លោក ត្រាំ សម្រេចចិត្តម្ដងនេះ អាចធ្វើឲ្យចំនួនលក់ iPhone ធ្លាក់ចុះ

2020-08-10 09:48:31
ចំនួនមតិ 0 | ចំនួនចែករំលែក 0

ចន្លោះមិនឃើញ

បទបញ្ជាប្រតិបត្តិរបស់លោក ដូណាល់ ត្រាំ ដែលហាមឃាត់ក្រុមហ៊ុនអាមេរិក មិនឲ្យមានទំនាក់ទំនងអាជីវកម្មជាមួយក្រុមហ៊ុន WeChat របស់ចិន អាចផ្ដល់ផលប៉ះពាល់ខ្លាំងដល់ចំនួនលក់ iPhone។ នេះបើតាមការវិភាគលោកអ្នកវិភាគ Ming-Chi Kuo។

ប្រសិនបើបទបញ្ជាត្រូវបានអនុវត្តន៍ពេញលេញ គេអាចឃើញថា WeChat នឹងត្រូវដកចេញពី App Store របស់ Apple នៅទូទាំងពិភពលោក។ WeChat គឺជាកម្មវិធីផ្ញើសារសំខាន់មួយនៅទីផ្សារប្រទេសចិន ហើយប្រសិនបើវាលែងមានលើប្រព័ន្ធប្រតិបត្តិការ iOS នោះចំនួនលក់ iPhone អាចធ្លាក់ចុះរហូតដល់ ៣០%។

គួរដឹងថា WeChat មិនមែនត្រឹមជាសេវាកម្មផ្ញើសារប៉ុណ្ណោះទេសម្រាប់អ្នកប្រើប្រាស់នៅប្រទេសចិន ដោយវាមានរួមបញ្ចូលការទូទាត់សាច់ប្រាក់ បណ្ដាញទំនាក់ទំនងសង្គម ព័ត៌មាន ការទិញទំនិញអនឡាញជាដើម។

តាមការបញ្ជាក់ក្នុងបទបញ្ជាប្រតិបត្តិ គឺបានហាមឃាត់លើការមានទំនាក់ទំនងអាជីវកម្មទាំងអស់រវាងក្រុមហ៊ុនអាមេរិក និង WeChat។ នេះមានន័យថា Apple អាចនឹងលុបកម្មវិធី WeChat ចេញពី App Store ក្នុងពេល ៤៥ថ្ងៃ។ យ៉ាងណាក្ដី អ្នកជំនាញជាច្រើនរំពឹងថារដ្ឋបាលលោកត្រាំ អាចនឹងបន្ថយបទបញ្ជាមុនពេលកំណត់។

ចំណែកឯប្រព័ន្ធប្រតិបត្តិការ Android វិញ ទោះបីជាកម្ម WeChat លែងមានលើ Play Store ក៏អ្នកប្រើប្រាស់អាចដំឡើងប្រើប្រាស់បានតាមរយៈ File APK មិនដូចជានៅលើប្រព័ន្ធប្រតិបត្តិការ iOS ដែលរឹតត្បិតការដំឡើងកម្មវិធីពីប្រភពក្រៅនោះទេ៕

ប្រភព៖ 9to5Mac ប្រែសម្រួល៖ សុខហេង