ថាអីចេះខុស ខេម លេចមុខក្នុង Galaxy បាត់ និងទើបចេញបទជាមួយ សីម៉ា ប៉ុន្មាននាទីមុននេះ!
- 2020-07-01 02:30:16
- ចំនួនមតិ 0 | ចំនួនចែករំលែក 0
ថាអីចេះខុស ខេម លេចមុខក្នុង Galaxy បាត់ និងទើបចេញបទជាមួយ សីម៉ា ប៉ុន្មាននាទីមុននេះ!
ចន្លោះមិនឃើញ
ចចាមអារ៉ាម ដែលកើតឡើងច្រើនខែមកហើយនោះ ពេលនេះ បានក្លាយជាការពិតហើយ ដោយលោក ខេម បានលេចមុខក្នុងផលិតកម្ម Galaxy Navatra និងទើបតែចេញបទជាមួយតារាស្រី តន់ ច័ន្ទសីម៉ា ប៉ុន្មាននាទីប៉ុណ្ណោះ។
ចម្រៀងមួយបទនេះ មានចំណងជើងថា "សុំមួយពេលមក" ជាបទទី១របស់តារាចម្រៀងមកពីខេត្តកំពង់ឆ្នាំង ខេម ព្រមជាបទដំបូងរបស់លោកជាមួយនឹងតារាចម្រៀងស្រីមាឌល្អិតមកពីខេត្តតាកែវដែរ។ បទនេះ ទើបបានចេញនៅលើប្រព័ន្ធយូធូប ប្រមាណ១០នាទីមុននេះប៉ុណ្ណោះ។
នៅមុននេះ លោក ខេម ត្រូវបានដាក់បញ្ចូលក្នុងបញ្ជីស្ថិតក្នុងការសង្ស័យថា អាចជាតារាចម្រៀងម្នាក់ទៀតដែលអាចនឹងចេញពីទ្រនំចាស់ ផ្លាស់ទៅទ្រនំថ្មី នោះគឺផលិតកម្ម Galaxy Navatra ដែលបាន និងកំពុងពេញនិយម។ តម្រុយនេះ បានកើតឡើងចាប់តាំងពីចុងឆ្នាំ ២០១៩ មកម្ល៉េះ ដោយសារតែកាលណោះ ម្ចាស់បទ "តារាចម្រៀងរបស់ថោន បានបង្ហាញពីទំនាក់ទំនងយ៉ាងជិតស្និទ្ធយ៉ាងចំហជាមួយនឹងឧកញ៉ា ឡេង ណាវ៉ាត្រា ដែលជាថៅកែផលិតកម្ម Galaxy Navatra រួមទាំងថ្នាក់ដឹកនាំខ្លះទៀតរបស់ផលិតកម្ម។
ជាពិសេស ក្រោយពីឧកញ៉ាវ័យក្មេង បានប្រកាសគម្រោងផ្សារ "កសិផលធម្មជាតិ ឡេង ណាវ៉ាត្រា" កាលពីដើមឆ្នាំនេះ ខេម ត្រូវបានគេមើលឃើញថា ជាតារាទី១ដែលបានស្ម័គ្រខ្លួនចូលមកជួយម្ចាស់គម្រោងផ្សារ ក្នុងចេតនាឡើងកម្ពស់ផ្សារ ក៏ដូចជាលើកកម្ពស់ការប្រើប្រាស់ផលិតផលកសិកម្មធម្មតាជាតិដែលដាំដុះដោយកសិករខ្មែរ។ ទាំងនេះ គេជឿថា លោក ខេម នឹងអាចចូលរួមជាមួយ Galaxy នៅថ្ងៃណាមួយមិនយូរ។
យ៉ាងណា ភ្លាមៗភាគីទាំងសងខាង គឺខាងសាមីខ្លួនតារាចម្រៀង និងខាងផលិតកម្ម Galaxy បានបដិសេធ។ ប៉ុន្តែពេលនេះ អ្វីត្រូវបានលាតត្រដាងអស់ហើយ។ លោក យឹម តាស្រង់ នាយកគ្រប់គ្រងផលិតកម្ម បញ្ជាក់តាមទូរស័ព្ទយ៉ាងខ្លីថា ពេលនេះម្ចាស់បទ "ស្រឡាញ់ស្រីមួយម៉ែត្រ 73” ពិតជាបានចូលរួមជាមួយ Galaxy Navatra មែន ក្រោយពីការចរចាលើលក្ខខណ្ឌការងារបានព្រមព្រៀងគ្នាស្រេចបាច់អស់។
តាស្រង់ មិនបានអធិប្បាយក្បោះក្បាយទេ តែលោកថា បន្ទាប់ពីបទ "សុំមួយពេលមក" ដែលទើបចេញក្ដៅៗចំថ្ងៃទី ១ ខែកក្កដានេះ ផលិតកម្មនឹងរៀបចំបទចម្រៀងសម្រាប់តារាចម្រៀងប្រុសរូបនេះបន្តបន្ទាប់ ដើម្បីបុកទម្លុះទីផ្សារកាន់តែខ្លាំង។ តោះ...ឥឡូវមកស្ដាប់បទទី១របស់ ខេម នៅ Galaxy Navatra ទាំងអស់គ្នា៖