ស្រីស្អាតប្រចាំក្រុមទ័ព ទេព ម៉ូលីកា ថាសង្សារមិនសំខាន់ទេ
- 2020-10-20 02:50:36
- ចំនួនមតិ 0 | ចំនួនចែករំលែក 0
ស្រីស្អាតប្រចាំក្រុមទ័ព ទេព ម៉ូលីកា ថាសង្សារមិនសំខាន់ទេ
ចន្លោះមិនឃើញ
ស្រីស្អាតប្រចាំក្រុម Tiffy Army នារី ទេព ម៉ូលីកា បានរៀបរាប់ទាំងសើចតិចៗថា សង្សារមិនសំខាន់ទេ សំខាន់ក្រុមលេងឲ្យបានល្អសិន សម្រាប់ការប្រកួតលីគនារីកម្ពុជា ដែលបានប្រកួតចំនួន ៤ សប្ដាហ៍រួចរាល់។
Sabay បានសួរទៅកាន់ អ្នកខេត្តកណ្ដាលរូបនេះថា «មិនខ្លាចរកសង្សារមិនបានទេហី ? » សិស្សថ្នាក់ទី១០រូបនេះបានឆ្លើយថា «សង្សារមិនសំខាន់ទេ។ ស្រលាញ់វិស័យនេះហើយ ទោះបីសម្រស់យ៉ាងណាក៏មិនអីដែរ ព្រោះបើថាមានសម្រស់ហើយ ក៏មិនអាចជួយឲ្យក្រុមលេងបានល្អដែរអីចឹងសម្រស់មិនសំខាន់ប៉ុន្មានទេ»។
ទាក់ទងការលេងបាល់ទាត់នេះ ម៉ូលីកា ធ្លាប់ត្រូវបានឪពុកម្ដាយរបស់គេបដិសេធ និងមិនគាំទ្រឲ្យចូលលេងឡើយ។ ប៉ុន្តែមួយរយៈចុងក្រោយនេះ ដោយសារឪពុក-ម្ដាយរបស់គេយល់ដឹងច្បាស់ពីវិស័យនេះទើបងាកមកគាំទ្រវិញ។
សិស្សសាលាកោះដាច់រូបនេះបន្ថែមទៀតថា រូបគេមិនគិតថា ខ្លួនឯងស្អាតអស្ចារ្យអ្វីឡើយ ។ ចំណែកការចូលចិត្តលេងបាល់នេះវិញ គឺកើតឡើងជាយូរណាស់មកហើយ ពោលតាំងពីនៅតួចៗ ប៉ុន្តែទើបតែទទួលបានឱកាសចូលហាត់នៅក្លឹបក្រសួងការពារជាតិកាលពី ៣ ខែមុនការប្រកួត។
បច្ចុប្បន្ន ទេព ម៉ូលីកា សិក្សានៅ វិទ្យាល័យ ប៊ុន រានី ហ៊ុន សែន កោះដាច់ ។ មានតួនាទីជាខ្សែបម្រើស្លាបឆ្វេងរបស់ទ័ព។ កីឡាការិនីរូបនេះមានស្រុកកំណើតនៅឃុំកោះដាច់ ស្រុកមុខកំពូល ខេត្តកណ្ដាល កើតថ្ងៃទី០៥ ខែមករា ឆ្នាំ២០០៤ មានកម្ពស់ ១,៦៣ ម៉ែត្រ។ ម៉ូលីកា ជាកីឡាករឆ្នើមក្នុងក្រុម ដែលបង្ហាញខ្លួនក្នុងជម្រើស ១១ នាក់ដំបូងទាំង៤ ប្រកួតកន្លងមក ៕