សហព័ន្ធប្រដាល់សកល រំពឹងកើនកីឡាករបន្ទាប់បើកវគ្គបណ្ដុះគ្រូថ្មីៗនេះរួច

2020-09-06 04:20:49
ចំនួនមតិ 0 | ចំនួនចែករំលែក 0

ចន្លោះមិនឃើញ

អគ្គលេខាធិការសហព័ន្ធប្រដាល់សកលកម្ពុជា រំពឹងថានៅពេលខាងមុខនឹងសំបូរធនធានកីឡាករ កីឡាការិនីលើប្រភេទកីឡានេះបន្ថែមទៀតក្រោយពីបានបើកវគ្គបណ្ដុះបណ្ដាលកម្រិតគ្រូមូលដ្ឋានរួចមក។

រូបភាពរបស់ NOCC

លោក ប៊ុយ សុភ័ណ្ឌ អគ្គលេខាធិការសហព័ន្ធខាងលើបានឲ្យដឹងថា វគ្គបណ្ដុះបណ្ដាលគ្រូកម្រិតមូលដ្ឋាននេះគឺបានជួយច្រើនទៅដល់សិក្ខាកាមចូលរួម ដូចជាផ្នែកបច្ចេកទេសក្នុងការបង្ហាត់សិស្ស បង្កើតឲ្យមានកន្លែងហាត់សកលងាយស្រួលដល់អ្នកចង់រៀនសូត្រ។

អគ្គលេខាធិការខាងលើនេះបន្ថែមទៀតថា តាមការវាយតម្លៃចំពោះវគ្គសិក្សានេះគឺមានភាពល្អប្រសើរមែនទែនសិក្ខាកាម២៩រូបនេះទទួលបាននិទ្ទេសល្អជាង២០នាក់ទៅហើយហ្នឹងមានតិចតូចនោះទេដែលខ្សោយ។ គ្រូឧបទេសមកពីអង់គ្លេសគឺបានផ្ដល់បទពិសោធ និងចំណេះដឹងជាច្រើនដល់សិក្ខាកាម ដូច្នេះហើយបញ្ចប់វគ្គបណ្ដុះបណ្ដាលនេះប្រដាល់កម្ពុជានឹងសំបូរធនធានបន្ថែមទៀតតាមក្លឹបនានា។

រូបភាពរបស់ NOCC

រំលឹកដែរថា សហព័ន្ធប្រដាល់សកលកម្ពុជាបានបើកវគ្គបណ្ដុះបណ្ដាលគ្រូបង្វឹកកម្រិតមូលដ្ឋានរយៈពេល៤ថ្ងៃគឺចាប់ពីថ្ងៃទី១ ដល់ទី៤ ខែកញ្ញា ឆ្នាំ២០២០ នេះនៅគណៈកម្មាធិការជាតិអូឡាំពិកកម្ពុជា។ ចំពោះគ្រូឧបទេសវិញបានមកពីប្រទេសអង់គ្លេស។ សិក្ខាកាមចូលរួមសរុប២៩នាក់៕

អត្ថបទ៖ នួន ស៊ីណា