ស្វែងយល់ប្រវត្តិឲ្យច្បាស់ពី Calvert-Lewin កីឡាករឡើងជើងរបស់ Everton

2020-10-09 04:33:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Dominic Calvert-Lewin កំពុងទាក់ទាញប្រជាប្រិយភាពយ៉ាងខ្លាំងក្នុងរដូវកាលថ្មីជាមួយ Everton តាមរយៈការរកគ្រាប់បាល់បានគ្រប់ប្រកួតក្នុងលីគ។ សម្រាប់យប់មិញគេក៏រកបានទាត់បញ្ចូលទីមួយគ្រាប់ផងដែរ ក្នុងការបង្ហាញខ្លួនដំបូងឲ្យជម្រើសជាតិអង់គ្លេស។

Calvert-Lewin កើតនៅឆ្នាំ១៩៩៧ នៃទីក្រុង Sheffield ប្រទេសអង់គ្លេស បច្ចុប្បន្នមានអាយុ២៣ឆ្នាំ។ គេចាប់ផ្ដើមហាត់បាល់ដំបូងក្នុងឈុតយុវជនរបស់ Sheffield United ដែលជាទីកន្លែងកំណើតរបស់ខ្លួនផ្ទាល់តែម្ដង។

ត្បិតតែចាប់ផ្ដើមអាជីពបាល់ទាត់ដំបូងក្នុងក្រុម Sheffield United ប៉ុន្តែ Lewin បានលេងប្រកួតដំបូងក្នុងនាមជាកីឡាករអាជីពជាមួយក្រុម Stalybridge Celtic ក្នុងឆ្នាំ២០១៤។ Stalybridge ជាក្រុមស្ថិតក្នុងលីគក្រោមមួយរបស់អង់គ្លេស ហើយ Lewinពេលនោះជាកីឡាករខ្ចីជើងពី Sheffield។

លេងបានមួយរដូវកាល Sheffield បានបន្តឲ្យ Lewin ខ្ចីជើងទៅក្រុម Nothampton Town ។ ឈានដល់ឆ្នាំ២០១៦ Everton បានសម្រេចចិត្តទិញ Lewin ពី Sheffield ក្នុងតម្លៃខ្លួន១,៥លានផោន។ គេបានបង្ហាញខ្លួនប្រកួតដំបូងឲ្យ Everton ក្នុងនាមជាកីឡាករបម្រុង លេងទល់នឹង Arsenal កាលពីខែ ធ្នូ ឆ្នាំ ២០១៦។

៤រដូវកាលដំបូងរបស់ Lewin ជាមួយក្លឹបថ្មីគឺមិនសូវលេចមុខមាត់ប៉ុន្មានទេ ប៉ុន្តែគេជាសមាជិកសំខាន់ម្នាក់ដែលសឹងតែមិនសូវបាត់មុខក្នុងការប្រកួតក្នុងលីគ។ រដូវកាល២០១៩-២០ កីឡាករសញ្ជាតិអង់គ្លេសរូបនេះបានបង្ហាញខ្លួនដល់ទៅ៣៦ប្រកួតនៅ Premier League។

វ័យទើបតែនៅក្មេង រដូវកាល២០២០-២១ ជាពេលវេលាមាសរបស់ Lewin ដោយគេបានបង្ហាញទម្រង់លេងលេចធ្លោមែនទែនក្នុងលីគ។ ដើមរដូវកាលដំបូងបង្ហាញខ្លួនបាន៤ប្រកួត Lewin រកបាន៦គ្រាប់ទៅហើយ ក្រោមការដឹកនាំរបស់លោក Carlo Ancelotti នៅ Everton៕