ធ្លាប់ដឹងអត់? វត្តសសរ១០០ ជាទីតាំងអភិរក្សសត្វជិតផុតពូជបំផុតមួយប្រភេទក្នុងលោក!
- 2020-10-06 12:30:29
- ចំនួនមតិ 0 | ចំនួនចែករំលែក 0
ធ្លាប់ដឹងអត់? វត្តសសរ១០០ ជាទីតាំងអភិរក្សសត្វជិតផុតពូជបំផុតមួយប្រភេទក្នុងលោក!
ចន្លោះមិនឃើញ
វត្តសសរ១០០ គឺជារមណីយដ្ឋានវប្បធម៌ប្រវត្តិសាស្រ្ដដ៏ចំណាស់មួយ ស្ថិតនៅស្រុកសំបូរ ខេត្តក្រចេះ។ ដើម្បីធ្វើដំណើរទៅកាន់វត្តសសរ១០០ យើងត្រូវធ្វើដំណើរចេញពីក្រុងក្រចេះ តាមផ្លូវលេខ ៣៧៧ ក្នុងរយៈចម្ងាយប្រមាណ ៣៦គីឡូម៉ែត្រ។
កសាងឡើងនៅសតវត្សទី១៦ ក្នុងរាជកាលស្ដេចអង្គច័ន្ទរាជាទី២ វត្តសសរ១០០ មានលក្ខណៈពិសេសខុសពីវត្តដទៃ ត្រង់វត្តនេះមានព្រះវិហារបែរមុខទៅកាន់ទិសខាងជើង និងមានប្រវត្តិទាក់ទងរឿងព្រេងនៃសត្វក្រពើ២ក្បាល គឺក្រពើនេនធន្ទ និងក្រពើសុពណ៌កាឡី។ អ្នកទេសចរដែលបានទៅដល់វត្តសសរ១០០ ពិតជាលាន់មាត់សរសើរពុំខានឡើយ នៅចំពោះមុខព្រះវិហារដ៏ធំស្កឹមស្កៃ ទ្រទ្រង់ដោយសសរខ្ពស់ត្រដែត ចំនួន ១១៦ដើម។
ក្រោមជំនោរដ៏ត្រជាក់នៃដងទន្លេមេគង្គ អ្នកទេសចរអាចដើរទស្សនាសំណង់វិហារដ៏ចំណាស់នេះ ព្រមទាំងគយគន់ផ្ទាំងគំនូរសាសនាដ៏ត្រណីត នៅតាមជញ្ជាំង និងពិដានព្រះវិហារថែមទៀត។ នៅក្នុងបរិវេណវត្តសសរ១០០ ក៏មានផងដែរនូវមជ្ឈមណ្ឌលអភរក្សសត្វអណ្ដើក និងកន្ធាយទន្លេមេគង្គ។ មជ្ឈមណ្ឌលនេះ ត្រូវបានបង្កើតឡើងនៅឆ្នាំ២០១១ ក្នុងគោលបំណងការពារសត្វអណ្ដើក និងជាពិសេសសត្វកន្ធាយក្បាលកង្កែបដែលជាប្រភេទសត្វរងគ្រោះជិតផុតពូជបំផុតនៅលើពិភពលោក។
ការទស្សនាសត្វអណ្ដើក និងកន្ធាយដ៏កម្រនេះ តិចឬច្រើន ពិតជាអាចបណ្ដុះមនោសញ្ចេតនាស្រឡាញ់សត្វដល់ភ្ញៀវទេសចរ ដែលនឹងក្លាយជាចលករដ៏សំខាន់ក្នុងការសង្រ្គោះការពារធនធានធម្មជាតិដ៏កម្រនេះ ឲ្យបានគង់វង្ស។
សូមទស្សនាវីដេអូពីកម្មវិធីផ្លូវទៅស្រុក វគ្គ៣ ខាងក្រោមនេះ៖