ក្ដៅហើយ! មាន សូនីតា ដាក់ឱសានវាទឲ្យ Page អនាមិកយកនាងប្រើសរសេរអាសអាភាសត្រឹមថ្ងៃនេះប៉ុណ្ណោះ

2020-07-23 02:51:11
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាស្រី មាន សូនីតា បានដាក់ឱសានវាទត្រឹមថ្ងៃនេះ ឲ្យក្រុមធ្វើទំព័រហ្វេសប៊ុកអនាមិកមួយក្រុម ដែលបាន និងកំពុងធ្វើឲ្យនាងជួបបញ្ហាឈឺក្បាលខ្លាំងនៅ១-២ថ្ងៃមកនេះ ដោយតម្រូវឲ្យពួកគេទទួលយកលក្ខខណ្ឌរបស់នាងប៉ុន្មានចំណុចដើម្បីបញ្ចប់បញ្ហាដែលកើតឡើង។

ប៉ុន្មានថ្ងៃមកនេះ មានទំព័រហ្វេសប៊ុកអនាមិកជាច្រើនបាន យករូបរបស់តារាស្រី មាន សូនីតា ទៅប្រើប្រាស់ជាមួយពាក្យពេចន៍អាសអាភាស។ ប្រការនេះ បានធ្វើឲ្យរាជិនីក្រមាឆេះដុំខ្លាំងដោយសារតែទង្វើនេះ នាងយល់ថា បានធ្វើឲ្យប៉ះពាល់ដល់មុខមាត់ កេរ្តិ៍ឈ្មោះ និងកិត្តិយសរបស់នាងខ្លាំង។ ម្សិលមិញនេះ សូនីតា បានកៀរគរប្រិយមិត្តជាច្រើន មកចូលរួម Report ទាំងនោះចោល។

ប៉ុន្តែសកម្មភាពនេះ មិនទាន់មានប្រសិទ្ធភាពទាន់ចិត្តភ្លាមៗនោះទេ ខណៈតារាស្រី បញ្ជាក់ថា នាងបានរកឃើញទំព័រហ្វេសប៊ុកធ្វើសកម្មភាពដូចគ្នានេះមកលើរូបនាងជាច្រើនទៀត។ "ខ្ញុំដឹងថា ពួកគេជានរណា ធ្វើដើម្បីអី គឺគេជាអ្នកធ្វើផេកលក់ ហើយគេធ្វើបែបនេះដើម្បីបាន Like ច្រើនហើយគេប្ដូរឈ្មោះផេករួចលក់ ខ្ញុំដឹង ប៉ុន្តែបងប្អូនមិនគួរតែដើម្បីប្រយោជន៍ខ្លួនប៉ុណ្ណឹង មកធ្វើឲ្យប៉ះពាល់ដល់កិត្តិយស កេរ្តិ៍ឈ្មោះគេ ដែលគេខំសន្សំរាប់សិបឆ្នាំមកនោះទេ"។

នៅវីដេអូ Live កាលពីយប់មិញ មាន សូនីតា បានទុកឱសានវាទត្រឹមថ្ងៃនេះប៉ុណ្ណោះ ឲ្យម្ចាស់ទំព័រហ្វេសប៊ុកអនាមិកទាំងអស់ដែលយករូបភាពនាងទៅប្រើប្រាស់ដោយគ្មានការអនុញ្ញាត នៅក្នុងផ្លូវអាសអាភាសនោះ ត្រូវបញ្ឈប់សកម្មភាពភ្លាមៗ ក្នុងនោះ នាងតម្រូវឲ្យពួកគេត្រូវអនុលោមតាមលក្ខខណ្ឌដូចជា ទី១ ត្រូវលុបរូបភាពរបស់នាងចេញពីទំព័រហ្វេសប៊ុកខ្លួនឯងទាំងអស់ និងទី២ ចូលខ្លួនមកដោះស្រាយជាមួយនាងដោយផ្ទាល់ ហើយធ្វើការសុំទោសនាងជាសាធារណៈ។

តារាស្រីលើកឡើងថា "និយាយទៅ គឺមានមនុស្សច្រើនគ្នាណាស់ ដែលគាំទ្រឲ្យខ្ញុំប្ដឹង ហើយខ្ញុំនឹងប្ដឹង...ខ្ញុំនិយាយ...ខ្ញុំហ៊ានធ្វើ...ខ្ញុំចង់ប្រាប់ថា ខ្ញុំមានភស្តុតាងនៅក្នុងដៃអស់ហើយ ប៉ុន្តែខ្ញុំមិនចង់...គឺគ្រាន់តែអ្នកធ្វើហ្នឹង ដឹងខ្លួនថា និងទទួលស្គាល់នូវអ្វីដែលគេបានធ្វើ...ហើយចូលមកដោះស្រាយជាមួយខ្ញុំ ហើយសុំទោសខ្ញុំជាងសាធារណៈ ព្រោះគាត់បានយករូបខ្ញុំទៅកាត់តបង្ហោះសាធារណៈ អីចឹងគាត់ត្រូវសុំទោសខ្ញុំជាសាធារណៈ..ខឹងឡើងញ័រមាត់ហើយ និយាយអីលែងចង់ចេញហើយ ខឹងពេក...”។

ជាជំហានដំបូង សូនីតា បញ្ជាក់ថា នាងចង់ឲ្យម្ចាស់ទង្វើ ចូលខ្លួនមកទទួលខុសត្រូវដោះស្រាយជាមួយនាង ព្រោះអ្វីដែលកើតឡើង វាប៉ះពាល់ដល់នាងខ្លាំង បើពុំនោះទេ នាងនឹងបន្តទៅជំហានដែលនាងមិនចង់ធ្វើ ពោលគឺនឹងដាក់ពាក្យប្ដឹងឲ្យប្រព័ន្ធច្បាប់ជួយធ្វើការឲ្យនាងនៅរឿងនេះ ហើយម្ចាស់ទង្វើអសីលធម៌មានពេលត្រឹមថ្ងៃនេះប៉ុណ្ណោះ៕

អត្ថបទ៖ ទារិកា