មកស្គាល់លោក Bielsa គ្រូបង្វឹក Leeds United សូម្បី Pep ,Zidane ក៏ធ្លាប់សុំរៀនតាម
- 2020-07-21 07:53:10
- ចំនួនមតិ 0 | ចំនួនចែករំលែក 0
មកស្គាល់លោក Bielsa គ្រូបង្វឹក Leeds United សូម្បី Pep ,Zidane ក៏ធ្លាប់សុំរៀនតាម
ចន្លោះមិនឃើញ
ក្រុម Leeds United បានគ្រងជើងឯក Championship ហើយរដូវកាលក្រោយ ពួកគេនឹងមានវត្តមាននៅ Premier League វិញ ក្រោយបាត់មុខ១៦ឆ្នាំមកនេះ។
គ្រប់គ្នាសុទ្ធតែមើលឃើញថាក្រុមជើងចាស់មួយនេះ ពិតជាលេងបានល្អមែនទែនរដូវកាលនេះ ហើយអ្នកដែលទទួលបានការកោតសរសើរជាងគេនោះគឺលោក Marcelo Bielsa តែម្ដង។ គ្រូបង្វឹករូបនេះ បានចូលដឹកនាំក្រុម Leeds United នៅឆ្នាំ២០១៨ ហើយរដូវកាលមុន លោកក៏សឹងតែជួយក្រុមមួយនេះ បានឡើងមកលេង Premier League ទៅហើយដែរ។
តើលោក Marcelo Bielsa វ័យ៦៥ឆ្នាំនេះ មានប្រវត្តិយ៉ាងណាដែរ ទើបបានជាអាចដឹកនាំក្រុម Leeds United ដែលធ្លាប់ជាឆ្មា ហើយអាចក្លាយទៅជាខ្លាវិញបាននោះ? សូមបញ្ជាក់ថា Bielsa នេះ ជាជនជាតិអាហ្សង់ទីននិងធ្លាប់ដឹកនាំក្រុមជម្រើសជាតិ និងក្លឹបធំៗច្រើន។ ដោយសូម្បីតែអ្នកចាត់ការល្បីៗបច្ចុប្បន្ននេះ ក៏ធ្លាប់បានសុំលោក ដើម្បីរៀនសូត្រផងដែរ។
លោក Pep អ្នកចាត់ការល្បីឈ្មោះខ្លាំងលើលោក និងកំពុងដឹកនាំក្រុម Man City បាននិយាយថា៖ “Bielsa បានធ្វើរឿងដ៏អស្ចារ្យច្រើនណាស់។ គាត់ជាមនុស្សកម្រម្នាក់ក្នុងវិស័យបាល់ទាត់នៅលើលោកនេះ ព្រោះគាត់តែងតែមានអ្វីពិសេសជានិច្ចក្នុងការលេងបាល់ទាត់។ ខ្ញុំបានរៀនក្បួនពីគាត់យ៉ាងច្រើន។ គាត់ជាមនុស្សពិសេស មនុស្សអស្ចារ្យ ពិតជាពិសេសខ្លាំងណាស់”។
លោក Zidane អ្នកចាត់ការក្រុម Real Madrid បច្ចុប្បន្នក៏ធ្លាប់បានសុំរៀនសូត្រពីលោក Bielsa នេះដែរ។ ពោលគឺនៅឆ្នាំ២០១៤ គ្រាដែលលោក Bielsa នៅដឹកនាំក្រុម Marseille ។ នៅគ្រានោះ លោក Bielsa បានពន្យល់ និងប្រាប់ពីវិធីសាស្ត្រជាច្រើនក្នុងការដឹកនាំក្រុមដល់ Zidane ។
លោក Simeone អ្នកចាត់ការក្រុម Atletico Madrid ក៏ធ្លាប់ជាសិស្សរបស់លោក Bielsa ដែរ។ អ្នកចាត់ការដែលមានតម្លៃពលកម្មខ្ពស់ជាងគេបំផុតនៅអេស្ប៉ាញរូបនេះ បញ្ជាក់ថាលោក Bielsa នេះហើយ ដែលជាបុគ្គលបង្ហាត់បង្រៀនខ្លួនច្រើនជាងគេ ហើយក៏ជាមនុស្សពិសេសម្នាក់ក្នុងវិស័យបាល់ទាត់ផងដែរ៕