ប្រាយុទ្ធ ព្រមប្រជុំសភាបន្ទាន់ដោះស្រាយវិបត្តិ ប៉ុន្តែបាតុករថៃយកតែលក្ខខណ្ឌចេញពីតំណែងប៉ុណ្ណោះ

2020-10-26 00:57:47
ចំនួនមតិ 0 | ចំនួនចែករំលែក 0

ចន្លោះមិនឃើញ

គិតចាប់ពីថ្ងៃទី២១ តុលា ២០២០ ខាងរដ្ឋាភិបាល លោកនាយករដ្ឋមន្ត្រី ប្រាយុទ្ធ ច័ន្ទអូឆា បានស្នើបកទៅអ្នកប្រមូលផ្ដុំវិញថា ត្រូវដកថយមួយជំហានទាំងអស់គ្នា។ ដោយរដ្ឋាភិបាលលុបចោលនូវសេចក្ដីប្រកាសដាក់ក្រុងបាងកក ស្ថិតនៅក្នុងគ្រាអាសន្នកម្រិតខ្ពស់ និងបើកឲ្យមានការប្រជុំសភា សម័យវិសាមញ្ញនៅថ្ងៃទី ២៦ តុលា - ២៧ តុលា ដើម្បីរកដំណោះស្រាយ។

បញ្ហាពេលនេះ នៅត្រង់ចំណុចដែលបានលើកឡើងរបស់នាយករដ្ឋមន្ត្រី ប្រាយុទ្ធ ពីលក្ខខណ្ឌ ក្នុងការដកថយរបស់រដ្ឋាភិបាល មិនស៊ីសង្វាក់គ្នាជាមួយនឹងក្រុមអ្នកប្រមូលផ្ដុំ ហើយគេមិនឃើញមាននិន្នាការណាមួយបង្ហាញថា នឹងមានការចរចាគ្នា កើតឡើងដែរ រវាងក្រុមអ្នកប្រមូលផ្ដុំ និងរដ្ឋាភិបាលលោក ប្រាយុទ្ធ ដែលមានការពាក់ព័ន្ធ និងការទាមទារ របស់ក្រុមអ្នកប្រមូលផ្ដុំ និងជំហររបស់រដ្ឋាភិបាល។

ការទាមទាររបស់អ្នកប្រមូលផ្ដុំគឺ នាយករដ្ឋមន្ត្រី ប្រាយុទ្ធ ត្រូវចុះចេញពីតំណែង គឺជាលក្ខខណ្ឌសំខាន់ដែលក្រុមអ្នកប្រមូលផ្ដុំបានកំណត់។ បើទិដ្ឋភាពនេះកើតឡើងទើបពួកគេ ព្រមដកថយក្រោយមួយជំហានមកវិញ។ រដ្ឋាភិបាលលោក ប្រាយុទ្ធ បង្ហាញពីជំហររបស់ខ្លួន ដោយកំណត់លើការលុបការប្រកាសដាក់ក្រុងបាងកក ឲ្យស្ថិតនៅក្នុងគ្រាអាសន្នដ៏ធ្ងន់ធ្ងរ ព្រមទាំងឈានទៅបើកឲ្យសភាប្រជុំសម័យវិសាមញ្ញ។ ជុំវិញរឿងនេះមានការវិភាគពីសំណាក់ អ្នកជំនាញលើនយោបាយរបស់ថៃ ថាលោក ប្រាយុទ្ធ ច័ន្ទអូឆា គ្មានការដកថយ ដើម្បីបញ្ចប់ជម្លោះនេះទេ។ ប្រសិនបើពិនិត្យ លើការប្រកាសរបស់អ្នកប្រមូលផ្ដុំទុកពេលឲ្យលោក ប្រាយុទ្ធ ៣ថ្ងៃ ក៏បានគ្រប់កំណត់ក្នុងថ្ងៃទី ២៤តុលា ហើយគេពុំឃើញ លោក ប្រាយុទ្ធ បង្ហាញឥរិយាបថណាមួយ ថានឹងចុះចេញពីតំណែងនោះទេ។

ការចរចារវាងក្រុមអ្នកប្រមូលផ្ដុំ និងរដ្ឋាភិបាល ក៏មិនមានសញ្ញាណាមួយបង្ហាញថា នឹងកើតឡើងដែរ។ ទន្ទឹមនឹងការលើកឡើងពីខាងរដ្ឋាភិបាលថៃ ឲ្យមានការដកថយមួយជំហានម្នាក់នេះ គេឃើញមានចលនាក្រុម អ្នកពាក់អាវលឿង ចេញមកដើរក្បួន ហើយប្រកាសថាពួកគេមានស្វាមីភក្ដិលើស្ថាប័នព្រះមហាក្សត្រថៃ ហើយការពារស្ថាប័ននេះ។ ការប្រមូលផ្ដុំរបស់ក្រុមអាវលឿង ក៏បានធ្វើជាច្រើន កន្លែង ក្នុងក្រុងបាងកក និងនៅតាមខេត្តខ្លះទៀត៕