ឡូយតិចអី ស្ងាត់ៗ អៀង ចេនឡា កុងត្រាជាមួយផលិតកម្មមួយ ឡើងជាតារាអាជីពបាត់ហើយ!

2020-09-24 02:52:55
ចំនួនមតិ 0 | ចំនួនចែករំលែក 0

ចន្លោះមិនឃើញ

តារាសម្ដែង និងជាតារាកំប្លែងពេញនិយម អៀង ចេនឡា បានបោះមួយជំហានទៀត ដោយលោកទើបនឹងចុះកុងត្រាធ្វើជាតារាចម្រៀងអាជីពរបស់ផលិតកម្មក្នុងស្រុកមួយកាលពីពេលថ្មីៗនេះ។

តាមព័ត៌មានដែលទទួលបាន ចេនឡា បានសម្រេចចិត្តចាប់យកឱកាសថ្មីក្នុងអាជីពសិល្បៈរបស់ខ្លួន ដោយចុះកុងត្រាជាមួយផលិតកម្ម Classic កាលពីអំឡុងមុនប៉ុន្មានថ្ងៃប៉ុណ្ណោះពិធីបុណ្យភ្ជុំបិណ្ឌបានចូលមកដល់។ តារាប្រុសលើកឡើងថា នេះជាសមិទ្ធផលថ្មីមួយទៀតក្នុងអាជីពសិល្បៈ ខណៈពីមុនមកលោកមិនដែលបានចុះកុងត្រាជាមួយផលិតកម្មក្នុងស្រុកណាមួយឡើយ។

លោក អៀង ចេនឡា បច្ចុប្បន្នត្រូវបានស្គាល់ថាជាតារាសម្ដែង និងកំប្លែងពេញនិយមមួយរូប ប៉ុន្តែនៅពីក្រោយនេះ លោកក៏ជាតារាចម្រៀងមួយរូបដែរពីមុនមក ដោយក្នុងនោះលោកក៏ជាអតីតជយលាភីលេខ១ក្នុងកម្មវិធីប្រឡងចម្រៀង ណេសកាហ្វេ ឆ្នាំ ២០០៥ ផង។ យ៉ាងណាដោយសារអាជីពសម្ដែង និងកំប្លែងលេចធ្លោជាង ទើបអាជីពចម្រៀងហាក់ចុះថមថយ។

ប៉ុន្តែសាមីខ្លួនបញ្ជាក់ថា លោកនៅតែស្រឡាញ់ និងស្ដាយសមិទ្ធផលរបស់លោកក្នុងចម្រៀងពីអតីត ទើបលោកសម្រេចហក់ចូលប្រឡូកក្នុងជំនាញ ដែលបានត្រួសត្រាយជីវិតសិល្បៈរបស់លោកជិត២ទសវត្សរ៍នេះជាថ្មី។ "ខ្ញុំខ្លាចគេភ្លេចថាខ្ញុំជាអ្នកចម្រៀង ផ្សំនឹងឱកាសដែលផលិតកម្ម Classic គេកំពុងត្រូវការអ្នកចម្រៀងផង ខ្ញុំក៏សម្រេចចិត្តចូលច្រៀងកុងត្រាតែម្ដងទៅ!”។

នេះមិនមែនជាលើកទី១ទេ ដែលលោក អៀង ចេនឡា បានធ្វើជាតារាចម្រៀងផលិតកម្ម ពោលគឺពីអតីតកាលលោកធ្លាប់បានចូលច្រៀងឲ្យផលិតកម្មមួយចំនួននៅក្រៅស្រុកដែរ។ ប៉ុន្តែដូចបញ្ជាក់ពីខាងលើ លោកគ្រាន់តែច្រៀង តែមិនបានចុះកុងត្រាដូចជាពេលនេះនោះទេ។ អតីតជយលាភីលេខ១ ណេសកាហ្វេ ឆ្នាំ ២០០៥ បានចុះកុងត្រារយៈពេល១ឆ្នាំជាមួយផលិតកម្ម Classic។

ភ្លាមៗ បន្ទាប់ចុះកិច្ចសន្យាការងារជាមួយគ្នារយៈពេលខាងលើ លោក អៀង ចេនឡា បានចេញបទចម្រៀងដំបូងមួយបទហើយ គឺបទ "ប្រែត" ដែលទើបនឹងចេញវីដេអូចម្រៀងពេញលេញផ្លូវការមុនថ្ងៃភ្ជុំបិណ្ឌ១ថ្ងៃ ដើម្បីអបអរពិធីបុណ្យប្រពៃណីជាតិខ្មែរដ៏ធំមួយនេះ។ លោកថា តាមផែនការ ផលិតកម្មនឹងជួយឲ្យលោកបានចេញបទចម្រៀងលើទីផ្សារបន្តបន្ទាប់ពីពេលនេះតទៅ៕

តោះ...ស្ដាប់បទចម្រៀងដំបូងរបស់លោក អៀង ចេនឡា ក្នុងផលិតកម្ម Classic ទាំងអស់គ្នា៖