ប្លែកពីគេ ខេមរៈ សិរីមន្ដ រក្សាជំហរមួយក្នុងអាជីពសិល្បៈ ដើម្បីសុវត្ថិភាពមនុស្សទូទៅ
- 2020-08-31 08:42:14
- ចំនួនមតិ 0 | ចំនួនចែករំលែក 0
ប្លែកពីគេ ខេមរៈ សិរីមន្ដ រក្សាជំហរមួយក្នុងអាជីពសិល្បៈ ដើម្បីសុវត្ថិភាពមនុស្សទូទៅ
ចន្លោះមិនឃើញ
តារាចម្រៀងលំដាប់កំពូលប្រចាំផលិតកម្មរស្មីហង្ស មាស លោក ខេមរៈ សិរីមន្ដ នៅប្រកាន់ជំហរមិនចេញច្រៀងតាមកម្មវិធីផ្សេងៗទាំងនៅក្នុងរាជធានីភ្នំពេញ និងតាមខេត្ត ដោយលោកលើកហេតុផលថារាជរដ្ឋាភិបាលមិនទាន់ឲ្យមានការជួបជុំជាទ្រង់ទ្រាយធំ ហើយលោកក៏បារម្ភណាស់ដែរពីការឆ្លងរាតត្បាត នៃជំងឺកូវីដ-១៩។
ការបញ្ជាក់ជំហររបស់តារាចម្រៀងរូបនេះ ហាក់ប្លែកពីតារាដទៃដែលស្រវាចាប់យកឱកាសចេញសម្ដែង ឬច្រៀងឲ្យតែមាន បើទោះបីជាស្ថានភាពជំងឺកូវីដ-១៩ មិនទាន់ស្ងប់ស្ងាត់ ព្រោះពួកគេបានបាត់ចំណូលជាច្រើនខែមកហើយ។
តារាចម្រៀងប្រុសដែលមានកេរ្តិ៍ឈ្មោះមិនចាញ់កំពូលតារាចម្រៀងលោក ព្រាប សុវត្ថិ ប៉ុន្មាននោះ ត្រូវបានគេជឿថា មានតម្លៃខ្លួនមិនណយដែរសម្រាប់ការចេញច្រៀងតាមខេត្ត ឬក្រៅស្ទូឌីយោម្ដងៗ។ ប៉ុន្ដែលោកបានបញ្ជាក់ប្រាប់Sabay ថា ចាប់តាំងពីរាជរដ្ឋាភិបាលប្រកាសឲ្យផ្អាកការជួបជុំ ឬប្រគំតន្ត្រីជាទ្រង់ទ្រាយធំមក រូបលោកមិនដែលចេញច្រៀងនៅក្រៅស្ទូឌីយោសូម្បីតែម្ដង ហើយលោកនឹងរក្សាជំហរនេះរហូតដល់ស្ថានភាពជំងឺកូវីដ-១៩ ល្អប្រសើរវិញ។
ទោះជាយ៉ាងណា នៅអំឡុងពេលដែលកម្ពុជា និងសកលលោកជួបវិបត្តិជំងឺកូវីដ-១៩ នេះ គេសង្កេតឃើញតារាចម្រៀង ខេមរៈ សិរីមន្ដ ក៏នៅមិនស្ងៀមដែរ ពោលគឺលោកនៅតែបន្តច្រៀងនៅក្នុងស្ទូឌីយោហង្សមាស ហើយលោកក៏ឆ្លៀតពេលរកស៊ីផ្នែកអចលនទ្រព្យយ៉ាងសកម្មដែរជាមួយអ្នកមានមុខមានមាត់នៅក្នុងសង្គម។ បទចម្រៀងដែលលោកទើបចេញនោះ គឺមានដូចជា៖ បទ"វាលត្រែង វាលស្មៅ" និងបទ"ពេលអូនមានលុយ អូនផ្ទុយគ្រប់យ៉ាង"ជាដើម។
តារាចម្រៀងមានធ្មេញច្រពើសរូបនេះ បានអំពាវនាវដល់ជនរួមជាតិបន្តរក្សាគម្លាតសង្គម ហើយរក្សាអនាម័យរៀងៗខ្លួនដើម្បីកាត់បន្ថយហានិភ័យពីការឆ្លងមេរោគកូវីដ-១៩។ ចំពោះលោកខេមរៈ សិរីមន្ដ មិនគាំទ្រចំពោះការប្រគំតន្ត្រី ឬការជួបជុំសប្បាយជាទ្រង់ទ្រាយធំឡើយ បើមិនទាន់មានការប្រកាសអនុញ្ញាតឲ្យជួបជុំឡើងវិញពីរាជរដ្ឋាភិបាលទេនោះ៕