ឡាន SUV វៀតណាមតម្លៃ ២០ម៉ឺនដុល្លារ ចេញលក់ជាផ្លូវការ មានតែ៥០០គ្រឿងប៉ុណ្ណោះ

2020-09-08 02:31:16
ចំនួនមតិ 0 | ចំនួនចែករំលែក 0

ចន្លោះមិនឃើញ

រថយន្ត Vinfast President ដែលជា SUV ផលិតមានកំណត់របស់ក្រុមហ៊ុនរថយន្តវៀតណាម បានបង្ហាញវត្តមានតាមហាងលក់នៅប្រទេសវៀតណាមនាថ្ងៃទី៧ ខែកញ្ញាកន្លងទៅ ដោយវាជាផលិតផលសម្រេចនៃរថយន្ត Concept Lux V8។

រថយន្តនេះមានបំពាក់នូវម៉ាស៊ីន ៦,២លីត្រ ៨ស៊ីឡាំង ដែលផលិតកម្លាំង ៤២០សេះ អាចស្ទុះពី ០-១០០គ.ម/ម៉ ក្នុងពេលត្រឹម ៦,៨វិនាទី និងប្រើប្រាស់ប្រអប់លេខអូតូ៨វគ្គ ជាមួយប្រព័ន្ធបើកបរប៉ុងពីរ។ ចំពោះបច្ចេកវិទ្យាសុវត្ថិភាព គេបានបំពាក់នូវមុខងារមួយចំនួនដូចជាប្រព័ន្ធជាន់ហ្វ្រាំងបន្ទាន់, ប្រព័ន្ធហ្វ្រាំងអេឡិចត្រូនិក, ប្រព័ន្ធទប់លំនឹងរថយន្ត, ប្រព័ន្ធជំនួយពេលចុះចំណោត, ប្រព័ន្ធទប់ទល់ការក្រឡាប់ និងប្រព័ន្ធកាមេរ៉ា ៣៦០ដឺក្រេ មើលឃើញជុំវិញខ្លួនឯងជាដើម។

នៅផ្នែកខាងក្នុងរបស់ Vinfast President គឺមានប្រណីតភាពខ្ពស់ ដែលក្រុមហ៊ុនចង់ឲ្យរថយន្តនេះស្ថិតក្នុងលំដាប់ SUV ប្រណីតៗដូចជា Lexus LX 570, Mercedes GLS ឬ BMW X7 ជាដើម។ នៅខាងក្នុងមានបំពាក់អេក្រង់ Touchscreen ទំហំ ១០,៤អ៊ីញ នៅចំកណ្ដាល, មានបំពាក់នូវកៅអីម៉ាស្សាសម្រាប់អ្នកដំណើរខាងមុខ និងខាងក្រោយ ហើយកៅអីក៏មានមុខងារកម្ដៅ និងបញ្ចេញខ្យល់ត្រជាក់ផងដែរ។ បន្ថែមពីនេះវាមានដំបូលកញ្ចក់, មានម៉ាស៊ីនត្រជាក់ពីរតំបន់ដំណើរការដោយស្វ័យប្រវត្តិ និងមុខងារបង្ហាញផ្លូវជាដើម។

Vinfast បានដាក់លក់រថយន្ត President ក្នុងតម្លៃ ៤,៦ពាន់លានដុង ដែលស្មើប្រមាណ ១៩៨ ២៦៥ដុល្លារ ប៉ុន្តែសម្រាប់អតិថិជន ១០០នាក់ដំបូង លក់ជូនក្នុងតម្លៃ ៣,៨ពាន់លានដុង ១៦៣ ៨០៤ដុល្លារប៉ុណ្ណោះ។ គួរដឹងថា Vinfast នឹងផលិតរថយន្តនេះលក់ត្រឹម ៥០០គ្រឿងប៉ុណ្ណោះ ដែលមានជម្រើសពណ៌ខាងក្រៅចំនួន ១៨ពណ៌ និងពណ៌ក្នុងចំនួន ៥ពណ៌ផងដែរ៕