដោះសោរថយន្ត។ បន្ទាប់មកអ្នកប្រើប្រាស់អាចដាក់ iPhone នៅទីតាំងសម្រាប់ដាក់ស្មាតហ្វូន ហើយអាចបញ្ឆេះរថយន្តបាន។

ម្ចាស់រថយន្តក៏អាចចែករំលែកសោនេះជាមួយមិត្តភ័ក្ដិ និងក្រុមគ្រួសារបានផងដែរ។ BMW បាននិយាយថាម្ចាស់រថយន្តអាចចែករំលែកសោដល់អ្នកផ្សេងទៀតបានដល់ ៥នាក់ ហើយម្ចាស់រថយន្តអាចកំណត់នូវកម្លាំងរថយន្ត, ល្បឿនអតិបរមា, កម្រិតសំឡេងវិទ្យុ និងកំណត់ចំណុចជាច្រើនទៀតបានផងដែរ។

មុខងារសោឌីជីថលនេះអាចផ្ដល់សុវត្ថិភាពខ្ពស់ និងអាចដំណើរការបានដល់ ៥ម៉ោង ទោះបីជា iPhone ត្រូវរលត់ដោយសារអស់ថ្មក្ដី។ BMW នឹងបន្ថែមការគាំទ្រមុខងារនេះដល់រថយន្តដទៃទៀតរួមមានម៉ូដែល 1, 2, 3, 4, 5, 6, 8, X5, X6, X7, X5M, X6M និង Z4 ដែលផលិតក្រោយថ្ងៃទី ១ ខែកក្កដា ឆ្នាំ ២០២០ ហើយនឹងអាចដំណើរការក្នុងប្រទេសចំនួន ៤៥។

គួរដឹងដែរថា iPhone ដែលអាចដំណើរការមុខងារសោឌីជីថលនេះបានគឺមានចាប់ពី iPhone XR, iPhone XS ឡើងទៅ ហើយក៏អាចប្រើប្រាស់នៅលើ Apple Watch Series 5 ឡើងផងដែរ៕

ប្រភព៖ carscoops ប្រែសម្រួល៖ សុខហេង