"អ្នកមិនឯកាទេ" ពិព័រណ៍បង្ហាញពីជីវិតអ្នករងផលប៉ះពាល់ដោយសារកូវីដ១៩
- 2020-09-29 03:08:39
- ចំនួនមតិ 0 | ចំនួនចែករំលែក 0
"អ្នកមិនឯកាទេ" ពិព័រណ៍បង្ហាញពីជីវិតអ្នករងផលប៉ះពាល់ដោយសារកូវីដ១៩
ចន្លោះមិនឃើញ
ពិព័រណ៌ "អ្នកមិនឯកាទេ" បានបង្ហាញពីជីវិតរបស់ប្រជាជន ដែលរងផលប៉ះពាល់ដោយសារជំងឺកូវីដ១៩ តាមរយៈស្នាដៃគំនូររបស់សិល្បៈករក្នុងស្រុកឈ្មោះទីល និង Miguel អ្នកថតរូបប្រចាំអង្គការ UNICEF Cambodia ដោយមានការគាំទ្រពី InSTEDD iLab SEA។ គំនិតនៅពីក្រោយការតាំងពិព័រណ៍នេះ គឺផ្ដួចផ្ដើមដោយកញ្ញា ពិដោរ មន្រ្ដីផ្នែកទំនាក់ទំនងនៅ InSTEDD iLab SEA។
ដូចដែលយើងបានដឹងហើយ គ្រប់គ្នាភ័យខ្លាចការឆ្លងជំងឺកូវីដ១៩ ប៉ុន្តែក៏មានមនុស្សមួយចំនួន ខ្លាចក្រពះទទេ និងបំណុល ខ្លាំងជាងជំងឺនេះទៅទៀត ខណៈការងារបស់ពួកគេមិនអាចធ្វើពីផ្ទះបានឡើយ។ ជីវិតរបស់ពួកគេ ក៏ត្រូវបានបង្ហាញតាមរយៈពិព័រណ៍នេះដែរ។ យ៉ាងណាក្ដី រួមពិព័រណ៍នេះ មិនមែនបង្កើតឡើង ដើម្បីបំផុសអារម្មណ៍ទុក្ខសោកនោះទេ តែក៏មានបង្ហាញពីស្នាដៃរបស់បុគ្គលិកសុខាភិបាល ដែលប្រៀបដូចជាអ្នកចម្បាំងជួរមុខប្រឆាំងនឹងកូវីដ១៩ ផងដែរ។
នៅក្នុងពិព័រណ៏នេះ មានការបញ្ចាំងភាពយន្តឯកសារមួយដែលផលិតដោយ InSTEDD ក្រោមជំនួសរបស់ Ending Pandamics ដោយសហការជាមួយបុគ្គលសំខាន់ៗក្នុងផ្នែកសុខាភិបាល។ ភាពយន្តឯកសារនេះ បានបង្ហាញឲ្យយើងដឹងថា "តើប្រទេសដ៏តូចមួយដូចជាកម្ពុជា ត្រូវគ្រប់គ្រងស្ថានការណ៍ជំងឺកូវីឌ១៩ មិនឲ្យរីករាយដាលនៅក្នុងសហគមន៍បានដោយរបៀបណា?" បន្ថែមលើនេះ ស្នាដៃសិល្បៈឌីជីថលមួយចំនួនរបស់ "ទីល" ដែលជាវិចិត្រករក្នុងស្រុកដ៏មានទេពកោសល្យ ក៏ត្រូវបានបង្ហាញក្នុងពិព័រណ៍ផងដែរ។
សរុបមកវិញ ពិព័រណ៍ "អ្នកមិនឯកាទេ" ត្រូវបានរៀបចំឡើងក្នុងគោលបំណងប្រាប់នូវសារសំខាន់មួយ គឺ "យើងស្ថិតនៅទីនេះជាមួយគ្នា ហើយយើងមិនឯកាទេ!"៕