៥ ចំណុចពីរឿងភាគកូរ៉េ ដែលធ្វើឲ្យអ្នកមើលតឹងចិត្តចង់ស្ទះម្ដងៗ

2020-07-27 02:34:21
ចំនួនមតិ 0 | ចំនួនចែករំលែក 0

ចន្លោះមិនឃើញ

រឿងភាគកូរ៉េ ឬ K-Drama ក៏ជាកត្តាធំមួយដែរ ដែលអាចជួយឲ្យវិស័យសិល្បៈកូរ៉េមានភាពល្បីល្បាញខ្លាំងសព្វថ្ងៃនេះ។ មានចំណុចជាច្រើនដែលចាប់ចិត្តអ្នកទស្សនា ក្នុងនោះទាំងសាច់រឿង ក៏ដូចជាតួអង្គជាដើម។

ស្របពេលមានចំណុចវិជ្ជមាន ក៏តែងតែមានចំណុចអវិជ្ជមាន ដែលសុទ្ធតែជាចំណុចធ្វើឲ្យអ្នកមើលភាគច្រើនអន់ចិត្ត និងទើសភ្នែកផងដែរ។ ដូច្នេះ ចំណុចធំៗដែលមិនសូវមានការពេញចិត្តដែលតែងលេចឡើងឥតល្ហែក្នុងរឿងភាគកូរ៉េរួមមាន៖

១. តួអង្គរង

តួអង្គឯកបន្ទាប់ ឬ តួអង្គឯករង តែងធ្វើឲ្យអ្នកមើលជាប់ស្នេហ៍ ពេលខ្លះមានអ្នកស្រឡាញ់តួរងទាំងនោះជាងតួឯកទៀត ដល់ថ្នាក់អ្នកមើលបន់ឲ្យតែបានជាមួយតួឯកស្រីទៀតក៏មាន។ ប៉ុន្តែមែនទែនទៅ ចុងបញ្ចប់តួស្រីនៅតែបានជាមួយនឹងតួឯកប្រុស ធ្វើឲ្យអ្នកមើលជួយឈឺចាប់ជាមួយនឹងតួរងទាំងនោះទៀត។

កាន់តែកម្សត់នោះគឺ តួរងខ្លះតែងមើលថែ ខ្វល់ខ្វាយនឹងតួឯកស្រីខ្លាំងបំផុត តែចុងក្រោយសល់តែការខកចិត្ត ពេលតួឯកប្រុសស្រីគេបានគ្នា។

២. ក្នុង ១រឿងប្រាកដជាមានតួយ៉ាងហោច ១នាក់ធ្វើឲ្យអ្នកមើលខ្លាច និងស្អប់បំផុត

ភាគច្រើនរឿងភាគកូរ៉េ ប្រាកដជាត្រូវតែមានតួចិត្តអាក្រក់ អាក្រក់រហូតធ្វើឲ្យអ្នកមើលស្អប់មិនខាន។ ដល់ថ្នាក់ពេលខ្លះ ពេលតួចិត្តអាក្រក់ទាំងនោះ បញ្ចេញល្បិចពិសពុលពេក អ្នកមើលសឹងតែស្រែកទាំងកំហឹង ហើយថែមទាំងតឹងចិត្តម្ដងម្កាលទៀត។

៣. ពេលតួដែលគ្រប់គ្នាស្រឡាញ់ បែរជាត្រូវស្លាប់

មួយចំណុចទៀត ដែលផលិតករធ្វើបាបចិត្តអ្នកមើលនោះ គឺពេលសម្រេចឲ្យតួល្អម្នាក់ស្លាប់។ ត្បិតជាសាច់រឿងតម្រូវទាល់តែត្រូវស្លាប់ ប៉ុន្តែវាពិតធ្វើឲ្យអ្នកមើលគ្រាំចិត្តអាណិតតួនោះខ្លាំងណាស់។

៤. ពេលតួសម្រេចចិត្តខុសម្ដងៗ

ចូលដល់កន្លែងនេះក៏ ចាក់ដោតដែរ ជាពិសេសធ្វើឲ្យអ្នកដែលតាមដានតឹងទ្រូងស្ទើរធ្លាយ ពេលតួអង្គសម្រេចធ្វើអ្វីខុស និងធ្វើអ្វីយឺតយ៉ាវ។ ឧទាហរណ៍ដូចឈុតខ្លះ តួត្រូវរត់មកឃើញ ឡានដែលបើកតម្រង់មក តួនោះមិនព្រមរត់គេចភ្លាមៗទេ ប៉ុន្តែបែរជាឈរភាំងនៅនឹងកន្លែង។ ត្រង់នេះហើយដែលអ្នកមើលតឹងចិត្តជំនួស។

៥. ភាគបញ្ចប់ដែលខុសការរំពឹងទុក

រឿងភាគកូរ៉េមួយចំនួន ព្យាយាមពញ្ញាក់អារម្មណ៍អ្នកគាំទ្រជាមួយនឹងសាច់រឿងចុងបញ្ចប់ដែលស្មានមិនដល់ ខុសការរំពឹងទុក។ ខ្លះធ្វើឲ្យអ្នកមើលពេញចិត្តពីដើមដល់ចប់ ស្របពេលខ្លះទៀតធ្វើឲ្យអ្នកមើលមិនអស់ចិត្ត និងនាំគ្នាលើកមតិថា ភាគបញ្ចប់ហាក់ដូចជាមិនពេញលេញដូចអ្វីដែលពួកគេរំពឹងសោះ៕

ប្រភព៖ Koreaboo ប្រែសម្រួល៖ យី សុធារី