លើកនេះ! យឹម តាស្រង់ សម្រេចកែបទ តន់ ច័ន្ទសីម៉ា ហើយទាញតារាថៃចូល!
- 2020-07-07 02:37:43
- ចំនួនមតិ 0 | ចំនួនចែករំលែក 0
លើកនេះ! យឹម តាស្រង់ សម្រេចកែបទ តន់ ច័ន្ទសីម៉ា ហើយទាញតារាថៃចូល!
ចន្លោះមិនឃើញ
លោក យឹម តាស្រង់ ដែលជានាយកចាត់ការទូទៅផលិតកម្ម Galaxy Navatra បានសម្រេចចិត្តធ្វើរឿងថ្មី និងប្លែកមួយ ដោយបានកែបទចម្រៀងបទចម្រៀងដ៏ល្បីរបស់ តន់ ច័ន្ទសីម៉ា មួយបទហើយទាញតារាចម្រៀងល្បីម្នាក់របស់ថៃចូល គឺលោក ខាំផែង។
នៅក្នុងផែនការនេះ ទើបប៉ុន្មានថ្ងៃកន្លងមក គេឃើញតារាថៃ ស៊ែក ឈុមផែ ម្ចាស់បទ "ខាំផែង” បានលេចមុខក្នុងប្រទេសកម្ពុជាគួរឲ្យភ្ញាក់ផ្អើល ជាមួយក្រុមការងាររបស់ផលិតកម្មខ្មែរខាងលើ។ តាមការបញ្ចេញឲ្យដឹងថ្នាក់ដឹកនាំផលិតកម្មលោក យឹម តាស្រង់ បញ្ជាក់ថា លោកបានសម្រេចនាំយកតារាថៃខាងលើ មកច្រៀងរួមគ្នាក្នុងបទចម្រៀងមួយបទដែលដើមឡើយ គឺជាបទរបស់ តន់ ច័ន្ទសីម៉ា ច្រៀងតែឯង។
បទនោះមានចំណងជើងថា "ចូលដណ្ដឹងអូនទៅ!”។ នេះគឺជាការងារដំបូងបំផុតរបស់ Galaxy ក្នុងការនាំយកតារាចម្រៀងល្បីថៃមកចូលរួមជាមួយតារាចម្រៀងក្នុងផលិតកម្ម។ តាស្រង់ ប្រាប់ថា បទនេះ សីម៉ា បានបង្ហើរសំនៀងធ្វើឲ្យល្បីខ្លាំងរួចមកហើយនៅក្នុងស្រុក ចាប់តាំងពីចេញនៅលើយូធូបមក។ ដោយសារចង់ផ្ដល់រសជាតិប្លែកដល់ប្រិយមិត្តរបស់ Galaxy និងផ្ដល់បទពិសោធន៍ថ្មីដល់ សីម៉ា ផង ទើបលោកសម្រេចកែបទនេះ ទៅជាបទច្រៀងឆ្លងឆ្លើយវិញ ដោយឲ្យ សីម៉ា ច្រៀងឆ្លងឆ្លើយជាមួយតារាថៃ ខាំផែង។
បទនេះដំណើរការផលិតទៅយ៉ាងរលូន ខណៈក្រុមការងារទាំងអស់ក៏រីករាយជាមួយបទថ្មីនេះ។ យឹម តាស្រង់ បញ្ជាក់ថា តារាថៃក៏រីករាយចំពោះកិច្ចការនេះ ពោលគឺភាគីទាំងសងខាង ពេញចិត្តទាំងព្រម។ ក្រោយពីបានបញ្ចប់ការថតតែប៉ុន្មានថ្ងៃ បទ "ចូលដណ្ដឹងអូនទៅ" របស់ សីម៉ា និង ខាំផែង គ្រោងនឹងចេញចែកជូនប្រិយមិត្តបានទស្សនា និងស្ដាប់ក្នុងពេលឆាប់ៗខាងមុខនេះ។
នាយកគ្រប់គ្រងផលិតកម្ម Galaxy Navatra ថ្លែងថា បន្ទាប់ពីបទ "ចូលដណ្ដឹងអូនទៅ" នេះបានចេញផ្សាយហើយ ប្រិយមិត្ត ក៏ដូចជាអ្នកគាំទ្ររបស់តារាចម្រៀងទាំងពីរ នឹងពេញចិត្ត ហើយគាំទ្រខ្លាំងដូចបទដំបូងដែលច្រៀងដោយ តន់ ច័ន្ទសីម៉ា តែម្នាក់ឯងដូច្នេះដែរ៕