កម្មវិធីសិក្សាតាមប្រព័ន្ធអនឡាញលេខ ១ ជប៉ុន ក្លាយជាកម្មវិធីដំបូងគេ ក្នុងកុំព្យូទ័រ Koompi E11

2020-10-12 06:53:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងអប់រំ យុវជន និងកីឡា និងទីភ្នាក់ងារសហប្រតិបត្តិការអន្តរជាតិជប៉ុន (JICA) ប្រចាំនៅកម្ពុជា បានរៀបចំពិធីប្រកាសដាក់ឲ្យប្រើប្រាស់ បច្ចេកវិទ្យាអប់រំថ្មីសម្រាប់កុមារអាយុពី ៤ ទៅ ១២ ឆ្នាំរវាងក្រុមហ៊ុន Think!Think! និងក្រុមហ៊ុនកុំព្យូទ័រ Koompi កាលពីចុងខែកញ្ញកន្លងទៅ។

រូបភាព៖ Koompi

Think!Think! គឺជាកម្មវិធីមួយដើម្បីជួយដល់កុមារក្នុងការអភិវឌ្ឍជំនាញបញ្ញានិងសមត្ថភាពដោះស្រាយបញ្ហា។ វាជាកម្មវិធីសិក្សាតាមប្រព័ន្ធអនឡាញលេខ ១ របស់ជប៉ុន ហើយនឹងក្លាយជាកម្មវិធីដំបូងគេនៅក្នុងកុំព្យូទ័រ Koompi ម៉ូឌែល E11 ថ្មីដែលរចនាឡើងជាមួយឈុតសិក្សាសម្រាប់សិស្សានុសិស្សក្នុងតម្លៃសមរម្យបំផុត។ ពាក្យ KOOMPI បានមកពីឃ្លាជាភាសាខ្មែរមានន័យថា «សៀវភៅ ឬ ប្រភពចំណេះដឹង» ខណៈដែលកុំព្យូទ័រនេះជាយីហោរបស់កម្ពុជាដំណើរការដោយ Linux ដើម្បីជួយបង្កើតនិងផ្តល់នូវឧបករណ៍ក្នុងការដោះស្រាយបញ្ហាសម្រាប់មនុស្សជំនាន់ក្រោយ។

នាយកប្រតិបត្តិនៃក្រុមហ៊ុនកុំព្យូទ័រ Koompi លោក ថុល រឹទ្ធីបានថ្លែងថា៖ «អ្នករាល់គ្នាអាចមានលទ្ធភាពក្នុងការទិញកុំព្យូទ័ររបស់យើងក្នុងតម្លៃសមរម្យ ខណៈដែលតម្លៃបច្ចុប្បន្នសម្រាប់ការបញ្ជាទិញមុនគឺមានតម្លៃ ១៤៨,៩៩ ដុល្លារ ខណៈដែលតម្លៃក្នុងបញ្ជីគឺ ១៦៨,៩៩ ដុល្លារ។ យើងគ្រោងនឹងបញ្ចុះតម្លៃរហូតដល់ ៩៩ ដុល្លារ តែវាត្រូវការពេលវេលា។ គំនិតផ្តួចផ្តើមចំបងរបស់យើងគឺដើម្បីឲ្យសិស្សម្នាក់មានកុំព្យូទ័រមួយ (One-Student-One-Notebook) ។ យើងកំពុងតែស្ថិតក្នុងដំណើរការផលិតកុំព្យូទ័រយួរដៃដែលអាចសាកថ្មកុំព្យូទ័រតាមរយៈថាមពលពន្លឺព្រះអាទិត្យ ដែលមិនតម្រូវក្នុងការប្រើប្រាស់អគ្គិសនីទៀតទេ»។

ជាមួយគ្នានេះផងដែរ នាយកប្រតិបត្តិក្រុមហ៊ុន Think!Think! លោក Daiki Watanabe បានថ្លែងថា៖ «KOOMPI ផលិតផ្នែករឹង Hardware ដ៏ល្អបំផុត ហើយយើងគឺជាក្រុមហ៊ុនផ្នែកទន់ software ល្អបំផុតមកពីប្រទេសជប៉ុន។ យើងនឹងធ្វើការរួមគ្នាដើម្បីផ្តល់នូវផលិតផលថ្មីរបស់ KOOMPI OS ដោយមានការប្រើប្រាស់កម្មវិធី Think!Think!។ បច្ចុប្បន្ន អ្នករាល់គ្នាអាចទទួលបានកុំព្យូទ័រដែលមានផ្នែករឹងនិងផ្នែកទន់ដែលល្អបំផុតដើម្បីសិក្សាក្នុងតម្លៃសមរម្យ»។

រូបភាព៖ Koompi

បន្ទាប់ពីបានចុះហត្ថលេខាលើភាពជាដៃគូជាផ្លូវការរវាងក្រុមហ៊ុនកុំព្យូទ័រ Koompi និងក្រុមហ៊ុន Think!Think! លោក Daiki Watanabe បានមានប្រសាសន៍ថា៖ «យើងពិតជារីករាយណាស់ក្នុងការបង្កើតឱកាសស្មើគ្នាសម្រាប់អ្នករាល់គ្នាក្នុងការទទួលបានការសិក្សារៀនសូត្រជាមួយនឹងតម្លៃសមរម្យជាពិសេសកុមារនៅតាមបណ្ដាខេត្តនានា។ គោលដៅរបស់យើងគឺសម្រាប់កុមារដែលមានអាយុពី ៤ ទៅ ១២ ឆ្នាំ។ ក្មេងដែលមានអាយុប្រមាណជា ៤ ឆ្នាំ ប្រហែលជាមានការពិបាកក្នុងការប្រើប្រាស់កុំព្យូទ័រ ដូច្នេះឧបករណ៍ tablet អាចនឹងត្រូវបានណែនាំសម្រាប់អាយុនេះ រីឯក្រុមអាយុពី ៦ ទៅ ១២ ឆ្នាំអាចប្រើកុំព្យូទ័របាន»។

លោក ថុល រឹទ្ធី បន្ថែមថា៖ «នេះគឺជាសមិទ្ធិផលថ្មីមួយទៀត។ ភាពជាដៃគូនេះបាននាំឲ្យយើងនូវការសហការគ្នាជាពិសេសសម្រាប់ការអប់រំកុមារ។ យើងនឹងមានការសហការកាន់តែច្រើនជាមួយគ្នាបន្ថែមទៀតនាពេលខាងមុខ។ Think!Think! គឺជាកម្មវិធីដំបូងដែលបានតំឡើងជាផ្លូវការនៅក្នុង KOOMPI ខណៈដែលយើងសង្ឃឹមថាសកម្មភាពនេះនឹងក្លាយជាការចាប់ផ្តើមសម្រាប់កម្មវិធីជាច្រើនទៀតដែលត្រូវបានបង្កើតនិងតំឡើងនាពេលអនាគត»។

លោក Naoko Ide តំណាងអង្គការ JICA ក៏បានថ្លែងឲ្យដឹងផងដែរថា៖ «គំរោងរបស់ Think!Think! មានឥទ្ធិពលយ៉ាងខ្លាំងដល់សង្គមកម្ពុជា ខណៈដែល JICA ក៏បានយកចិត្តទុកដាក់យ៉ាងខ្លាំងចំពោះគម្រោងបែបនេះផងដែរ។ តាមរយៈគំរោងនេះ យើងអាចជម្រុញសិស្សឲ្យផ្ដោតទៅលើការសិក្សានៅផ្ទះក្នុងកំឡុងពេលមានជំងឺរាតត្បាតនេះ។ យើងបានសហការជាមួយក្រសួងអប់រំ យុវជននិងកីឡាដើម្បីផ្តល់ជូនមេរៀន Think!Think! តាមអ៊ិនធរណេត ខណៈដែលកម្មវិធីនេះត្រូវបានផ្សព្វផ្សាយនៅលើប៉ុស្តិ៍ទូរទស្សន៍ TVK2 និងគេហទំព័រហ្វេសប៊ុករបស់ក្រសួងអប់រំ។ សកម្មភាពនេះគឺជាសមិទ្ធិផលមួយក្នុងចំណោមសមិទ្ធិផលជាច្រើននាពេលបច្ចុប្បន្នរបស់យើង»។

ប្រធាននាយកដ្ឋានបច្ចេកវិទ្យាព័ត៌មាននៃក្រសួងអប់រំ លោក សុខ ថា បានមានប្រសាសន៍ថា៖ «ជាមួយនឹងបច្ចេកវិទ្យាចុងក្រោយរបស់ KOOMPI និងកម្មវិធី Think!Think ក្រោមការគាំទ្រដោយ JICA យើងជឿជាក់ថាសាលារៀនទាំងរដ្ឋនិងឯកជននឹងអាចបង្កើតការអប់រំបានល្អប្រសើរសម្រាប់សិស្សនៅទូទាំងប្រទេសកម្ពុជា។ ភាពជាដៃគូនេះអាចនាំមកនូវអត្ថប្រយោជន៍កាន់តែច្រើនដល់ការអប់រំ។

ហ្គេម គឺជាភាសាសកលសម្រាប់កុមារហើយអ្នករាល់គ្នានឹងរីករាយជាមួយវាខណៈដែលកំពុងសិក្សារៀនសូត្រ។ លើសពីនេះទៀត សកម្មភាពនេះអាចជាផ្នែកមួយនៃដំណើរការអប់រំយ៉ាងងាយស្រួលដែលតម្រូវឲ្យសាលានានាត្រូវតែមានបន្ទប់ពិសោធន៍កុំព្យូទ័រ។ ការបង្កើតបន្ទប់ពិសោធន៍ត្រូវការការវិនិយោគបន្ថែមដែលដៃគូបានផ្តួចផ្តើមក្នុងការតម្រូវឲ្យសាលាមួយមានមន្ទីរពិសោធន៍មួយ ខណៈដែល ក្រសួងក៏នឹងគាំទ្រដល់គំនិតផ្ដួចផ្ដើមនេះផងដែរ»។

អង្គការ JICA និងក្រសួងអប់រំនឹងក្លាយជាអតិថិជនដំបូងគេដែលប្រើ KOOMPI OS ជាមួយនឹងកម្មវិធី Think!Think! នៅក្នុងការស្ទង់មតិដើម្បីឲ្យដឹងថាតើវាមានជោគជ័យយ៉ាងណា។ Think!Think! បានដំណើរការគំរោងមួយជាមួយ JICA និងក្រសួងអប់រំ យុវជន និងកីឡាចាប់តាំងពីឆ្នាំ ២០១៨ ៕ ប្រភព៖ Koompi