Wanheng ដែលជាកីឡាករបំបែកកំណត់ត្រារបស់ Floyd មានប្រវត្តិបែបណា?

2020-06-23 03:52:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ជើងខ្លាំងកីឡាប្រដាល់សកលរបស់ថៃ Wanheng Menayothin ទើបតែប្រកាសចូលនិវត្តន៍ពីអាជីពកាលពីពេលថ្មីក្នុងកំណត់ត្រាប្រកួតមិនដែលចាញ់ ៥៤-០ ហើយបានបំបែកកំណត់ត្រារបស់កីឡាករអាមេរិក Floyd Mayweather ក្នុងនាមជាអ្នកមិនដែលចាញ់បានច្រើនប្រកួត។

Wanheng ដែលមានឈ្មោះពិតChayaphon Moonsri កើតក្នុងខេត្តមហាសារ៉ាខាម ប្រទេសថៃក្នុងឆ្នាំ១៩៨៥ បច្ចុប្បន្នអាយុ៣៤ឆ្នាំ។ Wanheng បានបញ្ចប់ថ្នាក់បរិញ្ញាបត្រផ្នែកសិល្បៈពីសាកលវិទ្យាល័យ Bangkokthonburi។ មុនពេលឈានជើងចូលជាអ្នកប្រដាល់សកល គេមានប្រភពចេញពីកីឡាករមួយថៃ ដោយកាលនោះគេហាត់ក្នុងក្លឹប Kaiyanghadaogym នៅអាយុ១៣ឆ្នាំ ដើម្បីរកលុយផ្គត់ផ្គង់គ្រួសារ។

គេធ្លាប់គ្រងខ្សែក្រវាត់សង្វៀន Lumpinee ម្ដងនិងខ្សែក្រវាត់ប្រទេសថៃម្ដង។ Wanheng បានបោះជំហានក្នុងអាជីពប្រដាល់សកលក្នុងឆ្នាំ២០០៧។ គេយកបានខ្សែក្រវាត់ WBC Youth world ក្នុងប្រភេទទម្ងន់ Minimumweight នៅក្នុងប្រកួតទី៣របស់គេ។

ក្នុងឆ្នាំ២០១៤ គេដណ្ដើមបានខ្សែក្រវាត់ពិភពលោក WBC Minimumweight (៤៧,៦៣គីឡូក្រាម) ពីកីឡាករ Oswaldo Novoa សញ្ជាតិម៉ិកស៊ិក ដែលការប្រកួតរៀបចំនៅប្រទេសថៃ។ ជារឿងអស្ចារ្យ Wanheng បានការពារខ្សែក្រវាត់នេះបានដល់១២ដងទល់នឹងកីឡាករគ្រប់ជាតិសាសន៍រហូតដក់បច្ចុប្បន្ន ដោយចុងក្រោយរបស់គេជួបកីឡាករអាហ្វ្រិកខាងត្បូង Simphiwe Khonco ក្នុងខែ តុលា ឆ្នាំ ២០១៩។

ជារឿងគួរឲ្យកត់សម្គាល់សម្រាប់ការប្រកួតទាំង៥៤របស់ Wanheng គឺវាយក្នុងប្រទេសថៃទាំងអស់ មិនដែលចេញទៅក្រៅប្រទេសនោះទេ។ កាលនៅជាកីឡាករមូយថៃគេក៏ធ្លាប់ជួប Phetmorakot ផងដែរ តែលទ្ធផលចាញ់ពិន្ទុ៕